MINI FUTBOL BOʻYIChA AMUDARYo TUMAN HOKIMI KUBOGI MUSOBAQALARI OʻTKAZILDI

Amudaryo tumanida yoshlar oʻrtasida sport-sogʻlomlashtirish ishlarini yanada yaxshilash, ularning boʻsh vaqtlarini mazmunli oʻtkazishlarini taʼminlash, ayniqsa, idora va tashkilotlarda faoliyat olib boruvchi ishchi-xizmatchilarning jismoniy faolliklarini oshirish orqali salomatliklarini mustahkamlash maqsadida turli bayram sanalari munosabati bilan sport musobaqalari tashkil etish doimiy anʼanaga aylangan. Bu kabi tadbirlar Navroʻz – umumxalq bayrami arafasida yanada qizgʻin tus oladi.

Joriy yilning 15-17-mart kunlarida tumanning Olmazor mahallasi hududida joylashgan sunʼiy qoplamali sport maydonchasida sportning mini futbol turi boʻyicha idora va tashkilotlar xodimlari oʻrtasida Amudaryo tumani hokimi kubogi uchun oʻtkazilgan musobaqalar futbol ixlosmandlari uchun bayramona joʻshqin kayfiyat bagʻishladi.

Avvalo shuni alohida eʼtirof etish kerakki, mazkur sport musobaqasini shaffoflik asosida oʻtkazish maqsadida unda ishtirok etish istagini bildirgan jamoalar aʼzolari musobaqa shartlari va oʻyin tartib-qoidalari bilan oldindan tanishishlari uchun imkoniyat yaratildi va tumandagi idora-tashkilotlarning ishchi-xodimlaridan iborat 10 ta futbol jamoasi tarkibidagi 80 nafar ishtirokchi roʻyxati shakllantirildi.

Uch kun davom etgan musobaqalarda Amudaryo tuman hokimining oʻrinbosarlari Bahodir Yernazarov, Nodir Kamolov, sport maktabi direktori Jasur Yaxshimov, shuningdek, idora va tashkilotlar rahbarlari ishtirok etishdi. Musobaqaning birinchi kunida saralash, ikkinchi kunida yarim final, uchinchi kunida esa 3-oʻrin va final oʻyinlari oʻtkazildi.

Qizgʻin bahslarga boy va doʻstona vaziyatda oʻtgan musobaqa yakunlariga koʻra, 1-oʻrin Amudaryo tumani Elektr tarmoqlari korxonasi ishchi-xodimlari jamoasiga nasib etdi. 2-oʻrinni hududlardagi hokim yordamchilaridan iborat jamoa futbolchilari egalladilar. 3-oʻrin uchun oʻtgan qizgʻin va murosasiz bahslar natijasiga koʻra, “Amudaryotumangaz” gaz taʼminoti idorasi jamoasi ustunlikka erishdi.

Navroʻz – umumxalq bayrami arafasida boʻlib oʻtgan mazkur sport musobaqasi nafaqat ishtirokchi jamoalar aʼzolari, balki futbol sporti ishqibozlari uchun ham bayramona kayfiyat bagʻishladi.

Musobaqa yakunida tashkilotchilar tomonidan 1-oʻrinni egallagan tuman Elektr tarmoqlari korxonasi jamoasiga Amudaryo tumani hokim kubogi tantanali ravishda topshirildi va gʻolib jamoalar aʼzolari munosib taqdirlandilar.

Robiya Yoʻldosheva.