МИНИ ФУТБОЛ БЎЙИЧА АМУДАРЁ ТУМАН ҲОКИМИ КУБОГИ МУСОБАҚАЛАРИ ЎТКАЗИЛДИ

Амударё туманида ёшлар ўртасида спорт-соғломлаштириш ишларини янада яхшилаш, уларнинг бўш вақтларини мазмунли ўтказишларини таъминлаш, айниқса, идора ва ташкилотларда фаолият олиб борувчи ишчи-хизматчиларнинг жисмоний фаолликларини ошириш орқали саломатликларини мустаҳкамлаш мақсадида турли байрам саналари муносабати билан спорт мусобақалари ташкил этиш доимий анъанага айланган. Бу каби тадбирлар Наврўз – умумхалқ байрами арафасида янада қизғин тус олади.

Жорий йилнинг 15-17 март кунларида туманнинг Олмазор маҳалласи ҳудудида жойлашган сунъий қопламали спорт майдончасида спортнинг мини футбол тури бўйича идора ва ташкилотлар ходимлари ўртасида Амударё тумани ҳокими кубоги учун ўтказилган мусобақалар футбол ихлосмандлари учун байрамона жўшқин кайфият бағишлади.

Аввало шуни алоҳида эътироф этиш керакки, мазкур спорт мусобақасини шаффофлик асосида ўтказиш мақсадида унда иштирок этиш истагини билдирган жамоалар аъзолари мусобақа шартлари ва ўйин тартиб-қоидалари билан олдиндан танишишлари учун имконият яратилди ва тумандаги идора-ташкилотларнинг ишчи-ходимларидан иборат 10 та футбол жамоаси таркибидаги 80 нафар иштирокчи рўйхати шакллантирилди.

Уч кун давом этган мусобақаларда Амударё туман ҳокимининг ўринбосарлари Баҳодир Ерназаров, Нодир Камолов, спорт мактаби директори Жасур Яхшимов, шунингдек, идора ва ташкилотлар раҳбарлари иштирок этишди. Мусобақанинг биринчи кунида саралаш, иккинчи кунида ярим финал, учинчи кунида эса 3-ўрин ва финал ўйинлари ўтказилди.

Қизғин баҳсларга бой ва дўстона вазиятда ўтган мусобақа якунларига кўра, 1-ўрин Амударё тумани Электр тармоқлари корхонаси ишчи-ходимлари жамоасига насиб этди. 2-ўринни ҳудудлардаги ҳоким ёрдамчиларидан иборат жамоа футболчилари эгалладилар. 3-ўрин учун ўтган қизғин ва муросасиз баҳслар натижасига кўра, “Амударётумангаз” газ таъминоти идораси жамоаси устунликка эришди.

Наврўз – умумхалқ байрами арафасида бўлиб ўтган мазкур спорт мусобақаси нафақат иштирокчи жамоалар аъзолари, балки футбол спорти ишқибозлари учун ҳам байрамона кайфият бағишлади.

Мусобақа якунида ташкилотчилар томонидан 1-ўринни эгаллаган туман Электр тармоқлари корхонаси жамоасига Амударё тумани ҳоким кубоги тантанали равишда топширилди ва ғолиб жамоалар аъзолари муносиб тақдирландилар.

Робия Йўлдошева.