NAVROʻZ KELDI VATANGA!
Sumalakdan tosh topdim, bir parcha quyosh topdim,
Gul-u chamanga boqdim, bagʻridan otash topdim.
Baland uchgan turnalar “quv-quv”lashgan pallalar,
Koʻkragimga koʻk taqdim, yashillangan rosh topdim –
Bahordan darak bergan havolardan aylanay,
Koʻngillarni tebratgan navolardan aylanay!
Yam-yashil roshda turib, peshvoz chiqdim koʻklamga,
Mehnatga yeng shimarib, alyor aytdim oʻlkamga:
– Ehe-hey! Yoʻl-yoʻlaklar, bezandi mahallalar,
Gul atrini taratib, Navroʻz keldi Vatanga!
Ona Yurt! “Sumalakli Navroʻzingdan aylanay”,
Fayzga toʻla toʻrt tomon, rizq-roʻzingdan aylanay!
Amuga boqdim shoyon, toʻlqinlari shiddatli,
Suvlari misli karvon, oqib borar haybatli.
Voajab! Unutilgan, sagʻir qolgan sohillar,
Daryosiga talpinib turishlari hayratli.
Orolqumga oshiqqan chashmi giryonim, hay-hay –
Pomirdan enib kelgan daryoimdan aylanay!
In qurdi qaldirgʻochlar ayvonlarga. Ajoyib!
Uygʻondi gul-ogʻochlar shabnamlarga yuz chayib.
Kurtaklar nafasida bir jonsarak hayajon,
Toʻlab boj-u xirojlar, gul ochdilir jilmayib.
Sabolar bazm qurgan nahoringdan aylanay,
Vatan, senga talpingan bahoringdan aylanay!
Turnalar qanotida Navroʻz aylar xiromon,
Xivchin “tulpor oti”da dunyo kezar bolajon.
Xushxonlar sayrogʻidan yaralib dilnavolar,
Yer, osmon — koinotda aks etar “yashil makon”.
Vatanga nur elagan oftobingdan aylanay,
Muruvvatli, mehrli mohtobingdan aylanay!
Dalalar ogʻushida qizigan mehnat bazmi,
Yurtning keksa-yoshida yaratmoq – ezgu azmi.
Dasht-u choʻlni uygʻotib, esgan mayin sabolar,
Qir-adir, togʻ-u toshda azaliy hayot nazmi –
Shalolalar sirlashgan damlaringdan aylanay,
O mehnatkash Bahorim, tashrifingdan aylanay!
Togʻlar tomon solingan soʻqmoqlarim maysarang,
Navroʻz nafasi ingan navolar bergay jarang.
Koʻpkariga chogʻlangan anov uchqur tulporlar,
Sumalakka shaylangan momolarga bir qarang:
Qirgʻiz-u tojik, qozoq – qir oshib kelgan atay,
Qoraqalpoq va turkman – oʻzbegimning oʻziday!
Markaziy Osiyoga Navroʻz keldi, yoronlar,
Chulgʻanib nur-ziyoga, solib zavq-u suronlar.
Oq oʻtovlar tikilib, boshlandi sayli Bahor,
Totuvlik oshyoniga manzil shahru yovonlar.
Vatan, oʻzim poyingga mehr boʻlib toʻkilay,
Ellarni birlashtirgan Navroʻzingdan aylanay!
Jonajon Oʻzbekiston mashhuri jahon bugun,
Oʻgʻil-qizlari zakiy va mardi maydon bugun.
“Yashil iqtisodi”-la oʻzni etib namoyon,
Har qarich yeri obod , “yam-yashil makon” bugun.
Robiya der, har tuning Alloh qadr aylagay,
Kunlaring Navroʻz boʻlib, baxtga yor aylagay!
Robiya Yoʻldosheva, Qoraqalpogʻistonda xizmat koʻrsatgan jurnalist
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
