“Qadriyatlaring boqiy boʻlsin, Navroʻz!” shiori ostida Amudaryo tumanida Navroʻz bayrami keng nishonlandi
Tarovatli kunlarda tabiat uygʻonib, jonajon diyorimizga barchamiz orziqib, sogʻinib kutgan Navroʻzi olam kirib keldi. Ming yillar davomida maʼnaviy hayotimizning koʻrku ziynati boʻlib kelayotgan bu ajoyib, xosiyatli bayram bugun qalblarimizga yanada cheksiz quvonch va zavq bagʻishlamoqda.
Bayram munosabati bilan barcha sharq xalqlari qatori yurtimizning jonkuyar, fidoyi, mehnatsevar xalqi ham Navroʻz ayyomini tantanali tarzda nishonlamoqda.
19-mart kuni Amudaryo tumanining Doʻstlik mahallasi hududidagi Vaxum aholi punktida joylashgan bolalar oʻyingohida ham “Qadriyatlaring boqiy boʻlsin, Navroʻz!” shoiri ostida bayram tadbiri tashkil qilindi.
Bayram tadbirida respublika va tuman miqyosidagi rahbarlar, deputatlar, korxona-tashkilotlar hamda boʻlimlar masʼullari, fuqarolar yigʻinlari vakillari, taniqli sanʼatkorlar, taʼlim-tarbiya muassalari xodimlari hamda tuman aholisi ishtirok etdi.
Tadbir avvalida tuman hokimining birinchi oʻrinbosari Faxriddin Yusupov tuman hokimi Sobir Xoʻjametovning xalqimizga yoʻllagan bayram tabrigini oʻqib eshittirdi. Bayram tabrigida oʻtgan davr mobaynida tumanni kompleks ijtimoiy-iqtisodiy rivojlantirish borasida barcha sohalarda amalga oshirilayotgan keng koʻlamli ishlar, erishilayotgan yutuqlar hamda kelgusidagi rejalar xususida maʼlumotlar berildi.
Navroʻz — yangi dehqonchilik mavsumining boshlanishi, qut-baraka, obodlik va farovonlik ramzi. Bobodehqonlarimiz yangi dehqonchilik yilining serhosil, qut-barakali kelishini, toʻkin-sochin boʻlishini tilab duo qilib, allaqachon dalada ishlarni boshlab yuborishgan.
Ayni paytda mirishkor dehqonlarimiz 5 ming 970 gektar yerga ekilgan gʻalla maydonlarida unib chiqqan maysalarni mehr bilan parvarishlamoqdalar. Maqsad — ekilgan gʻalladan kamida 60-80 tsentnergacha hosil olish va xalqimiz xirmonini donga, dasturxonini nonga toʻldirishdir.
Bayram tabrigida taʼkidlanganidek, 2022-2026-yillarga moʻljallangan “Yangi Oʻzbekistonning taraqqiyot strategiyasi” doirasida “Inson qadri uchun” degan tamoyil asosida xalqimizning turmush farovonligini yanada oshirish, iqtisodiyotni va tadbirkorlikni jadal rivojlantirishga qaratilgan ulkan islohotlar amalga oshirilmoqda. Turli dasturlar doirasida 2024-yil davomida 4855 nafar fuqarolarga 65,5 mlrd soʻmlik kreditlar ajratildi.
Muhtaram Prezidentimizning tashabbusi asosida tomorqa va ijaraga olingan yer maydonlaridan samarali foydalanish boʻyicha elektron onlayn auktsion savdolari orqali jami 1536 gektar yer maydonlari 4275 nafar ishsiz fuqarolarga ajratib berilgan.
Shuningdek, joriy yilda ham tumanimizni ijtimoiy-iqtisodiy rivojlantirish dasturi doirasida 39 ta loyihalarga 317,8 mlrd. coʻmlik investitsiyalar jalb qilish orqali 582 ta yangi ish oʻrinlari yaratish rejalashtirilgan. 2025-yilda tumanimizda eksport koʻrsatkichlarini 16 mln. dollarga, shundan sanoat korxonalarining eksport hajmini 12 mln. dollarga, meva-sabzavot mahsulotlari eksporti hajmini 4 mln. dollarga yetkazish koʻzda tutilmoqda.
Barcha manbalar hisobidan 15 ta ijtimoiy soha obʼektlarida jami 52,5 mlrd. soʻmlik qurilish-taʼmirlash ishlari olib borilmoqda. Qolaversa, davlatimiz rahbari tashabbusi bilan tuman aholisini toza ichimlik suvi bilan taʼminlash maqsadida qiymati 29 mln. dollarlik loyiha amalga oshirilmoqda. Bu loyiha orqali 3 dona ichimlik suv obʼekti hamda 300 km dan ortiq ichimlik suvi tarmoqlari qurish va rekonstruktsiya qilish belgilangan.
Qayd etish joizki, bugungi kunda amalga oshirilayotgan islohotlarning barchasi xalqimizning turmush tarzni yaxshilash, barqaror iqtisodiyotni taʼminlash, ijtimoiy adolatni qaror toptirish va bu jarayonda aholining har bir qatlamiga, ayniqsa, kam taʼminlangan shaxslarga, yoshlar va xotin-qizlarni qoʻllab-quvvatlashga eʼtibor qaratilib, ularning huquq va manfaatlarini himoya qilish eng ustuvor masalalar sifatida qaralmoqda.
Bayram tadbiri mobaynida xalqimiz uchun milliy taomlar va noz-neʼmatlarga boy boʻlgan bayram dasturxoni yozildi. Milliy urf-odatlarimiz, millatlararo hamdoʻstlik, koʻklam, Vatan, shodlik, yangilanish, baxtni tarannum etuvchi turli koʻrinishlar, ajoyib sahnaviy chiqishlar, raqslar, kuy-qoʻshiqlarga boy boʻlgan katta kontsert dasturi tadbirga yuqori shukuh va bayramona kayfiyat bagʻishladi.
Shuningdek, sayl mobaynida tuman hokimi Sobir Xoʻjametov hokim kubogi uchun oʻtkazilgan sport musobaqalari gʻoliblariga diplom hamda qimmatbaho sovgʻalarni topshirdi. Navroʻz saylida har bir qishloq va mahalla polvonlari, mohir sportchilari bilan kurash, arqon tortishuv bahslari katta taassurotlarga boy tarzda oʻtkazildi. Barcha bellashuvlar gʻoliblariga bayram sovgʻalari topshirildi.
Navroʻz – bu nafaqat yangi yilning boshlanishi, balki odamlar oʻrtasida hamjihatlik, mehr-muhabbat, adolat va birdamlik ramzidir. U koʻpgina xalqlar uchun yangi umidlar debochasi, yangi rejalar tuzish pallasi. Navroʻz kun bilan tunning tenglashishi, borliqning uygʻonishi, insonning tabiat bilan uygʻunligini his qilgan holda mehnat maydoni tomon oshiqishi bilan barchaga birdek qadrli fasl. Navroʻz tiriklik, yashillik, yasharish va yangilanish ayyomidir. Shuning uchun ham Navroʻz bayrami necha-necha zamonlardan buyon ardoqlanib keladi, xalqimiz tomonidan sevib nishonlanadi.
Fursatdan foydalanib, xalqimizni mana shunday qadimiy va boqiy bayram – Navroʻz ayyomi bilan bilan tabriklaymiz! Sharqona yangi yilimiz har bir xonadonga tinchlik-xotirjamlik, baxt-u saodat, obodlik va farovonlik bilan kelsin! Bayram muborak boʻlsin!
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
