Huquqbuzarliklar profilaktikasi va jinoyatchilikka qarshi kurashish davr talabi

Soʻnggi yillarda mamlakatimizda huquqbuzarliklar profilaktikasi va jinoyatchilikka qarshi kurashish borasida keng koʻlamli chora-tadbirlar amalga oshirilib, huquq-tartibotni taʼminlashda ijobiy natijalarga hamda kriminogen vaziyatni sezilarli darajada yaxshilashga erishilmoqda.

Payshanba – “Jinoyat va huquqbuzarliklar profilaktikasi kuni”. Haftaning har payshanba kunida joylarda huquqni muhofaza qiluvchi organlar xodimlari tomonidan jamiyatda xavfsizlik va jamoat tartibini saqlash, fuqarolar hushyorligi va ogohligini oshirish, tinchlik, osoyishtalik va barqarorlikni taʼminlash borasidagi tushuntirish-targʻibot tadbirlari amalga oshiriladi.

13-mart kuni Amudaryo tumani hokimligida huquqbuzarliklar profilaktikasi kuni munosabati yigʻilish oʻtkazildi. Unda tuman hokimi Sobir Xoʻjametov, tumandagi huquqni muhofaza qiluvchi organlar masʼullari, “Mahalla yettiliklari” masʼullari ishtirok etdilar.

Yigʻilishda soʻzga chiqqan tuman hokimi Sobir Xoʻjametov bugungi kunda mahallalarda huquqbuzarliklarning oldini olish, jinoyatchilikni kamaytirish, sogʻlom, tinch va osoyishta muhitni shakllantirish eng asosiy vazifalardan ekanligini taʼkidladi. Hududlarda tovlamachilik va korruptsion holatlarning oldini olish, din niqobi ostida faoliyat yurituvchi ijtimoiy tarmoqlardagi taqiqlangan kanallar maʼlumotlariga ishonib qolmaslik va ogohlikni oshirish, tabiiy va texnogen tusdagi hodisalar yuz bergan vaqtda toʻgʻri harakatlanish boʻyicha targʻibot ishlarini yanada kuchaytirish lozimligi xususida soʻz yuritdi.

Shuningdek, tadbirda tuman Ichki ishlar boʻlimi boshligʻi Muxammetali Xoʻjamuratov soʻzga chiqib, huquqbuzarliklar profilaktikasi kuni amalga oshirilishi zarur boʻlgan chora-tadbirlar haqida maʼlumot berdi.

Xususan, huquqbuzarliklarga murosasizlik madaniyatini shakllantirish, huquqiy barham berish va fuqarolarning qonunga itoatkorlik xulq-atvorini ommalashtirishga qaratilgan, shu jumladan ichki ishlar organlari tayanch punktlari, huquqni muhofaza qiluvchi va boshqa davlat idoralari va tashkilotlarida “Ochiq eshiklar kuni”ni tashkil etish orqali tizimli chora-tadbirlarni amalga oshirish kerakligi taʼkidlandi.

Shuningdek, qonuniylik ahvolini va huquqbuzarliklar profilaktikasi boʻyicha chora-tadbirlarning samaradorligini atroflicha muhokama qilish uchun joylarda, birinchi navbatda kriminogen vaziyat nomaqbul boʻlgan hududlarda fuqarolarning sayyor qabullarini hamda davlat idoralari va tashkilotlari vakillarining aholi bilan uchrashuvlarini, ijtimoiy ahamiyati muhim boʻlgan sud muhokamalari boʻyicha sayyor sud majlislarini oʻtkazish zarurligi asosiy vazifalardan ekanligi haqida soʻz yuritildi.

Shu bilan birga mahallalarda xavfsiz muhitni yaratish, sodir etiladigan qonunbuzilishlarning asl omillarini oʻz vaqtida aniqlash va kompleks chora-tadbirlar bilan manzilli bartaraf etish orqali jinoyatchilikning barvaqt oldini olish tizimining samaradorligini yanada oshirish maqsadida imzolangan “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Prezident qarori ijrosini taʼminlashda asosiy vazifalar belgilab olindi.

Tadbir mobaynida mahallalarda aholi turmushining ijtimoiy-iqtisodiy sharoitlarini oʻrganish, huquqbuzarlik sodir etishga koʻmaklashuvchi shart-sharoitlarni aniqlash va bartaraf etish maqsadida uyma-uy yurishlarni tashkil etish boʻyicha masʼullarga tegishli topshiriq va koʻrsatmalar berildi.

Charos Arslonova, tuman hokimligining Axborot xizmati rahbari.