Ringda faqatgina kuchlilar va chidamlilargina gʻalaba qozonadi

“Boks – hayotdek: baʼzida qattiq zarbalar qabul qilishga toʻgʻri keladi, lekin oldinga intilish kerak”, degan edi zamondosh sportchilardan biri. Darhaqiqat, sportda nafaqat boks, balki boshqa sport turlarining ham oʻziga yarasha murakkabligi bor. Boisi, gʻalaba oʻz-oʻzidan sodir boʻlmaydi. Muvaffaqiyat seni izlab kelmaydi, uni sen oʻzing izlab borishing kerak. Tinimsiz mashgʻulot, harakat, ishtiyoq va muvaffaqiyatsizliklardan keyin ham ortga chekinmaslik sportchini toblaydi.

Soʻnggi yillarda yurtimizda sportga qaratilayotgan eʼtibor tufayli Amudaryo elida ham ana shunday kurashuvchan, tirishqoq, arslonyurak sportchilar yetishib chiqmoqda. Shulardan biri – Sardor Shomurodovdir. Qahramonimiz 2002-yil Amudaryo tumanining Toʻlqin ovulida dunyoga keladi. Bolaligidan kuchli sportchilarga havas qilib ulgʻaygan bu yigit kelajagini aynan sport sohasida koʻrar edi.

Sardor Shomurodov 12-13 yoshlarida Toʻlqinda joylashgan boks zalida Azim Muxtorov qoʻl ostida boks bilan shugʻullana boshladi. Keyinchalik esa 14 yoshida Nukus Olimpiya zaxiralari sport kollej-internatiga oʻqishga kiradi. Yosh bokschining tinimsiz saʼy-harakatlari, oʻz ustida ishlashi natijasida 2017-2018-yillarda ikki karra Oʻzbekiston chempioni va bir necha Xalqaro turnirlar gʻolibi boʻldi. Shuningdek, 2019-yilda oʻqishni muvaffaqiyatli tamomlab, Andijon shahrida yoshlar oʻrtasida boʻlib oʻtgan Oʻzbekiston chempionatida faxrli 3-oʻrinni egallab, Davlat jismoniy tarbiya va sport universitetiga imtiyozli ravishda oʻqishga qabul qilindi.

Sardor 2017-2018-yillari Oʻzbekiston oʻsmirlar terma jamoasi aʼzosi, 2019-2020-yillarda esa Oʻzbekiston yoshlar terma jamoasi aʼzosi, hozirgi kunda Oʻzbekiston kattalar milliy terma jamoasi aʼzosi hisoblanadi. 2019-yildan boshlab, Amudaryo tumani sport maktabi treneri Jasur Nurimbetov qoʻl ostida muntazam ravishda boks sir asrorlarini oʻrganib, shugʻullanib kelmoqda.

Sardor Shomurodovni chinakam omadli sportchilardan biri, deyish mumkin. Yosh boʻlishiga qaramasdan, uning shu paytga qadar erishgan yutuqlari talaygina. Qahramonimiz 2019-2020-yillarda yoshlar va kattalar oʻrtasida Oʻzbekiston chempionati sovrindori, Qozogʻistonning Olmaota shahrida boks boʻyicha boʻlib oʻtgan Xalqaro turnir sovrindori, Olmaliq shahrida boʻlib oʻtgan Xalqaro turnir finalchisi boʻldi va Oʻzbekiston sport ustasi normativini bajardi. Shuningdek, 2021-yil Sirdaryo viloyatida professional boks boʻyicha oʻtkazilgan jangda 76 kg vazn toifasida gʻalaba qozondi. 2022-yilda oliy taʼlim muassasasini bitirib, hozirgi kunda Amudaryo tuman sport maktabida boks boʻyicha murabbiylik qilib kelmoqda. Ayni damda yosh sportchimiz Jasur Nurimbetov kabi qobiliyatli ustoziga shogird sifatida koʻpgina musobaqalarda gʻalaba qozonib kelmoqda. Oʻz navbatida u ham koʻpgina shogirdlarga ustozdir.

Sardor Shomurodov uchun oʻtgan yil ham, bu yil ham omadli keldi. 2024-yilda kattalar oʻrtasida oʻtkazilgan Oʻzbekiston chempionatida faxrli 3-oʻrinni egallab, Oʻzbekiston Milliy terma jamoasiga qabul qilindi hamda aprel oyida Qirgʻizistoning Bishkek shahrida boʻlib oʻtgan Xalqaro turnirda faxrli 3-oʻrinni egalladi. Bu bilan cheklanib qolmasdan, shu yili Qozogʻiston Respublikasining Aqtau shahrida boʻlib oʻtgan Xalqaro turnirda faxrli 2-oʻrinni egallab, ushbu musobaqaning “Eng yaxshi bokschisi” deya eʼtirof etildi va taqdirlandi. Shuningdek, 2024-yilning dekabr oyida Oʻzbekiston Boks federatsiyasi Qoraqalpogʻiston Respublikasi boʻlimi tomonidan “Yilning eng yaxshi bokschisi” deb topildi.

Ha, intilganga tole yor, deya shuni aytishsa kerak. Bir muvaffaqiyat boshqa bir muvaffaqiyatni yetaklab keladi, degani bejizga emas. Bu yil ham sportchimiz uchun omadli boshlandi. Yaqindagina Nukus shahrida sportchi yoshlar va sport federatsiyalarini taqdirlash marosimida Sardor Shomurodov “Yilning eng yaxshi sportchisi” deb topilib, Qoraqalpogʻiston Respublikasi Sport vazirligi tomonidan munosib taqdirlandi.

U hozirgi kunda Oʻzbekiston Milliy terma jamoasi aʼzosi, har oyda Angren shahar Yangiobod sport bazasida olimpiada chempionlari boʻlmish Bahodir Jalolov, Hasanboy Doʻsmatov kabi sportchilar bilan birgalikda oʻquv-yigʻin mashgʻulotlarida ishtirok etib kelmoqda. Ayni damlarda sportchi havaskor boks bilan professional boksni uygʻunlashtirishni rejalashtirmoqda. Shuningdek, hozirda ustozi bilan birga may oyida Ostonada boʻlib oʻtadigan jahon chempionatiga qatnashib, gʻolib boʻlishni maqsad qilib, bu maqsad yoʻlida qizgʻin tayyorgarlik koʻrmoqda.

Biz esa, faxrimiz boʻlgan Sardorbekka rejalashtirayotgan ezgu ishlarida tole yor boʻlishini tilaymiz.

Aziza Madrahimova