Mehnat faxriylariga "Ikkinchi jahon urushidagi gʻalabaning 80 yilligi" esdalik yubiley medali tantanali tarzda topshirilmoqda

Ikkinchi jahon urushi nafaqat jang maydonlarida, balki front orqasida ham butun xalqning sabri va matonatini sinovdan oʻtkazgan voqea boʻldi. Millionlab yigitlar urush maydonlariga joʻnab ketar ekan, xalq xoʻjaligining turli sohalaridagi mashaqqatli va ogʻir ishlarni bajarish masʼuliyati ayollar, keksalar va oʻsmirlar yelkasiga tushdi. Ular gʻalabaga boʻlgan ishonch bilan kunu-tun fidokorona mehnat qildilar.

Ayollar ogʻir yer ishlarida, paxtazorlarda, zavod va fabrikalarda faol ish olib bordilar. Yer haydash, urugʻ ekish, oʻrim-terim ishlarining barchasi ularning zimmalarida edi. Bir paytlar bolalarini bagʻriga bosib, oʻchoq boshidan chiqmagan onalar va qiz-kelinchaklar endi qoʻliga ketmon olib, tong sahardan dalaga oshiqardilar.

Keksalar — bobo va momolar ham oʻzlarining qarilikni unutdi. Ular ham farzandlari uchun, ona Vatan uchun qoʻlidan kelganicha mehnat qilishdi. Oʻz bolalarini frontga kuzatgach, qalbida paydo boʻlgan alamni, farzandidan qora xat kelganda yuragida turgan sanchiqni unutish uchun tun-u kun mehnat maydonida jonbozlik koʻrsatishdi.

Ana shunday fidoyilardan biri, oʻsmirligi va yoshligini mehnat frontida oʻtkazgan yurtdoshimiz ­– amudaryolik Orzigul Madaminova ham oramizdagi qahramonlardandir.

9-may Xotira va qardlash kuni hamda Ikkinchi jahon urushida qozonilgan gʻalabaning 80 yilligi munosabati bilan Orzigul Madaminova qatori yuzlab vatandoshlarimiz Prezident farmoni bilan “Ikkinchi jahon urushidagi gʻalabaning 80 yilligi” esdalik yubiley medali bilan taqdirlandilar. Tuman hokimi Sobir Xoʻjametov va Respublika faollari Mangʻit shahrining Doʻstlik mahallasiga ­– onaxon yashovchi xonadonga borib, esdalik yubiley medali va bayram sovgʻalarini tantanali tarzda topshirdilar.

Mangʻit shahrining Chordara mahallasida yashovchi Bika Sultanova va Oybek nomli mahallada yashovchi Tozagul Yoʻldoshevalarga ham  mehnat fronti faxriylari sifatida yuksak ehtirom koʻrsatilib, “Ikkinchi jahon urushidagi gʻalabaning 80 yilligi” esdalik yubiley medallari va bayram sovgʻalari tantanali tarzda topshirildi.

Faxriy onaxonlar oʻz xotiralarida taʼkidlaganlaridek, Ikkinchi jahon urushi yillari butun mamlakat uchun ogʻir sinovlar davri boʻldi. Jang maydonlaridagi har bir zafar ortida front ortidagi yurtdoshlarimizning beqiyos mehnati, sabri va fidokorligi mujassam edi. Oʻzbekiston qishloq xoʻjaligi va xalq xoʻjaligi sohalarida butun yurtni oziq-ovqat, kiyim-kechak va boshqa muhim ehtiyojlar bilan taʼminlashda katta masʼuliyatni oʻz zimmasiga oldi.

Urush boshlangan ilk kunlardanoq mamlakatning barcha mehnat resurslari toʻliq safarbar etildi. Yoshlar, ayollar va keksalar qishloq xoʻjaligi ishlarining barcha jabhalarida faol ishtirok etdilar. Oʻzbekiston xalqi urush yillarida nafaqat Vatanni qoʻllab-quvvatladi, balki mehnati bilan gʻalabaga zamin yaratdi. Bu zahmatli kunlar tarixga sabr, matonat va fidoyilik timsoli sifatida muhrlanib qoldi va shubhasiz, bugungi avlod uchun u yillar davomida namuna, faxr va ilhom manbai boʻlib qoladi.

Bugun biz tinch, obod yurtda yashar ekanmiz, Ikkinchi jahon urushida jonini fido qilgan ota-bobolarimiz, mehnat frontida zahmat chekkan momolarimizning xotirasini ulugʻlab, oramizda umrguzaronlik qilayotgan faxriylarimizni eʼzozlashimiz, ularga ehtirom koʻrsatishimiz lozim. Zero xotira – abadiy, inson qadri esa muqaddasdir.