IKKINChI JAHON URUShI MEHNAT FRONTI IShTIROKChISI VALENTINA PETROVNA VA SOBIQ BAYNALMILAL JANGChI ShAVKAT SAIDBOYeVLAR “BUYuK GʻALABANING 80 YILLIGI” YuBILEY MEDALI BILAN TAQDIRLANDI

Insoniyat tarixida beadad nafrat va dahshatli xotiralar, urushni qoʻzgʻaganlarga nisbatan soʻngsiz laʼnatlar bilan eslanadigan Ikkinchi jahon urushidan keyin oradan 80-yil oʻtsa-da, uning dunyo xalqlari qalblariga solgan ogʻir asoratlari hamon ogʻriqli. Insoniyat yuragidagi fashizmga nisbatan nafrat olovi hali ham soʻngani yoʻq. Dunyo miqyosida Ikkinchi jahon urushi janggohlarida tinchlik tugʻini baland tutib, qahramonona kurash olib borgan urush faxriylari, front ortidagi ogʻir mehnat fronti ishtirokchilari safi yil sayin kamayib borayotgan boʻlsa-da, urush koʻrgan qahramon jangchilarning farzandlari, nevaralari – bugungi avlod uchun ularning fidoyilik onlariga toʻla hayot yoʻllari cheksiz hurmat va ehtirom, yorqin xotiralar timsoliga aylangan.

Ikkinchi jahon urushida qozonilgan Gʻalabaning 80 yilligi munosabati bilan butun dunyo miqyosida oʻtkazilgan tantanali tadbirlarda, shuningdek, mamlakatimizda ham bugungi kunda keksalik gashtini surayotgan urush faxriylari, ikkinchi jahon urushi davri front orti mehnat fidoyilariga davlatimiz tomonidan alohida eʼtibor va ehtirom koʻrsatilib, Prezidentimiz Farmoniga muvofiq pul mukofotlari, esdalik yubiley medallari topshirildi. Shuningdek, yaqinda bir guruh yurtdoshlarimiz Rossiya Federatsiyasi Kommunistik partiyasi markaziy qoʻmitasi tomonidan taʼsis etilgan “Buyuk Gʻalabaning 80 yilligi” esdalik medali bilan taqdirlandilar.

Mangʻit shahrining Boyovul mahallasida istiqomat qiluvchi Valentina Petrovna ayni paytda 91 yoshdalar. Bolaligi va oʻsmirligi ikkinchi jahon urushi davriga va urushdan keyingi tiklanish yillariga toʻgʻri kelgan onaxon butun ongli hayotini yosh avlod taʼlim-tarbiyasiga, ona Vatanda tinchlik va totuvlikni taʼminlashga bagʻishlagan fidoyi ustoz. Bugungi kunda faxriy ustozning shogirdlari orasida fan doktorlari, davlat va jamoat arboblari, elim, yurtim, degan fidoyi insonlar juda koʻp.

Onaxonning fidoyi mehnatlari davlatimiz tomonidan turli yillarda munosib baholanib, yuksak qadrlangan faxriy ustoz front orti mehnat frontidagi fidokorona xizmatlari uchun va fashizm ustidan qozonilgan Gʻalabaning 80 yilligi munosabati bilan Rossiya Federatsiyasi Kommunistik partiyasi markaziy qoʻmitasi tomonidan taʼsis etilgan “Buyuk Gʻalabaning 80 yilligi” esdalik medali bilan taqdirlandi.

Onaxonni tabriklash uchun uning xonadoniga tashrif buyurgan Oʻzbekiston “Veteran” faxriy jangchilar birlashmasining Qoraqalpogʻiston Respublikasi Amudaryo tuman boʻlimi rahbari Rahmatulla Hayitboyev hamda mazkur uyushma aʼzolari faxriy ustozni bayram bilan tabriklab, ezgu tilaklar izhor etdilar.

Shu kuni Rahmatulla Hayitboyev rahbarligidagi masʼullar oʻtgan asrning saksoninchi yillarida Afgʻoniston zaminidagi qonli janglarda ishtirok etgan sobiq baynalmilal jangchi Shavkat Saidboyevning xonadoniga ham tashrif buyurdilar.

Taʼlim-tarbiya sohasining faxriysi, ayni paytda farzandlari va nevaralari ardogʻida yashayotgan Shavkat Saidboyev bir yarim yil davomida, 1985-1986-yillarda qardosh Afgʻoniston zaminidagi janglarda ishtirok etdi. Afgʻonistonning Hirot shahri yaqinida amalga oshirilgan maxsus operatsiyada yelkasidan ogʻir yaralandi. Ushbu maxsus operatsiyani muvaffaqiyatli amalga oshirishdagi qahramonligi uchun Oliy qoʻmondonlik tomonidan “Jangovar xizmatlari uchun” medali bilan taqdirlandi. Qonli toʻqnashuvlarda bir necha marta ogʻir yaralanib, jarohatlari bitgach yana murosasiz, janglarda qatnashdi.

Dahshatli urush azoblarini tortgan, alal-oqibat tinch, osuda Vataniga yelkasidagi ogʻir jarohat bilan qaytgan sobiq baynalmilal jangchi Shavkat Saidboyev urush dahshatlarini oʻz tanasida his qilgan inson sifatida yoshlar bilan uchrashuvlarda mamlakatimiz mustaqilligini mustahkamlash, ona Vatanga chuqur mehr-muhabbat bilan yashash, halol mehnat qilish, bugungiday tinch-osuda zamonning qadriga yetish har bir insonning yuksak vatanparvarlik burchi toʻgʻrisida, tinchlik va doʻstlik, millatlararo totuvlikning qadri, urushning insoniyat taraqqiyotiga tamoman yot qiyofasi haqida hayotiy hikoyalar soʻzlaydi. Oʻsib kelayotgan yosh avlodni milliy-maʼnaviy qadriyatlarga sodiq boʻlishga daʼvat etadi.

Sobiq baynalmilal jangchi Shavkat Saidboyev umr yoʻldoshi Yorqinoy Shomurodova bilan ikki oʻgʻil, bir qizni el-yurt koriga munosib insonlar qilib tarbiyalab, voyaga yetkazishmoqda. Oʻz umrini millatlar doʻstligi va tinchligi, yosh avlod taʼlim-tarbiyasiga bagʻishlagan Shavkat Saidboyev Xotira va qadrlash kuni, shuningdek, fashizm ustidan qozonilgan Gʻalabaning 80 yilligi munosabati bilan Rossiya Federatsiyasi Kommunistik partiyasi markaziy qoʻmitasi tomonidan taʼsis etilgan “Buyuk Gʻalabaning 80 yilligi” esdalik medali bilan taqdirlandi.

Mukofotni topshirish marosimida Amudaryo tumani Mudofaa ishlari boʻlimi boshligʻi, mayor Shuhrat Mamatov, Oʻzbekiston Respublikasi “Veteran” faxriy jangchilar va nogironlar birlashmasi Qoraqalpogʻiston Respublikasi Amudaryo tuman boʻlimi rahbari Rahmatulla Hayitboyev hamda mazkur uyushma aʼzolari ishtirok etishdi. Marosim ishtirokchilari faxriy jangchi Shavkat Saidboyevga uzoq umr, sihat-salomatlik tiladilar.

Vaqt – oliy hakam. Oʻtayotgan umrimizning har bir lahzasida ana shu oliy hakamning muhri bor. Yomonlik ham ezgulik ham vaqtning odil muhri ostida oʻz bahosini oladi. Urushning xalqlar boshiga yogʻdirgan mislsiz talafotlari, azob-uqubatlari vaqt muhr bosgan eng chirkin davr sifatida insoniyatga mangu yot qiyofa boʻlib qolaveradi. Uni jumla bashar bir ibora bilan mangu laʼnatlayveradi: “Noming oʻchsin, urush!”

Robiya Yoʻldosheva.