Amudaryo tumanida Xalqaro xotin-qizlar kuni munosib nishonlandi
Ayolning nafosati va nazokati, vafo va sadoqati, aql-zakovati va fidoyiligi asrlar mobaynida yer yuzida hayot davomiyligi va abadiyligiga asos boʻlib keladi. Oila va jamiyat ustuni, hayotimizning fayzi va koʻrki boʻlgan xotin-qizlarni eʼzozlash, ularga hurmat va ehtirom koʻrsatish xalqimiz uchun azal-azaldan buyuk qadriyat boʻlib kelgan. Ayol bor ekan hayot goʻzal va mazmunli, xonadonlar obod va nurafshondir.
8-mart – Xalqaro xotin-qizlar kuni. Ushbu sana butun dunyo boʻylab goʻzallik va nafosat timsoli boʻlgan ayol-qizlarning bayrami sifatida keng nishonlanadi. Bayram munosabati bilan ularga har doimgidan-da ulugʻ ehtirom koʻrsatilib, eʼzozlanadi va sharaflanadi.
Sana munosabati bilan Amudaryo tumani Madaniyat boʻlimida ham katta kontsert dasturi tashkil etildi. Bayram tadbirini tuman hokimi Sobir Xoʻjametov tabrik soʻzi bilan ochib berdi. Tuman hokimi oʻz nutqida yurtimizda xotin-qizlarni har tomonlama qoʻllab-quvvatlash, onalik va bolalikni muhofaza qilish, oila mustahkamligini taʼminlash davlat siyosati darajasida ekanligi taʼkidladi, bu borada amalga oshirilayotgan islohotlar va ularning tumanimizdagi ijrosi xususida toʻxtaldi.
Taʼkidlanganidek, bugungi kunda davlatimiz rahbari tashabbusi bilan barcha sohalarda xotin-qizlarga koʻplab yangi imkoniyatlar berilmoqda. Xususan, xotin-qizlar tadbirkorligi uchun yaratilayotgan imkoniyatlardan foydalanib, tumanimizda 1000 nafardan ziyod tadbirkor ayollar faoliyat yuritib kelmoqda.
Shuningdek, “Hech kim mehr va eʼtibordan chetda qolmaydi” degan ezgu tamoyil asosida 2024-yilda “Ayollar daftari”ga kiritilgan ijtimoiy himoyaga muhtoj 5 ming 600 nafar xotin-qizlarga turli yordamlar koʻrsatilib, “Ayollar daftari”dan chiqarildi. 4 nafar ayol-qizlar uy-joy bilan taʼminlandi, 8 nafar ehtiyojmand xotin-qizlarning uy-joyi homiylik hisobidan taʼmirlab berildi. Boquvchisini yoʻqotgan, yashash sharoiti ogʻir deb topilgan 15 nafar xotin-qizlarning uy-joy ijarasi uchun kompensatsiya toʻlab berildi. Nogironligi boʻlgan 2 nafar ayolning jarrohlik amaliyoti uchun “Xotin-qizlarni qoʻllab-quvvatlash” maqsadli jamgʻarmasi hisobidan mablagʻ ajratib berildi.
Qolaversa, Oila va xotin qizlar qoʻmitasining tavsiyanomasi asosida tumanimizdan 10 nafar xotin-qizlar Oliy taʼlim muassasalariga davlat granti asosida talabalikka qabul qilindi. “Ayollar daftari” jamgʻarmasidan 2 nafar, tuman hokimligi hisobidan esa 13 nafar oilaviy sharoitlari ogʻir xotin-qizlarning shartnoma pullari oliy taʼlim muassasalari toʻlab berildi.
Tuman hokimining tabrik soʻzidan keyin turli sohalarda samarali faoliyat olib borayotgan ayol-qizlarga tashakkurnoma hamda bayram sovgʻalari topshirildi. Bayram tadbiri tuman Madaniyat boʻlimi tomonidan tayyorlangan bir-biridan ajoyib chiqishlar, betakror kuy-qoʻshiqlar bilan davom etdi. Tumanimizning umidli xonandalari goʻzallik, sevgi, doʻstlik, bahor, ona va ayolni madh etuvchi kuy-qoʻshiqlar bilan barcha tadbir ishtirokchilariga yuqori bayramona kayfiyat bagʻishladilar.
Taʼkidlash joizki, ushbu bayram goʻzal va betakror yurtimizga bahor nafasi kirib kelganidan darak beradi. Qutlugʻ sanada xotin-qizlarga ehtirom koʻrsatish anʼanasi yil sayin umumdavlat va umumjamiyat ahamiyatiga ega boʻlib, yuqori maqom darajasiga koʻtarilmoqda.
Ayol azaldan mehr-shafqat va sadoqat timsoli boʻlib kelgan. Inson, oila, ayol tushunchalarini bir-biridan ajralgan holda tasavvur etib boʻlmaydi. Oilani ham, jamiyatni ham birlashtirib, unga fayz-u baraka kiritadigan xonadonlarimizni mehr-muhabbat, nafosat, ezgulik nuri bilan munavvar qiladigan zotlar ham aslida moʻʼtabar onalarimiz, munis opa-singillarimizdir. Ulugʻ donishmandlar Vatanga eng munosib taʼrif izlaganda, uni Ona siymosiga qiyos etganlarida ham katta maʼno bor.
Fursatdan foydalanib, barcha dilbar ayol-qizlarni, onaxonlarimiz, opa-singillarimizni ezgulik va goʻzallik bayrami – 8-mart – Xalqaro xotin-qizlar kuni bilan samimiy tabriklaymiz, oilaviy xotirjamlik, xonadonlariga tinchlik, fayz-u baraka tilaymiz! Doimo xalqimiz, Vatanimizning yuksak mehri va ardogʻida, yaqinlaringizning eʼzozida yashang, aziz va muhtarama ayollar!
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
