Tashabbuskor rahbar va ahil jamoaning yutuqlari

Inson borki, umri davomida yaxshi sharoitlarda yashash va ishlashni orzu qiladi, doimo oʻzi uchun ana shunday toʻkislikni yaratish ishtiyoqi bilan yashaydi. Agar u rahbar boʻlsa, bu boradagi masʼuliyati yanada oshadi. Taʼbir joiz boʻlsa, tumanimizdagi 50-sonli umumtaʼlim maktabi direktori Alisher Eshniyozov 2014-yilda zimmasiga mazkur taʼlim-tarbiya muassasasi rahbarligini qabul qilib olganida, birinchi galda nafaqat oʻzi, balki butun pedagogika jamoasi uchun zamon talablari darajasidagi mehnat sharoitini yaratish, oʻsib kelayotgan yosh avlodning har tomonlama yetuk, mustaqil fikrlovchi insonlar boʻlib voyaga yetishlarini taʼminlashga qaratilgan chora-tadbirlarni amalga oshirish zarurligini his etdi. Chunki 1971-yilda, moslashtirilgan binoda oʻz faoliyatini boshlagan va 220 oʻquvchi oʻringa moʻljallangan maktabda taʼlim-tarbiya ishlari 2 navbatda olib borilar, aksariyat sinfxonalari jiddiy taʼmirga muhtoj edi. Shu bois, maktab direktorining shaxsiy ish rejasidan hech boʻlmaganda muassasa binosini joriy taʼmirlash borasidagi qaydlar joy oldi.

Amudaryo tumani hokimligi, tuman Maktabgacha va maktab taʼlimi boʻlimi rahbariyatining qoʻllab-quvvatlovi bilan 2018-yilda maktab binosi 510 mln. soʻmlik mahalliy byudjet mablagʻi hisobidan joriy taʼmirlanib, oʻqituvchi va oʻquvchilar uchun zarur shart-sharoitlar yaratildi. Natijada qobiliyatli, intiluvchan oʻquvchilarning chuqur bilim olishlarini taʼminlashga qaratilgan fanlar boʻyicha toʻgaraklar fao­liya­ti yoʻlga qoʻyilib, tabiiy fanlardan laboratoriya mashgʻulotlarini olib borishdagi muammolarga barham berildi.

Shunday boʻlsa-da, maktabda faollar zali yoʻqligi, mashgʻulotlar hamon 2 navbatda olib borilayotgani jamoani qiynab keladi. Lekin maktab pedagogika jamoasi oʻrtasida ahillik va maʼnaviy sogʻlom muhitning mavjudligi, qolaversa, oʻqituvchilarning oʻz ustlarida tinimsiz oʻqib-izlanishlari tufayli qisqa vaqt ichida muassasa tumandagi ilgʻor maktablar qatoridan joy oldi.

Ayni paytda muassasada 400 nafardan ziyod oʻquvchi-yoshlar taʼlim-tarbiya olishmoqda. Biri-biriga hamkor 39 nafar pedagog­larning 5 nafari oliy, 13 nafari 1-toifali, 11 nafari 2-toifali, 10 nafari mutaxassis toifasiga ega izlanuvchan va bilimdon oʻqituvchilardir.

Milliy sertifikat sohibalari boʻlgan ona tili va adabiyot fani oʻqituvchisi Dildora Davlatboyeva, boshlangʻich sinf oʻqituvchilari Guliruxsor Rahimboyeva hamda Gulnoza Rahimovalarning har bir darsi oʻquvchi-yoshlar uchun qiziqarli taassurotlarga boy tarzda oʻtadi.

Ayniqsa, Xalqaro S1 sertifikati sohibasi, rus tili fani oʻqituvchisi Feruza Ajmagʻambetova, S1 va V2 darajadagi sertifikat sohibi, oʻz mutaxassisligining bilimdoni, ingliz tili oʻqituvchisi Javlonbek Oʻrozboyev, S1 darajadagi sertifikat egasi, matematika fani oʻqituvchisi Shoira Erkaboyeva, S1 darajadagi sertifikat sohibasi, informatika fani oʻqituvchisi Gulsara Kaljanovalarning darslari va toʻgarak­lar boʻyicha mashgʻulotlari oʻquvchi-yoshlarning oʻzlari tanlagan yoʻnalishlar boʻ­yicha puxta bilim olishlarini taʼminlamoqda.

Muvaffaqiyatlarga erishish yoʻlini kimdir qattiqqoʻllikda, yana kimdir ustozning qatʼiyatida, deb biladi. Balki shundaydir. 50-sonli umumtaʼlim maktabi pedagogika jamoa­si uchun esa taʼlim-tarbiya sohasida muvaffaqiyatlar sari eltuvchi yoʻl – bu pedagogik jamoaning ahilligi va zamon bilan hamnafas ish yuritish, qolaversa, oʻqituvchi bilan oʻquvchi oʻrtasida yaratilgan samimiy, doʻstona munosabat asosiga qurilgan oʻziga xos ish uslubida. Aynan ana shunday maʼnan sogʻlom muhitda faoliyat yuritayotgan oʻqituvchilar taʼlimini olgan yoshlar esa haqiqatdan ham bilimga chanqoq, iqtidorli va intiluvchan boʻlishadi.

50-sonli maktab oʻquvchilari orasida bunday bilimdon yoshlar juda koʻp. Xususan, 2023-2024 oʻquv yilida maktabning 11-sinfini bitirgan 25 nafar yoshlardan 18 nafari Oʻzbekistondagi nufuzli oliy taʼlim muassasalarining talabalari boʻlishdi. Qolgan 7 nafar bitiruvchilar ijtimoiy foydali ish bilan shugʻullanish orqali oʻz ustlarida ishlashda davom etib, tanlagan yoʻnalishlari boʻyicha OTMga kirish uchun tayyorgarlik koʻrishmoqda.

2024-2025 oʻquv yilida esa iqtidorli oʻquvchilar oʻrtasida oʻtkazilgan asosiy fanlar olimpiadasida 10-sinf oʻquvchisi Mashhura Boltaboyeva kimyo fanidan 1-oʻrinni, 9-sinf oʻquvchisi Mashhuraxon Ha­yitboyeva ham kimyo fanidan 3-oʻrinni, 9-sinf oʻquvchisi Azamat Oʻrozimbetov ingliz tilidan, 11-sinf oʻquvchisi Musabek Toʻramuratov geografiya fanidan 3-oʻrinlarni egalladilar.

Maktab pedagogika jamoa­sining yagona, ezgu maqsad – yosh avlodni ona Vatanga, istiqlol gʻoyalariga, milliy-maʼnaviy qadriyatlarga yuksak ehtirom va sadoqat ruhida tarbiyalashdek sharafli vazifani ado etish yoʻlidagi ahilligi tahsinga munosib. Ana shu ahillik va oʻzaro birdamlik tufayli bugungi kunda mazkur muassasa tumandagi maktablar orasida taʼlim-tarbiya ish­lari yaxshi yoʻlga qoʻyil­gan maktab sifatida “yashil” toifaga kiritilgan.

Muassasada obodonlashtirish va koʻkalamzorlashtirish ishlariga ham alohida eʼtibor qaratiladi. Yil sayin koʻkalamzor va tobora obod goʻshaga aylanib borayotgan maktab hovlisiga birgina 2024-yilning kuz faslida “Yashil makon” umummilliy loyihasi doirasida 70 tup mevali, 155 tup manzarali, jami 225 tup daraxt koʻchatlari oʻtqazildi. Ekilgan har bir tup koʻchatning tuproqqa ildiz qoʻyib, unib-oʻsib ketishi uchun maktabning texnik xodimlari masʼul qilib qoʻyildi. Obodon va koʻkalamzor goʻshada yoshlarga taʼlim-tarbiya berish pedagogika jamoasi uchun qanchalik koʻtarinki kayfiyat bagʻishlasa, oʻquvchilarning musaffo havodan bahramand boʻlib taʼlim olishlari esa ularni yanada yaxshiroq oʻqishga ragʻbatlantirishi tabiiy.

Shundanmi, maktabni turli yillarda bitirib, mustaqil hayotga qadam qoʻygan sobiq oʻquvchilar orasida ilm-fan, sogʻlikni saqlash, agrar va sanoat, qurilish sohalari fido­yi­lari, davlat va jamoat arboblari, Armiya zobitlari ham bor. Ular faxr bilan “Biz 50-sonli maktabda oʻqiganmiz”, – deya gʻururlanishadi.

Maktab pedagogika jamoasi 2024-2025 oʻquv yilini yanada ezgu rejalar bilan boshladilar. Ayni paytda oʻquv yilining 3-choragini bilimdon va salohiyatli, tashabbuskor ustoz Alisher Eshniyozov rahbarligida “Oʻqish va izlanish – kamolot sari yoʻl!” shiori ostida davom ettirayotgan maktab pedagogika jamoasiga hamda mazkur taʼlim dargohining ilm-u ziyoga chanqoq oʻquvchilariga yanada ezgu orzular va yutuqlar yor boʻlishini tilaymiz!

ROBIYa YOʻLDOShEVA.