51-sonli davlat maktabgacha taʼlim tashkilotida seminar boʻlib oʻtdi
Bolani toʻgʻri tarbiyalashda, avvalo, u bilan toʻgʻri muloqot qilish, bola “tili”ni tushunish muhim ahamiyat kasb etadi. Shuningdek, kichkintoylarga taʼlim-tarbiya berishda ularni sevish, ularga chinakam mehr berish ham foydadan holi boʻlmaydi.
Maʼlumki, bugunning kichkintoylarini tarbiyalab voyaga yetkazish, maktab taʼlimiga yoʻnaltirish har qachongidan ham masʼuliyatli vazifa hisoblanadi. Boisi, bugungi globallashuv asrida dunyoga kelgan bolakayni xoʻrozqand bilan aldab, “seni laylak olib kelgan, uxlamasang qaytadan laylaklarga berib yuboraman…” singari choʻpchaklarga ishontirib boʻlmaydi.
Ha, bugungi yosh avlod ziyrak, bilagʻon, zehni oʻtkir. Ularni tarbiyalashda ota-onadan ham, bogʻchadagi tarbiyachilardan ham oʻz ustida ishlash, taʼlim-tarbiyaning zamonaviy, innovatsion metodlarini bilish va oʻrinli qoʻllay olish, degan koʻnikmalar talab etiladi. Bunda, maktabgacha taʼlim tashkilotlarida muntazam ravishda oʻtkazilib kelinayotgan seminarlarning oʻz oʻrni bor.
Yaqinda Amudaryo tumani Maktabgacha va maktab taʼlimi boʻlimiga qarashli 51-sonli davlat maktabgacha taʼlim tashkilotida maktabgacha taʼlim sifatini yanada yaxshilash va tarbiyachilarning kasbiy mahoratini oshirish maqsadida navbatdagi seminar tashkil etildi. Unda tumandagi davlat maktabgacha taʼlim tashkilotlari direktorlari, direktor oʻrinbosarlari va tarbiyachilar ishtirok etdilar.
Seminarni tashkil qilishdan asosiy maqsad – tarbiyachilar oʻrtasida tajriba almashishni rivojlantirish, bolalarning taʼlim-tarbiyasida zamonaviy usullarni amaliyotga tatbiq etishdir.
Jarayon davomida ishtirokchilar tayyorlov, katta va kichik guruhlarda tarbiyachilarning ochiq mashgʻulot jarayonlarida ishtirok etdilar. Tarbiyachilarning bolalar bilan ishlash uslublari, mashgʻulot jarayonidagi pedagogik yondashuvlari muhokama qilindi. Shuningdek, seminar mobaynida tarbiyachilar oʻzaro tajriba almashish imkoniyatiga ega boʻlib, ilgʻor pedagogik usullarni amaliyotga tatbiq etish boʻyicha fikr almashdilar.
Tahlillar natijasida tarbiyachilarning oʻquv jarayonida qoʻllayotgan innovatsion usullari yuqori baholandi. Seminarning asosiy qismi tarbiyachilarning amaliy faoliyatini baholash va ularning ishlash sifati boʻyicha fikr almashishga bagʻishlandi. Mutaxassislar tomonidan tarbiyachilarning innovatsion usullarni qoʻllashdagi yutuqlari eʼtirof etildi.
Xususan, mashgʻulotlarda interfaol metodlardan foydalanish, bolalarning qiziqishini oshirish uchun oʻyinli yondashuvlarni tatbiq etish, tarbiyaviy jarayonda vizual va audio materiallardan samarali foydalanish kabi jihatlar yuqori baholandi. Shu bilan birga, ayrim kamchiliklar ham qayd etilib, ularni bartaraf etish boʻyicha aniq taklif va tavsiyalar bildirildi.
Bunday seminarlar tarbiyachilar orasida oʻzaro tajriba almashish, ularning malakasini oshirish va maktabgacha taʼlim sifatini yanada yaxshilashga xizmat qiladi. Shuningdek, soha masʼullari tomonidan kelgusida ham bunday tadbirlarni muntazam ravishda oʻtkazish rejalashtirilgan.
Aziza Madrahimova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
