Maktabgacha taʼlimda innovatsion usullar samaradorlikni oshiradi

Maktabgacha taʼlim tizimini takomillashtirish mamlakatimizda ustuvor yoʻnalishlardan biri boʻlib, sohaga oid islohotlar natijasida qamrov darajasi yildan yilga ortmoqda. Mutasaddi idoralar tomonidan tashkil etilayotgan seminar va davra suhbatlari esa tarbiyachilarning kasbiy mahorati oshishiga xizmat qilyapti. Shu kabi tadbirlardan biri Amudaryo tumani Maktabgacha va maktab taʼlimi boʻlimining rejasiga muvofiq 27-fevral kuni tumanining Yuqori qishloq mahallasida joylashgan 52-sonli maktabgacha taʼlim tashkilotida ham boʻlib oʻtdi.

Seminarda boʻlim bosh metodisti Hulkar Bobojonova, 52-sonli maktabgacha taʼlim tashkiloti rahbari Inobatxon Tajiboyeva, direktor oʻrinbosari Shahlo Oʻrozboyeva hamda ushbu muassasaning tarbiyachilari ishtirok etishdi. Shuningdek, Qilichboy ovulidagi maktabgacha taʼlim muassasalari rahbarlari va tarbiyachilari ham seminarga taklif qilindi.

Seminarning asosiy maqsadi – bolalarni har tomonlama rivojlantirish uchun qulay shart-sharoitlar yaratish hamda taʼlim jarayonini yanada samarali tashkil etish yoʻllarini muhokama qilishdan iborat boʻldi. Bundan tashqari, tarbiyachilarga davlat talablari va davlat oʻquv dasturiga asoslangan yangi metodikalar boʻyicha ham amaliy koʻnikmalar berildi.

Seminar doirasida 52-sonli maktabgacha taʼlim tashkilotining 4 ta guruhida ochiq mashgʻulotlar oʻtkazilib, tarbiyachilar “Kitob bilan doʻstlashamiz” mavzusida interaktiv darslar olib borishdi.

Mashgʻulotlar jarayonida kichik guruh tarbiyachisi Gulbodom Qurbonboyeva tomonidan bolalarga kitob haqida qiziqarli maʼlumotlar taqdim etildi va mavzuni oʻzida aks ettirgan videoroliklar namoyish qilindi. Oʻrta guruh tarbiyachisi Sevara Tulovboyeva koʻrgazmali qurollar yordamida bolalarning kitobga boʻlgan qiziqishini oshirib, sheʼr, topishmoq va maqollar orqali mavzuni boyitdi. Katta guruh tarbiyachisi Muazzam Davlatboyevaning mashgʻulotlari ham innovatsion uslublarda olib borildi, jumladan, bolajonlar uchun qiziqarli videolavhalar namoyish qilinib, diqqatni jalb qiluvchi tarbiyaviy materiallardan foydalanildi. Tayyorlov guruhi tarbiyachisi Tursunoy Xalillayeva ham mavzuni bolalar uchun qiziqarli tarzda yoritdi.

Ushbu mashgʻulotlarda bolalarning jismoniy, nutqiy va bilish jarayonlarini rivojlantirish, shuningdek, ularning ijtimoiy-emotsional hamda ijodiy qobiliyatlarini shakllantirishga alohida urgʻu berildi. Tajriba almashish imkoniyati nafaqat tarbiyachilarning kasbiy mahoratini oshirishga, balki taʼlim jarayonini yanada samarali tashkil etishga xizmat qildi.

Seminarning muhim jihatlaridan biri milliy qadriyatlarni targʻib etishga qaratilgan tashabbus boʻldi. Mashgʻulotlarda 52-sonli maktabgacha taʼlim tashkiloti tarbiyachilari va tarbiyalanuvchilari milliy atlas va adras liboslarda ishtirok etishdi. Bundan koʻzlangan maqsad esa bolalarni milliy anʼanalarga hurmat ruhida tarbiyalashdir.

Seminar yakunida ishtirokchilar oʻz tajribalari asosida fikr-mulohazalar almashdi. Kuzatuvchilar tomonidan tarbiyachilarning pedagogik mahorati, mashgʻulotlarda qoʻllangan samarali usul va vositalar atroflicha muhokama qilindi. Tadbir ishtirokchilari bu kabi seminarlar tarbiyachilar uchun qimmatli tajriba maydoni boʻlib xizmat qilishini alohida taʼkidlashdi.

Maʼlumot oʻrnida: mazkur muassasa 2023-yil mart oyida ish boshlagan boʻlib, muassasa binosi 120-oʻringa moʻljallangan. Ayni paytda toʻrtta guruhda 30 nafardan tarbiyalanuvchi taʼlim olmoqda.

Amudaryo tumani Maktabgacha va maktab taʼlimi boʻlimining rejasiga muvofiq tashkil etilgan ushbu seminar bolalarning taʼlim-tarbiyasini yuksaltirishda yangi metodik yondashuvlarni qoʻllash, zamonaviy texnologiyalar va milliy qadriyatlarni uygʻunlashtirish borasida muhim tajriba maktabi boʻldi.

Inobatxon Tajiboyeva, 52-sonli maktabgacha taʼlim tashkiloti direktori.