Keksa avlod vakillarining bilim va tajribasi oilalar farovonligiga xizmat qiladi
Jamiyatning barqaror rivojlanishi hamda maʼnaviy yetuk avlod tarbiyasida tajribali nuroniylarning oʻrni beqiyos. Ular ortda qolgan hayot yoʻllari davomida toʻplagan bilim va tajribalarini yoshlar bilan boʻlishib, ularning kelajakda toʻgʻri yoʻldan borishlariga yoʻnalish beradilar. Shu sababli yurtimizda uch avlod oʻrtasidagi uzviy bogʻliqlikni mustahkamlash, yoshlarga maʼnaviy va iqtisodiy yoʻnalishlarda maslahat berish maqsadida koʻplab loyihalar amalga oshirilmoqda.
Shu jihatdan, 19-fevral kuni 55-sonli maktabda tashkil etilgan "Uch avlod uchrashuvi" tarzidagi maʼnaviy-maʼrifiy tadbir muhim ahamiyat kasb etdi. Ushbu tadbir nuroniylarning boy hayotiy tajribalaridan kelib chiqib, yosh avlodni tarbiyalash, ularga maʼnaviy yoʻl koʻrsatish, iqtisodiy mustaqillik sari yetaklash kabi dolzarb masalalarni muhokama qilishga bagʻishlandi.
Mazkur uchrashuvda Oʻzbekiston Respublikasi "Nuroniy" jamgʻarmasi boʻlim boshligʻi Majid Umarov, jamgʻarmaning Qoraqalpogʻiston Respublikasi boʻlimi boshligʻi Tursunbay Abdijabbarov, jamgʻarmaning tuman boʻlimi raisi Bekman Allabergenov, mahallalar va ovullardan kelgan ijtimoiy faol nuroniylar, ota-onalar hamda oʻquvchi yoshlar ishtirok etishdi.
Tadbirni 55-sonli maktab direktori Davron Arikov kirish soʻzi bilan ochib, mehmonlarni tanishtirdi va uchrashuvning dolzarbligi xususida fikr-mulohazalarini bildirdi. Uchrashuv davomida nuroniylar jamiyatda sogʻlom ijtimoiy-maʼnaviy muhitni shakllantirish, mahalla institutini yanada rivojlantirish hamda oilalar bilan ishlash tizimini yangi bosqichga olib chiqish masalalarini atroflicha muhokama qilishdi.
Tadbir davomida asosiy eʼtibor nuroniylarning bilim va tajribalaridan foydalanib, jamiyatdagi muammolarni hal qilish, ayniqsa, oilalarni kambagʻallikdan chiqarishga xizmat qiluvchi dasturlarni samarali amalga oshirishga qaratildi. Nuroniylar yoshlarga oila mustahkamligi, iqtisodiy barqarorlik va tadbirkorlikni rivojlantirish borasida qimmatli maslahatlar berishdi.
Uchrashuv davomida "Bir nuroniy – oʻn yoshga masʼul", "Nuroniy har bir oilaga masʼul" hamda "Kambagʻallikdan farovonlik sari" dasturlarining ahamiyati alohida taʼkidlandi. Ushbu tashabbuslar orqali yoshlarni kasb-hunar oʻrganishga yoʻnaltirish, ularning iqtisodiy mustaqilligini taʼminlash boʻyicha aniq rejalar belgilab olindi.
Nuroniylar oilaviy tadbirkorlik, hunarmandchilik, kichik biznes va dehqonchilikni rivojlantirish orqali oilalarning moliyaviy holatini yaxshilash masalasiga alohida eʼtibor qaratishdi. Ular oʻz hayotiy tajribalaridan kelib chiqib, kichik biznesni qanday yoʻlga qoʻyish, jamiyatda tadbirkorlik muhitini rivojlantirish boʻyicha yoshlarga yoʻnalish berishdi.
Shuningdek, mahallalarda xavfsiz muhit yaratish, huquqbuzarliklarning oldini olish tizimini samarali yoʻlga qoʻyish borasida ham takliflar bildirildi. Nuroniylarning yosh avlod tarbiyasidagi oʻrni va ijtimoiy birdamlikni oshirishdagi hissasi alohida taʼkidlandi.
Tadbir yakunida Oʻzbekiston Respublikasi "Nuroniy" jamgʻarmasi tomonidan ijtimoiy faol nuroniylarga esdalik sovgʻalari topshirildi. Shu kuni tumanning Qilichboy mavzesidagi Ayokchi mahalla fuqarolar yigʻinida tashkil etilgan "Otalar choyxonasi"da nuroniylar bilan davra suhbati ham oʻtkazildi.
Bu kabi uchrashuvlar jamiyatning barqarorligini taʼminlashda, yoshlarni iqtisodiy va maʼnaviy jihatdan yetuk shaxs sifatida shakllantirishda muhim oʻrin tutadi. Yoshlar nuroniylarning tajribasidan oʻrganib, oʻz kelajagiga mustahkam poydevor yarata oladilar. Tadbir davomida ilgari surilgan gʻoyalar yoshlarga nafaqat iqtisodiy barqarorlikka erishish, balki yetuk inson sifatida shakllanish imkoniyatini ham beradi.
Ushbu uchrashuv shuni koʻrsatdiki, uch avlod oʻrtasidagi aloqalarni mustahkamlash va oʻzaro tajriba almashish jamiyat rivoji uchun muhim omildir. Bu kabi tadbirlarning keng koʻlamda tashkil etilishi yoshlarga toʻgʻri yoʻl koʻrsatishda muhim ahamiyat kasb etishi shubhasiz.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
