Oʻsmirlar oʻrtasida sportning kurash turi boʻyicha musobaqa tashkil etildi

Oʻzbekiston azaldan kurashchi polvonlar yurti sanaladi. Ota-bobolarimiz kurash gilamini or-nomus timsoli deb bilishgan. Kurash nafaqat jismoniy kuch-qudratni namoyon etuvchi sport turi, balki halollik, mardlik va adolat ramzi hamdir. Bugungi kunda kurash zamonaviy sport maydonlarida oʻz oʻrnini mustahkamlab, jahon miqyosida eʼtirof etilmoqda. Kurash xalqaro musobaqalarda alohida sport turi sifatida tan olinib, Osiyo oʻyinlaridan ham munosib oʻrin egalladi. Jahon polvonlari bugungi kunda “oʻrta”, “taʼzim”, “kurash”, “halol”, “dakki”, “tanbeh”, “gʻirrom” kabi oʻzbek soʻzlaridan foydalanib, kurash maydonlarida bellashmoqda.

Davlat rahbarining 2024-yil 21-dekabr kungi “Kurash milliy sport turini rivojlantirish va ommalashtirishni yangi bosqichga olib chiqish chora-tadbirlari toʻgʻrisida”gi Qarori mamlakatimizda ushbu sport turiga boʻlgan eʼtiborning naqadar yuksak ekanini yana bir bor isbotladi. Ushbu Qaror bilan kurash sportining bolalar va oʻsmirlar orasida keng targʻib etilishi, yosh avlodning jismoniy tarbiya va sport bilan muntazam shugʻullanishi uchun barcha zarur sharoitlar yaratilmoqda. Bu esa jamiyatda sogʻlom turmush tarzini shakllantirish va yoshlarni vatanparvarlik ruhida tarbiyalashga xizmat qilmoqda.

Mamlakatimizda kurash sportini yanada ommalashtirish maqsadida hududlarda turli yosh toifalari oʻrtasida sport musobaqalari oʻtkazilmoqda. Shunday musobaqalardan biri 15-fevral kuni Amudaryo tumani sport maktabida tashkil etildi. “Biz – giyohvandlikka qarshimiz” shiori ostida oʻtkazilgan mazkur musobaqada oʻsmir yoshdagi yigitlar va qizlar oʻzaro kuch sinashdi.

Musobaqaga Nukus shahri, Shoʻmanay, Xoʻjayli va Beruniy tumanlaridan 200 nafarga yaqin yosh sportchilar tashrif buyurdi. Bellashuvlar qizgʻin va murosasiz kechdi. Ishtirokchilar Xalqaro Kurash Federatsiyasi qoidalariga muvofiq kurash olib bordilar. Dastlab qizlar oʻrtasidagi bahslar oʻtkazildi. Bugungi kunda ayol-qizlarimizning ham kurash sportiga qiziqishi ortib borayotgani quvonarli holat. Shundan soʻng yigitlar ham oʻz kuch va mahoratlarini gilamda namoyish etdilar.

Har bir sportchining maqsadi nafaqat musobaqalarda gʻolib boʻlish, balki milliy anʼanalarimizga sodiq qolgan holda, halollik va adolat tamoyillariga amal qilishdir. Kurashning asosiy mezonlari aynan shu tamoyillarga asoslangani uning ahamiyatini yanada oshiradi. 

Musobaqada oʻz vazn toifalarida faxrli oʻrinlarni egallagan sportchilarga Amudaryo tumani sport maktabi tomonidan diplom va medallar tantanali ravishda topshirildi. Musobaqalar yakuniga koʻra amudaryolik kurashchilar umumjamoa hisobida 1-oʻrinni qoʻlga kiritdi. Musobaqaga Zulhijja Xudoyorova bosh hakamlik qilib, ishtirokchilarning kurashga boʻlgan ishtiyoqini yuqori baholadi.

Kurash nafaqat milliy sport turi, balki xalqimizning maʼnaviy qadriyatlaridan biri sifatida ham eʼtirof etiladi. Davlatimiz tomonidan ushbu sport turini rivojlantirishga qaratilgan chora-tadbirlar kelgusida yangi chempionlar yetishib chiqishiga va kurashning xalqaro miqyosda yanada ommalashishiga xizmat qiladi.

Shohista Shomurodova, QDU 3-bosqich talabasi, tahririyat amaliyotchisi.