Ўсмирлар ўртасида спортнинг кураш тури бўйича мусобақа ташкил этилди

Ўзбекистон азалдан курашчи полвонлар юрти саналади. Ота-боболаримиз кураш гиламини ор-номус тимсоли деб билишган. Кураш нафақат жисмоний куч-қудратни намоён этувчи спорт тури, балки ҳалоллик, мардлик ва адолат рамзи ҳамдир. Бугунги кунда кураш замонавий спорт майдонларида ўз ўрнини мустаҳкамлаб, жаҳон миқёсида эътироф этилмоқда. Кураш халқаро мусобақаларда алоҳида спорт тури сифатида тан олиниб, Осиё ўйинларидан ҳам муносиб ўрин эгаллади. Жаҳон полвонлари бугунги кунда “ўрта”, “таъзим”, “кураш”, “ҳалол”, “дакки”, “танбеҳ”, “ғирром” каби ўзбек сўзларидан фойдаланиб, кураш майдонларида беллашмоқда.

Давлат раҳбарининг 2024 йил 21 декабрь кунги “Кураш миллий спорт турини ривожлантириш ва оммалаштиришни янги босқичга олиб чиқиш чора-тадбирлари тўғрисида”ги Қарори мамлакатимизда ушбу спорт турига бўлган эътиборнинг нақадар юксак эканини яна бир бор исботлади. Ушбу Қарор билан кураш спортининг болалар ва ўсмирлар орасида кенг тарғиб этилиши, ёш авлоднинг жисмоний тарбия ва спорт билан мунтазам шуғулланиши учун барча зарур шароитлар яратилмоқда. Бу эса жамиятда соғлом турмуш тарзини шакллантириш ва ёшларни ватанпарварлик руҳида тарбиялашга хизмат қилмоқда.

Мамлакатимизда кураш спортини янада оммалаштириш мақсадида ҳудудларда турли ёш тоифалари ўртасида спорт мусобақалари ўтказилмоқда. Шундай мусобақалардан бири 15 февраль куни Амударё тумани спорт мактабида ташкил этилди. “Биз – гиёҳвандликка қаршимиз” шиори остида ўтказилган мазкур мусобақада ўсмир ёшдаги йигитлар ва қизлар ўзаро куч синашди.

Мусобақага Нукус шаҳри, Шўманай, Хўжайли ва Беруний туманларидан 200 нафарга яқин ёш спортчилар ташриф буюрди. Беллашувлар қизғин ва муросасиз кечди. Иштирокчилар Халқаро Кураш Федерацияси қоидаларига мувофиқ кураш олиб бордилар. Дастлаб қизлар ўртасидаги баҳслар ўтказилди. Бугунги кунда аёл-қизларимизнинг ҳам кураш спортига қизиқиши ортиб бораётгани қувонарли ҳолат. Шундан сўнг йигитлар ҳам ўз куч ва маҳоратларини гиламда намойиш этдилар.

Ҳар бир спортчининг мақсади нафақат мусобақаларда ғолиб бўлиш, балки миллий анъаналаримизга содиқ қолган ҳолда, ҳалоллик ва адолат тамойилларига амал қилишдир. Курашнинг асосий мезонлари айнан шу тамойилларга асослангани унинг аҳамиятини янада оширади. 

Мусобақада ўз вазн тоифаларида фахрли ўринларни эгаллаган спортчиларга Амударё тумани спорт мактаби томонидан диплом ва медаллар тантанали равишда топширилди. Мусобақалар якунига кўра амударёлик курашчилар умумжамоа ҳисобида 1-ўринни қўлга киритди. Мусобақага Зулҳижжа Худоёрова бош ҳакамлик қилиб, иштирокчиларнинг курашга бўлган иштиёқини юқори баҳолади.

Кураш нафақат миллий спорт тури, балки халқимизнинг маънавий қадриятларидан бири сифатида ҳам эътироф этилади. Давлатимиз томонидан ушбу спорт турини ривожлантиришга қаратилган чора-тадбирлар келгусида янги чемпионлар етишиб чиқишига ва курашнинг халқаро миқёсда янада оммалашишига хизмат қилади.

Шоҳиста Шомуродова, ҚДУ 3-босқич талабаси, таҳририят амалиётчиси.