7-8-sinf oʻquvchilari oʻrtasida Al Xorazmiy nomidagi aniq va tabiiy fanlar olimpiadasining tuman bosqichi oʻtkazildi

Maʼlumki, fanlar olimpiadasi oʻquvchining oʻz ustida ishlashiga undaydigan, bilim va salohiyatni sinovdan oʻtkazadigan, eng kuchli bilim egalarini aniqlaydigan muhim bellashuvdir. Fanlar olimpiadasida oʻzi qiziqqan fan boʻyicha ishtirok etgan aksariyat oʻquvchi yoshlar esa kelajakda aynan oʻsha fan boʻyicha oliy taʼlim muassasalari yoʻnalishlariga hujjat topshiradilar. Demak, mazkur bellashuvning yana bir ahamiyatli tomoni oʻquvchining kelajakdagi kasbini belgilab, maʼlum yoʻnalish tomon ixtisoslashuviga turtki berishida. Yaqinda Amudaryo tumanidagi 1-sonli umumiy oʻrta taʼlim maktabida 2024-2025-oʻquv yilida umumiy oʻrta taʼlim maktablarining 7-8-sinf oʻquvchilari oʻrtasida Al Xorazmiy nomidagi aniq va tabiiy fanlar olimpiadasining tuman bosqichi boʻlib oʻtdi.

Oʻzbekiston Respublikasi Vazirlar Mahkamasining 2021-yil 9-sentyabrdagi “Iqtidorli oʻquvchilar oʻrtasida fan olimpiadalarini oʻtkazish tizimini joriy qilish va xorijiy tillarni oʻqitish boʻyicha eng yaxshi maktabni aniqlash toʻgʻrisida”gi 562-sonli qarorida umumiy oʻrta taʼlim maktablari oʻquvchilari oʻrtasida mahalliy va xalqaro fan olimpiadalarini tashkil etish, oʻquvchilarning xalqaro olimpiadalardagi ishtirokini taʼminlash tartibi belgilangan.

Qarorda keltirilgan topshiriqlar ijrosini taʼminlash va oʻquvchilarning quyi sinflardan boshlab fan olimpiadalariga tayyorgarlik koʻrishiga zamin yaratish maqsadida tashkil qilingan Al Xorazmiy nomidagi aniq fanlar olimpiadasida – matematika fanidan, tabiiy fanlar olimpiadasida esa kimyo, biologiya, fizika fanlaridan kompleks tarzda topshiriqlar taqdim qilinadi.

Olimpiadaga tumanimizdagi 86 ta umumiy oʻrta taʼlim maktablarining va ixtisoslashtirilgan maktabning 7-8-sinf oʻquvchilari ishtirok etishdi. Bunda, aniq fanlar yoʻnalishida 210 nafarga yaqin, tabiiy fanlar yoʻnalishida 200 nafarga yaqin iqtidorli oʻquvchilar qatnashdilar.

Olimpiadaning tuman bosqichi ochilish marosimida Qoraqalpogʻiston Respublikasi Maktabgacha va maktab taʼlimi vazirligidan Fan olimpiadasi boʻyicha iqtidorli bolalar bilan ishlash sektori metodisti Fazilat Zarifova, tuman Maktabgacha va maktab taʼlimi boʻlimi boshligʻi Yalgʻashboy Shamuratov, boʻlimning maktablar faoliyatini muvofiqlashtirish shuʼbasi metodistlari, Amudaryo tuman Ixtisoslashtirilgan maktabi direktori Otabek Yoʻldashov va mazkur maktabdan jalb qilingan nazoratchilar hamda olimpiada auditoriya rahbarlari, kuzatuvchilar ishtirok etdilar.

Ochilish marosimida Otabek Yoʻldashov, Fazilat Zarifovalar Al Xorazmiy nomidagi aniq va tabiiy fanlar olimpiadasi maqsad va vazifalari haqida hamda bu yilgi olimpiadani oʻtkazish tartibi oʻtgan yildagidan farq qilishi, tuman bosqichi uchun nazorat materiallari Agentlik huzuridagi Fan olimpiadalari markazi tomonidan tuzilganligi hamda olimpiadaning hududiy tashkiliy qoʻmitasi tomonidan chop etilib, olimpiada oʻtkaziladigan kuni joylarga yetkazilishi hamda maxfiylikni va adolatni taʼminlash uchun amalga oshiriladigan boshqa vazifalar haqida aytib oʻtdilar.

Tuman Maktabgacha va maktab taʼlimi boʻlimi boshligʻi Yalgʻashbay Shamuratov olimpiadani oʻtkazish tartib va qoidalari haqida batafsil maʼlumotlar berdi. Shundan soʻng auditoriya rahbarlari, kuzatuvchilar ishtirokchilarni belgilangan xonalarga taklif qilib, Agentlik huzuridagi Fan olimpiadalari markazi tomonidan taqdim qilingan test kitobchasi va javob varaqalarini oʻquvchilarga tarqatdilar va jarayon boshlandi.

Ishtirokchi oʻquvchilarga 7-8-sinf uchun matematika fanidan 36 savolli test kitobchasi va javoblar varaqasi, tabiiy fanlardan ham 36 savolli test kitobchasi va javoblar varaqasi taqdim etilib, olimpiada topshiriqlarni yechish uchun ishtirokchilarga nizom talabi boʻyicha 2 soat vaqt berildi.

Belgilangan vaqtdan keyin auditoriya rahbari tomonidan ishtirokchilarning javob varaqalari Ixtisoslashtirilgan maktab nazoratchilari va vazirlik masʼul xodimiga taqdim qilinib, seyf paketga solib muhrlangan holda Fan olimpiadalari markaziga yuborildi. Natijalar bir necha kun ichida Fan olimpiadalari markazi tomonidan Maktabgacha va maktab taʼlimi vazirligiga taqdim qilinadi va natija asosida Qoraqalpogʻiston Respublikasi bosqichi ishtirokchilari aniqlanib, gʻoliblar eʼlon qilinadi.

Bu kabi olimpiadalar oʻtkazilishi taʼlim muassasalari oʻquvchilari orasidan aniq va tabiiy fanlar bilimdonlari yetishib chiqishiga xizmat qiladi. Mazkur olimpiadaning Respublika bosqichida muvaffaqiyatli ishtirok etgan oʻquvchilar kelgusida xalqaro miqyosida tashkil qilinadigan musobaqa va olimpiadalarda ishtirok etib, Oʻzbekistonimizning obroʻsini yanada yuksaltirishga hissa qoʻshadilar.

Aziza Madrahimova