31-sonli maktabda Navoiy tavalludiga bagʻishlangan badiiy kecha oʻtkazildi

Soʻz mulkining sultoni Alisher Navoiy dahosi va uning shoh asarlari, gʻazallari maktab davrlaridan boshlab bizga tanish. Kitoblarini har gal varaqlaganimizda shoirning yangi-yangi qirralarini kashf etamiz, gʻazal va ruboiylarini oʻqishimiz mobaynida xuddiki ijodkor yashagan davrlarga tushib qolgandek boʻlamiz. Buyuk bobokalonimiz tavallud topgan 9-fevral sanasi esa har yili yurtimiz boʻylab keng nishonlanadi. Joylarda badiiy kechalar, mushoiralar, ijod uchrashuvlari oʻtkaziladi. Adabiyotga befarq boʻlmagan, katta-kichik davralarda bahr-u bayt musobaqalari oʻtkaziladi. Shu tariqa, shoir shaxsini yana bir bora qaytadan kashf etamiz. “Xamsa”ni yana bir bora qoʻlimizga olamiz.

Yaqinda Amudaryo tumani Maktabgacha va maktab taʼlimi boʻlimiga qarashli 31-sonli umumtaʼlim maktabida ham shoir tavalludining 584 yilligi munosabati bilan badiiy kecha uyushtirildi.

Maktabning ona tili va adabiyot fani oʻqituvchilari Goʻzal Kamolova, Umida Yuldasheva, Sayyora Raimovalar boshchiligida, yuqori sinf oʻquvchilari ishtirokida oʻtkazilgan tadbir Alisher Navoiy tavalludi, shoirga ism qoʻyilish sahnalari va umrining soʻnggi lahzalarigacha boʻlgan davrlardagi voqealarni oʻz ichiga oldi.

Dastlab, oʻquvchilar Guli Sobirova hamda Shohruz Rahimboyevlar ijrosida Navoiy bolaligi sahnalari gavdalantirildi. Unda Navoiyning bolalik davrlari, shoirning soʻz dunyosiga bolalikdan boshlab oʻzgacha muhabbat qoʻygani aks ettirildi. Shundan soʻng, maktabning 6-sinf oʻquvchilari Saidbek Davletboyev hamda Gulkamar Soatboyeva ijrosida “Guli” monologi oʻqib eshittirildi. “Hamon yodimdadur kuz chogʻi erdi, koʻrishgan maskanim gul bogʻi erdi…” deya jaranglagan baytlarni oʻquvchilar zoʻr ishtiyoq bilan tingladilar.

Maʼlumki, Alisher Navoiy ikki tilda mukammal ijod qilgan. Turkiy tilda “Navoiy”, forsiy tilda esa “Foniy” taxalluslarini qoʻllagan. Alisher Navoiyning adabiy va ilmiy merosini 4 faslga boʻlish mumkin: devonlari, dostonlari, forsiy tildagi sheʼriy merosi, ilmiy-filologik, nasriy va tarixiy asarlari. Shoir hazratlarining oʻzbek tilida yaratgan sheʼriy merosi asosan “Xazoyin ul-maoniy” devoniga jamlangan.

Shuningdek, Navoiy ijodining eng muhim va mashhur asarlaridan biri boʻlgan “Xamsa” toʻplami shoirning adabiy mahoratini, falsafiy va maʼnaviy qarashlarini aks ettirgan yuksak ijod mahsuli sifatida eʼtirof etiladi. Asar necha asrki, oʻz jozibasini yoʻqotmasdan avloddan avlodga oʻtib, yashab kelmoqda.

Tadbir davomida 7-sinf oʻquvchilari ijrosida ushbu toʻplamdan oʻrin olgan, sevgi, mashaqqat va umid tarannum etilgan “Farhod va Shirin” dostoni sahnalashtirilib, oʻquvchilar eʼtiboriga havola etildi.

Shundan soʻng, badiiy kecha oʻquvchilar yod olgan Navoiy ijodiga mansub gʻazallar va ruboiylar bilan davom etdi. 6-sinf oʻquvchilari “Tanovar” milliy kuyiga raqsga tushdilar. Albatta, oʻtkazilayotgan bu kabi tadbirlar shoir xotirasini abadiylashtirishga xizmat qilib, uning bebaho adabiy meʼrosi kelajak avlodlarga ham yetib borishida muhim vosita boʻladi. Bir tarafdan, oʻquvchilar oʻrtasida oʻzaro hamjihatlikni, jamoaviylikni shakllantirsa, yana bir tarafdan, yangidan-yangi isteʼdodlarni kashf etishga yordam beradi.

Aziza MADRAHIMOVA