Ayol-qizlarimizning oʻqimishli boʻlishi oila, davlat va jamiyat uchun ham foydali va ahamiyatli

Ayol-qizlarning ilmli va ziyoli boʻlishi kelgusi avlodning ham aqlli va ziyrak shaxs sifatida ulgʻayishiga zamin yaratadi. Ayollarning bilimli boʻlishi, nafaqat oilada, balki butun umri davomida ham hayot sinovlarida toblanishiga yordam beradi. Koʻp kitob oʻqigan, oʻz ustida tinimsiz ishlagan ayol jamiyatda ham oʻz oʻrnini oson topadi, farzandlarini ham salohiyatli va komil inson qilib tarbiyalay oladi. Qolaversa, oʻzi, oilasi va bolalari uchun moddiy ehtiyojlarining qondirilishiga oʻz hissasini qoʻshadi.

Shu sababli ham muhtaram Prezidentimiz Shavkat Mirziyoyev ayol-qizlarning taʼlim olishi uchun koʻplab kvotalar ajratmoqda. Magistratura talabasiga aylangan qizlarning kontrakt-toʻlovlari davlat byudjeti tomonidan qoplanishi, "Zulfiya" mukofoti va qanchadan qancha imtiyozlarning taʼsis etilishi fikrimning dalili boʻla oladi.

Ayollarning oʻqimishli, bilimdon, oliy maʼlumotli boʻlib, shaxsiy karerasini yaratishi yurtimiz ravnaqi uchun sav va havodek zarurdir. Xalqimizda: “Oʻgʻil farzandni oʻqitgan bir odamni oʻqitibdi, qiz farzandni oʻqitgan butun bir ummatni oʻqitibdi” degan goʻzal jumlalar bejiz keltirilmagan.

Hadisi sharifda ham shunday deyilgan: “Ilm olish har bir moʻmin-u, musulmon uchun ham farz, ham qarzdir”. Muxtasar aytganda, ilmsiz onadan hech qachon donishmand farzand dunyoga kelmaydi. Shunday ekan, millatimizni yuksaltirishni xohlasak, eng avvalo, ayollarni oʻqimishli qilish lozim. Zero barcha hikmat ilmdadir.

Odilboyeva Inobat, 1-sonli maktabning ona tili va adabiyot oʻqituvchisi