OʻzLiDeP tuman Kengashi tashabbusi bilan ayollar oʻrtasida voleybol musobaqalari tashkil etildi
3-fevral kuni Oʻzbekiston Liberal-demokratik partiyasining Amudaryo tuman Kengashi tashabbusi bilan tumandagi ixtisoslashtirilgan maktabda “Bir deputat yuz ayolga koʻmakchi” hamda “Sogʻlom oila – mustahkam oila” loyihalari doirasida ayollar oʻrtasida sportning voleybol turi boʻyicha musobaqa tashkil etildi.
Mazkur musobaqa sport orqali sogʻlom turmush tarzini ommalashtirish, ayollarning jismoniy faolligini oshirish hamda ularni jamiyat hayotida yanada faol ishtirok etishiga koʻmaklashish maqsadida tashkil qilindi.
Tadbirda partiyaning Amudaryo tumani Kengashi rahbari, deputat Yaxshimurod Ahmedov hamda partiyadan tuman Kengashiga saylangan deputatlar Madamin Kazakov va Muyassar Rahmatullayevalar ishtirok etishdi. Turnir Yangiobod mahallasi va Choykoʻl ovulida istiqomat qiluvchi ayollar oʻrtasida doʻstona ruhda, qizgʻin bellashuvlarga boy tarzda oʻtdi.
“OʻzLiDeP onkologik kasalliklarga qarshi” shiori ostida oʻtkazilgan musobaqa nafaqat ayol-qizlar oʻrtasida sportni rivojlantirish, balki sogʻlom turmush tarzini targʻib qilish, jamoaviylik ruhini mustahkamlash hamda oʻzaro doʻstona munosabatlarni shakllantirishga xizmat qildi. Ishtirokchilar sportga boʻlgan qiziqishlarini namoyon etib, jismoniy faollikning qanchalik muhim ekanini amalda koʻrsatishdi. Ularning maydondagi ishtiyoqi, gʻalabaga boʻlgan intilishi musobaqaga alohida shukuh bagʻishladi.
Tadbir doirasida onkologik kasalliklarga qarshi kurashishga yoʻnaltirilgan maxsus targʻibot ishlari ham olib borildi. Ishtirokchilarga ushbu kasalliklarning oldini olish, sogʻlom turmush tarzini shakllantirish va kasalliklarni erta aniqlashning ahamiyati haqida axborot berildi. Bu kabi loyihalar ayol-qizlarning sogʻligʻiga boʻlgan eʼtiborni oshirish bilan birga, ularni oʻz salomatliklariga masʼuliyat bilan yondashishga undaydi.
Musobaqaning yakuniy bahslarida ishtirokchilar gʻalaba uchun astoydil kurashib, haqiqiy sport ruhini namoyon etishdi. Tadbir yakunida gʻolib va faol jamoa ishtirokchilari esdalik sovgʻalari bilan taqdirlandi. Qayd etilganidek, bunday musobaqalar ayol-qizlarning sport bilan shugʻullanishga boʻlgan ishtiyoqini oshirib, jismoniy faollikni turmush tarzining ajralmas qismiga aylantirishga imkoniyat yaratadi.
OʻzLiDeP tomonidan amalga oshirilayotgan “Bir deputat – yuz ayolga koʻmakchi” va “Sogʻlom oila – mustahkam oila” loyihalari doirasidagi bunday sport tadbirlari ayollar salomatligini mustahkamlash, ularning ijtimoiy faolligini oshirish hamda sogʻlom turmush tarzini keng targʻib etishga xizmat qilmoqda.
Ushbu tashabbuslar nafaqat sportning ommaviyligini taʼminlash, balki jamiyatning barcha qatlamlari, ayniqsa, ayollarning hayot sifatini yaxshilashga qaratilgani bilan alohida ahamiyat kasb etadi. OʻzLiDeP sogʻlom va faol jamiyat barpo etish yoʻlida oʻz tashabbuslarini davom ettiradi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
