ЎзЛиДеП туман Кенгаши ташаббуси билан аёллар ўртасида волейбол мусобақалари ташкил этилди
3 февраль куни Ўзбекистон Либерал-демократик партиясининг Амударё туман Кенгаши ташаббуси билан тумандаги ихтисослаштирилган мактабда “Бир депутат юз аёлга кўмакчи” ҳамда “Соғлом оила – мустаҳкам оила” лойиҳалари доирасида аёллар ўртасида спортнинг волейбол тури бўйича мусобақа ташкил этилди.
Мазкур мусобақа спорт орқали соғлом турмуш тарзини оммалаштириш, аёлларнинг жисмоний фаоллигини ошириш ҳамда уларни жамият ҳаётида янада фаол иштирок этишига кўмаклашиш мақсадида ташкил қилинди.
Тадбирда партиянинг Амударё тумани Кенгаши раҳбари, депутат Яхшимурод Аҳмедов ҳамда партиядан туман Кенгашига сайланган депутатлар Мадамин Казаков ва Муяссар Раҳматуллаевалар иштирок этишди. Турнир Янгиобод маҳалласи ва Чойкўл овулида истиқомат қилувчи аёллар ўртасида дўстона руҳда, қизғин беллашувларга бой тарзда ўтди.
“ЎзЛиДеП онкологик касалликларга қарши” шиори остида ўтказилган мусобақа нафақат аёл-қизлар ўртасида спортни ривожлантириш, балки соғлом турмуш тарзини тарғиб қилиш, жамоавийлик руҳини мустаҳкамлаш ҳамда ўзаро дўстона муносабатларни шакллантиришга хизмат қилди. Иштирокчилар спортга бўлган қизиқишларини намоён этиб, жисмоний фаолликнинг қанчалик муҳим эканини амалда кўрсатишди. Уларнинг майдондаги иштиёқи, ғалабага бўлган интилиши мусобақага алоҳида шукуҳ бағишлади.
Тадбир доирасида онкологик касалликларга қарши курашишга йўналтирилган махсус тарғибот ишлари ҳам олиб борилди. Иштирокчиларга ушбу касалликларнинг олдини олиш, соғлом турмуш тарзини шакллантириш ва касалликларни эрта аниқлашнинг аҳамияти ҳақида ахборот берилди. Бу каби лойиҳалар аёл-қизларнинг соғлиғига бўлган эътиборни ошириш билан бирга, уларни ўз саломатликларига масъулият билан ёндашишга ундайди.
Мусобақанинг якуний баҳсларида иштирокчилар ғалаба учун астойдил курашиб, ҳақиқий спорт руҳини намоён этишди. Тадбир якунида ғолиб ва фаол жамоа иштирокчилари эсдалик совғалари билан тақдирланди. Қайд этилганидек, бундай мусобақалар аёл-қизларнинг спорт билан шуғулланишга бўлган иштиёқини ошириб, жисмоний фаолликни турмуш тарзининг ажралмас қисмига айлантиришга имконият яратади.
ЎзЛиДеП томонидан амалга оширилаётган “Бир депутат – юз аёлга кўмакчи” ва “Соғлом оила – мустаҳкам оила” лойиҳалари доирасидаги бундай спорт тадбирлари аёллар саломатлигини мустаҳкамлаш, уларнинг ижтимоий фаоллигини ошириш ҳамда соғлом турмуш тарзини кенг тарғиб этишга хизмат қилмоқда.
Ушбу ташаббуслар нафақат спортнинг оммавийлигини таъминлаш, балки жамиятнинг барча қатламлари, айниқса, аёлларнинг ҳаёт сифатини яхшилашга қаратилгани билан алоҳида аҳамият касб этади. ЎзЛиДеП соғлом ва фаол жамият барпо этиш йўлида ўз ташаббусларини давом эттиради.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
