2024-yilda Xalq qabulxonasiga asosan qaysi yoʻnalishlarda murojaatlar kelib tushdi?

Ulugʻ mutafakkir bobomiz Alisher Navoiyning “Odamiy ersang demagil odami, onikim, yoʻq xalq gʻamidin gʻami” degan satrlarining mohiyatiga nazar soladigan boʻlsak, chuqur hayotiy falsafani ilgʻaymiz. Bu satrlarda odamlarning dard-u, tashvishlari bilan yashashning ulugʻ saodat ekani ifoda etilgan. Chindan-da, inson uchun oʻzi tugʻilib oʻsgan zamin qadrdon odamlarining, yurtdoshlarining orzu-umidlarini ushaltirish yoʻlida qilayotgan mehnati tahsinga sazovor. Xalqning xohish-istaklariga, murojaatlariga quloq osib, muammolariga oʻz vaqtida yechim topishni maqsad qilgan Xalq qabulxonalari bugun ana shu maqsad yoʻlida samarali faoliyat yuritmoqda.

Albatta, har bir aholi vakilini oʻzi yashab turgan hududdagi Xalq qabulxonalarining faoliyati, kelib tushayotgan murojaatlar koʻlami va eng asosiysi, oʻsha murojaatning taqdiri nima boʻlgani haqidagi maʼlumotlar qiziqtirsa ajab emas. Bu borada soʻz ketar ekan, Oʻzbekiston Respublikasi Prezidentining Amudaryo tumanidagi Xalq qabulxonasiga 2024-yil davomida virtual qabulxona orqali va toʻgʻridan-toʻgʻri kelib tushgan murojaatlar hamda ularning natijalari boʻyicha toʻxtalib oʻtmaslikning iloji yoʻq.

Oʻzbekiston Respublikasi Prezidentining Amudaryo tumanidagi Xalq qabulxonasiga Virtual va Xalq qabulxonalari orqali 2024-yil boshidan 31-dekabr sanasiga qadar jami 5 ming 190 ta masalalar boʻyicha murojaatlar kelib tushgan. Turli xil masalalarni oʻz ichiga olgan ushbu murojaatlardan 5 ming 127 tasi koʻrib chiqilgan, 3 ming 764 ta murojaatlar qanoatlantirilgan. Shuningdek, 1 ming 884 ta murojaatlar ijobiy hal qilingan, 1 ming 870 ta murojaatlarga huquqiy maʼlumot berish orqali hal qilingan, 10 ta murojaatlar uzoq muddatli nazoratga olingan. 1 ming 129 ta murojaatlarga tushuntirish berilgan, 30 ta murojaatlar koʻrmasdan qoldirilgan, 46 ta murojaatlar rad etilgan, 147 ta murojaatlar tugatilgan, 11 ta murojaat maʼlumot uchun qabul qilingan. Qolgan 63 ta murojaatlar koʻrib chiqilish jarayonida.

Maʼlumki, aholi tomonidan eng koʻp qaysi masala yuzasidan murojaat tushayotgani oʻsha jabhadagi islohotlarni yoki faoliyatni tubdan oʻrganishni va masalani tadqiq etishni taqozo etadi, ushbu masalaga aloqador qaysidir idora-tashkilot yoki mutasaddi rahbarni sergaklikka chaqiradi. 2024-yil davomida tumanimiz aholisi tomonidan eng koʻp bolalar nafaqasi masalasida, yashash sharoitlarini yaxshilash, uy-joyni taʼmirlash va qurish uchun yordam boʻyicha, aliment undirish yuzasidan, shuningdek, davolanish va jarrohlik amaliyoti uchun moddiy yordam boʻyicha, “Yoshlar daftari”ga kiritilgan talabalarning shartnoma toʻlovlari boʻyicha, mahallalar ichki yoʻllarini qurish, taʼmirlash, shagʻallashtirish, asfaltlash kabi bir qator masalalar boʻyicha murojaatlar kelib tushgan.

Kelib tushayotgan murojaatlarning koʻpchiligi oʻz yechimini topayotganidan yurtdoshlarimiz mamnun. Tumanimizdagi Beshtom mahallasi aholisini koʻp yillardan beri ichimlik suvi muammosi qiynab kelayotgan edi. Bu borada tuman Xalq qabulxonasiga aholi vakilidan kelib tushgan murojaat oʻz natijasini berib, hududga 11,4 km uzunlikdagi ichimlik suvi quvuri tortildi. Natijada Beshtom mahallasidagi 241ta xonadonga “obi hayot” kirib borishiga erishildi.

Soʻngi yillarda yurtimizda mutasaddi idoralarning, sektor rahbarlarining xalq bilan muloqot qilishi hamda xalqni qiynab kelayotgan muammolarni joyiga chiqqan holda oʻrganib, iloji boricha tez va samarali hal etishi uchun sayyor qabullar tashkil etilayotgani oʻzining ijobiy natijalarini bermoqda.

Yil davomida Amudaryo tumanida ham sektor rahbarlari tomonidan reja asosida tumandagi ovul va mahallalarda 309 marotaba sayyor qabullar oʻtkazilgan boʻlib, sayyor qabullar davomida 1 ming 207ta masalalar boʻyicha murojaatlar kelib tushgan. Shundan 1 ming 191ta murojaatlar koʻrib chiqilgan, 1 ming 129ta, yaʼni 95 foiz murojaatlar qanoatlantirilgan. 988 ta murojaatlar ijobiy hal qilingan, 122ta murojaatlar huquqiy maslahat va maʼlumotlar berish orqali hal qilingan boʻlsa, 19ta murojaat uzoq muddatli nazoratga olingan. Shuningdek, 62ta murojaatlarga tushuntirishlar berilib, qolgan 16ta murojaatlar koʻrib chiqilish jarayonida.

Bundan tashqari, murojaatlar hududlar kesimida tahlil qilinganida Alisher Navoiy nomli mahalladan 371ta, Jumurtov shaharchasidan 300ta, Qilichboy ovulidan 285ta, Boyovul mahallasidan 194ta, Qoramon mahallasidan 178ta hamda Toʻlqin ovulidan 177ta murojaatlar tushgani qayd qilingan.

Qolaversa, Oʻzbekiston Respublikasi Prezidenti Administratsiyasi topshirigʻiga asosan, tumanimizdagi 16ta davlat idoralari va tashkilotlarida jismoniy va yuridik shaxslarning murojaatlari bilan ishlash holati oʻrganilib, aniqlangan kamchiliklar yuzasidan 14ta taqdimnoma, 2ta maʼmuriy javobgarlikka tortish yuzasidan taklif, 12ta koʻrsatma xatlar chiqarilgan hamda 2 nafar mansabdor shaxs maʼmuriy javobgarlikka tortilib, 4 nafariga hayfsan berilgan 3 nafar xodim esa ogohlantirilgan.

Oʻzi yashayotgan yurt taqdiriga, yurtdoshlari taqdiriga befarq boʻlmagan, boshqalarning gʻam-tashvishini oʻzimniki, deya qabul qiladigan har bir insonda daxldorlik hissi boʻladi. Soʻzimiz soʻngida, ana shu daxldorlik hissi siz-u, bizni aslo tark etmasin, deymiz.

A.Orazbayev, Amudaryo tumani Xalq qabulxonasi mudiri

A.Madrahimova, jurnalist