Amudaryo tumanida “Qipchoq hotel” nomli yangi mehmonxona faoliyat boshladi

Mamlakatimizda tadbirkorlikni rivojlantirish va turizm infratuzilmasini yaxshilash davlat siyosatining ustuvor yoʻnalishlaridan biri hisoblanadi. Ayniqsa, xizmat koʻrsatish sohasiga alohida eʼtibor qaratilib, tadbirkorlar uchun qulay sharoitlar va imtiyozlar berilishi ularga keng koʻlamli imkoniyatlar taqdim etmoqda. Xususan, mehmonxona tadbirkorligining rivojlanishi hududlarning iqtisodiy salohiyatini oshirish va turizmni yanada taraqqiy ettirishda muhim oʻrin tutadi.

Amudaryo tumani oʻzining geografik joylashuvi va tarixiy inshootlari bilan turizm sohasida katta imkoniyatlarga ega. Tumanda xizmat koʻrsatish infratuzilmasining rivojlanishi nafaqat iqtisodiy oʻsishni taʼminlayapti, balki aholi farovonligiga ham ijobiy taʼsir koʻrsatyapti. Beshtom mahallasi hududida qad rostlagan zamonaviy “Qipchoq hotel” nomli mehmonxona ham shu maqsadlarga xizmat qiladi.

19-yanvar kuni ushbu yangi mehmonxonaning tantanali ochilish marosimi boʻlib oʻtdi. Mazkur xizmat koʻrsatish shoxobchasi "Soliy kinochi" MChJ rahbari, tadbirkor Davronbek Eshmurodov tashabbusi bilan amalga oshirilgan boʻlib, Amudaryo tumanining turizm va xizmat koʻrsatish sohasidagi koʻrsatkichlarini yanada yaxshilashga xizmat qiladi.

Tadbirda tuman hokimi Sobir Xoʻjametov, hokim oʻrinbosarlari, “Oʻzmilliybank” aktsiyadorlik jamiyatining Qoraqalpogʻiston Respublikasi filiali boshligʻi, soha masʼullari, tadbirkorlar va aholi vakillari ishtirok etdi.

Ochilish marosimida tuman hokimi Sobir Xoʻjametov barcha qulayliklarga ega boʻlgan yangi, zamonaviy mehmonxonaning faoliyat boshlashi tumanimiz iqtisodiy-ijtimoiy hayotidagi muhim voqealardan biri boʻlib, turizm sohasida koʻrsatilayotgan xizmatlar hajmining ortishiga zamin yaratishini alohida taʼkidladi. Bu kabi loyihalar nafaqat tumanning iqtisodiy salohiyatini oshirishi, balki aholining turmush darajasini yuksaltirib, yangi ish oʻrinlari yaratish va hudud infratuzilmasini yanada yaxshilashi eʼtirof etildi. Mehmonxona, shuningdek, yangi turistik yoʻnalishlarni ochish va hududni xalqaro miqyosda tanitishda muhim oʻrin tutishi qayd qilindi.

Tadbir ishtirokchilari tadbirkor Davronbek Eshmurodov mehnatini eʼtirof etib, uning kelgusi faoliyatida muvaffaqiyatlarga tilakdoshlik bildirdi. Bu loyiha faqatgina turistik sektorda emas, balki turli sohalarda yangi istiqbollarni taʼminlashga xizmat qilishi eʼtirof etildi.

Mehmonxona qurilishi 2024-yil davomida zamonaviy arxitektura talablari asosida amalga oshirildi. Loyiha tadbirkor Davronbek Eshmurodovning oʻz mablagʻlari va “Oʻzmilliybank” tomonidan ajratilgan 2 milliard soʻmlik imtiyozli kredit mablagʻlari yordamida qurib bitkazildi.

Xizmat koʻrsatish shoxobchasi bir vaqtning oʻzida 62 nafar mehmonni qabul qilish imkoniyatiga ega. Mehmonxona barcha zamonaviy qulayliklar bilan taʼminlangan. Binoning birinchi qavatida umumiy ovqatlanish shoxobchasi tashkil etilgan boʻlib, u nafaqat mehmonxona mijozlariga, balki mahalliy aholi va sayyohlarga ham xizmat koʻrsatadi.

Mehmonxona asosan mahalliy va xorijiy mehmonlarni qabul qilishga moʻljallangan. Uning joylashuvi hududning tabiiy goʻzalligi va tarixiy obidalarga yaqinligi bilan ajralib turadi.

Tadbirkor Davronbek Eshmurodovning rejalariga koʻra, kelgusida mehmonxonada zamonaviy xizmatlarni yoʻlga qoʻyish, xizmat koʻrsatish sifatini xalqaro talablarga mos ravishda yaxshilash koʻzda tutilmoqda. Bundan tashqari tadbirkor mehmoxona faoliyati orqali mahalladagi 10 nafar ishsiz yoshlarning doimiy bandligini taʼminlagan. Tadbirkor xizmat koʻrsatish sohasidagi muvaffaqiyatli faoliyati bilan xalqimiz hurmatini qozongan ishbilarmonlardan sanaladi. Uning “Qipchoq choyxona” nomli umumiy ovqatlanish shoxobchasida ham xalqimizga namunali xizmat koʻrsatib kelinmoqda.

Shohzod Qurbonboyev