22-sonli davlat maktabgacha taʼlim tashkilotida Vatan himoyachilari kuni keng nishonlandi
Oʻzbekiston Respublikasi Qurolli Kuchlarining tashkil topganiga 33-yil toʻlishi va Vatan himoyachilari kuni mamlakatimiz boʻylab katta shodiyonalar bilan nishonlanmoqda. Bu bayram xalqimiz uchun yuksak ahamiyatga ega boʻlib, sohada fidokorlik koʻrsatgan insonlar, Vatanimiz tinchligini saqlayotgan jasur yigitlarimizga hurmat va ehtirom ramziga aylangan. Qolaversa, xalqmizning yurt posbonlariga boʻlgan bunday mehri yosh avlodda vatanparvarlik tuygʻularini kuchaytiradi. Ana shunday quvonchli kunda Amudaryo tumanining Qilichboy ovulidagi 22-sonli davlat maktabgacha taʼlim tashkilotida ham bayramona tadbir tashkil qilindi.
Kichkintoylarning sevimli muassasasi xonalari ushbu kunda alohida goʻzallik bilan namoyon boʻldi. Harbiy mavzudagi bezaklar, bolajonlarning ijodiy ishlari va bayramona shiorlar bilan bezatilgan zal mehmonlarda iliq tassurotlar uygʻotdi. Tadbirni tashkilot rahbari Nilufar Yusupova tabrik soʻzi bilan ochib, tashrif buyurgan ota-onalar, mehmonlar va tarbiyalanuvchilarni bayram bilan samimiy muborakbod etdi. U oʻz nutqida Prezidentimiz rahbarligida mamlakatimizda yosh avlodni harbiy-vatanparvarlik ruhida tarbiyalash masalasiga alohida eʼtibor qaratilayotganini taʼkidlab, maktabgacha taʼlim tizimi bu borada muhim oʻrin tutishini, ayniqsa, bolalar qalbida vatanparvarlik va milliy qadriyatlarimizga hurmatni yoshlikdan boshlab shakllantirish lozimligini qayd etdi.
Darhaqiqat, yoshlarni yuksak axloqiy qadriyatlar asosida tarbiyalash, ularning vatanga boʻlgan muhabbatini mustahkamlash, mard va yurtga sadoqatli avlodni voyaga yetkazish bugungi kunning dolzarb masalalaridan hisoblanadi.
Tadbirning badiiy qismi jajji askarlar ijrosida kuylangan Davlat Madhiyasi bilan boshlandi. Ayniqsa, harbiy libosdagi kichkintoylarning yurt madhiyasini koʻtarinki ruhda joʻshqin ijro etishi, ota-onalar qalbiga faxru-iftixor tuygʻularini baxsh etdi. Bayramning badiiy qismi bolajonlarning isteʼdodi va shijoatini oʻzida aks ettirdi. Ular oʻz sheʼrlarida Vatan, mardlik va jasoratni madh etib, yurtga boʻlgan bolalarcha muhabbatini namoyish qildi.
Chindan ham, maktabgacha taʼlim tashkilotlarida bolalarning dunyoqarashini kengaytirish va ijodkorlik qobiliyatlarini roʻyobga chiqarish maqsadida oʻtkazilayotgan bunday tadbirlar, musobaqalar va turli koʻrgazmalar yosh avlodning jamiyatda oʻz oʻrnini topishiga zamin yaratishi shubhasiz. Albatta, har bir bolaning qalbiga Vatan tuygʻusini singdirishda tarbiyachilarning hissasi katta. Shuningdek, yosh avlodni Vatanni sevuvchi, jasoratli va fidoyi insonlar sifatida voyaga yetkazish mamlakatimizning porloq kelajagini taʼminlashda muhim omil hisoblanadi.
Tadbirda “Leytenant” nomli qoʻshiqqa tayyorlangan raqs kichkintoylarning harbiycha harakatlari, musiqaga hamohang chiqishlari bilan alohida taassurot qoldirdi. Tayyorlov guruhi bolalarining mardona harakatlari va katta guruh qizlarining nafis ifodalari raqsga oʻzgacha koʻrk bagʻishladi.
“Askarlar” raqsi esa tadbirning hayajonli lahzasiga aylandi. Ushbu raqs orqali kichkintoylarning har bir qadamida ona Vatanga boʻlgan cheksiz muhabbati jangovar musiqaning joʻshqin ohanglari bilan uygʻunlashgan holda aks etdi. Bolajonlarning ushbu chiqishi tomoshabinlar qalbini zabt etib, davomli olqishlarga sazovor boʻldi.
Tadbir davomida Qilichboy ovulidagi Davlat xavfsizlik xizmati chegara qoʻshinlariga qarashli harbiy qismning harbiy xizmatchilariga soʻz berildi. Mehmonlar barchani bayram bilan tabriklab, tashkilotchilarga samimiy minnatdorlik bildirdi va yosh avlodning tarbiyasiga boʻlgan eʼtibor uchun samimiy tashakkur izhor qilishdi.
Ushbu tadbir yurt himoyachilariga boʻlgan yuksak hurmatning yorqin ifodasi boʻldi, desak aslo mubolagʻa boʻlmaydi. Tadbir davomida bolajonlar ijrosidagi sheʼru-qoʻshiqlar va raqslari orqali Vatan, mardlik va jasorat tuygʻulari ulugʻlandi. Yosh avlod qalbida yurtga boʻlgan mehr va sadoqatni yanada oshirishga xizmat qilgan ushbu bayram tadbiri barcha ishtirokchilarda unutilmas taassurot qoldirdi.
Mard va jasoratli yigitlarimizni sharaflash, ularning mehnatiga ehtirom koʻrsatish – bu mustaqil Oʻzbekistonimizning tinchligi va xalqimizning farovon hayoti uchun minnatdorchilik ramzidir.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
