22-сонли давлат мактабгача таълим ташкилотида Ватан ҳимоячилари куни кенг нишонланди
Ўзбекистон Республикаси Қуролли Кучларининг ташкил топганига 33 йил тўлиши ва Ватан ҳимоячилари куни мамлакатимиз бўйлаб катта шодиёналар билан нишонланмоқда. Бу байрам халқимиз учун юксак аҳамиятга эга бўлиб, соҳада фидокорлик кўрсатган инсонлар, Ватанимиз тинчлигини сақлаётган жасур йигитларимизга ҳурмат ва эҳтиром рамзига айланган. Қолаверса, халқмизнинг юрт посбонларига бўлган бундай меҳри ёш авлодда ватанпарварлик туйғуларини кучайтиради. Ана шундай қувончли кунда Амударё туманининг Қиличбой овулидаги 22-сонли давлат мактабгача таълим ташкилотида ҳам байрамона тадбир ташкил қилинди.
Кичкинтойларнинг севимли муассасаси хоналари ушбу кунда алоҳида гўзаллик билан намоён бўлди. Ҳарбий мавзудаги безаклар, болажонларнинг ижодий ишлари ва байрамона шиорлар билан безатилган зал меҳмонларда илиқ тассуротлар уйғотди. Тадбирни ташкилот раҳбари Нилуфар Юсупова табрик сўзи билан очиб, ташриф буюрган ота-оналар, меҳмонлар ва тарбияланувчиларни байрам билан самимий муборакбод этди. У ўз нутқида Президентимиз раҳбарлигида мамлакатимизда ёш авлодни ҳарбий-ватанпарварлик руҳида тарбиялаш масаласига алоҳида эътибор қаратилаётганини таъкидлаб, мактабгача таълим тизими бу борада муҳим ўрин тутишини, айниқса, болалар қалбида ватанпарварлик ва миллий қадриятларимизга ҳурматни ёшликдан бошлаб шакллантириш лозимлигини қайд этди.
Дарҳақиқат, ёшларни юксак ахлоқий қадриятлар асосида тарбиялаш, уларнинг ватанга бўлган муҳаббатини мустаҳкамлаш, мард ва юртга садоқатли авлодни вояга етказиш бугунги куннинг долзарб масалаларидан ҳисобланади.
Тадбирнинг бадиий қисми жажжи аскарлар ижросида куйланган Давлат Мадҳияси билан бошланди. Айниқса, ҳарбий либосдаги кичкинтойларнинг юрт мадҳиясини кўтаринки руҳда жўшқин ижро этиши, ота-оналар қалбига фахру-ифтихор туйғуларини бахш этди. Байрамнинг бадиий қисми болажонларнинг истеъдоди ва шижоатини ўзида акс эттирди. Улар ўз шеърларида Ватан, мардлик ва жасоратни мадҳ этиб, юртга бўлган болаларча муҳаббатини намойиш қилди.
Чиндан ҳам, мактабгача таълим ташкилотларида болаларнинг дунёқарашини кенгайтириш ва ижодкорлик қобилиятларини рўёбга чиқариш мақсадида ўтказилаётган бундай тадбирлар, мусобақалар ва турли кўргазмалар ёш авлоднинг жамиятда ўз ўрнини топишига замин яратиши шубҳасиз. Албатта, ҳар бир боланинг қалбига Ватан туйғусини сингдиришда тарбиячиларнинг ҳиссаси катта. Шунингдек, ёш авлодни Ватанни севувчи, жасоратли ва фидойи инсонлар сифатида вояга етказиш мамлакатимизнинг порлоқ келажагини таъминлашда муҳим омил ҳисобланади.
Тадбирда “Лейтенант” номли қўшиққа тайёрланган рақс кичкинтойларнинг ҳарбийча ҳаракатлари, мусиқага ҳамоҳанг чиқишлари билан алоҳида таассурот қолдирди. Тайёрлов гуруҳи болаларининг мардона ҳаракатлари ва катта гуруҳ қизларининг нафис ифодалари рақсга ўзгача кўрк бағишлади.
“Аскарлар” рақси эса тадбирнинг ҳаяжонли лаҳзасига айланди. Ушбу рақс орқали кичкинтойларнинг ҳар бир қадамида она Ватанга бўлган чексиз муҳаббати жанговар мусиқанинг жўшқин оҳанглари билан уйғунлашган ҳолда акс этди. Болажонларнинг ушбу чиқиши томошабинлар қалбини забт этиб, давомли олқишларга сазовор бўлди.
Тадбир давомида Қиличбой овулидаги Давлат хавфсизлик хизмати чегара қўшинларига қарашли ҳарбий қисмнинг ҳарбий хизматчиларига сўз берилди. Меҳмонлар барчани байрам билан табриклаб, ташкилотчиларга самимий миннатдорлик билдирди ва ёш авлоднинг тарбиясига бўлган эътибор учун самимий ташаккур изҳор қилишди.
Ушбу тадбир юрт ҳимоячиларига бўлган юксак ҳурматнинг ёрқин ифодаси бўлди, десак асло муболаға бўлмайди. Тадбир давомида болажонлар ижросидаги шеъру-қўшиқлар ва рақслари орқали Ватан, мардлик ва жасорат туйғулари улуғланди. Ёш авлод қалбида юртга бўлган меҳр ва садоқатни янада оширишга хизмат қилган ушбу байрам тадбири барча иштирокчиларда унутилмас таассурот қолдирди.
Мард ва жасоратли йигитларимизни шарафлаш, уларнинг меҳнатига эҳтиром кўрсатиш – бу мустақил Ўзбекистонимизнинг тинчлиги ва халқимизнинг фаровон ҳаёти учун миннатдорчилик рамзидир.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
