Eng namunali koʻchaboshilari taqdirlandi

Amudaryo tumani hokimligining majlislar zalida Qoraqalpogʻiston Respublikasi Joʻqorgʻi Kengesi qoʻmita raisi Sharapat Otemisov boshchiligida koʻcha boshilar bilan uchrashuv boʻlib oʻtdi. Uchrashuvda tuman hokimi oʻrinbosarlari, fuqarolar yigʻinlari raislari hamda faol koʻchaboshilar ishtirok etdi.

Uchrashuvda Sharapat Otemisov soʻzga chiqib, soʻngi yillarda Prezidentimiz boshchiligida Qoraqalpogʻiston Respublikasining har tomonlama kompleks ijtimoiy-iqtisodiy rivojlantirish borasida amalga oshirilayotgan islohotlar, xalqimizning turmush farovonligini yanada yaxshilashga qaratilgan keng koʻlamli amaliy ishlar xususida toʻxtaldi.

Taʼkidlanganidek, Qoraqalpogʻiston Respublikasi rivojlantirish maqsadida 15dan ortiq Prezident farmon va qarorlari qabul qilinib, ular hududdagi mislsiz oʻzgarishlarda muhim dasturulamal boʻlib xizmat qilmoqda.

2024-yil Qoraqalpogʻiston uchun eng tarixiy yillardan biri boʻlib qolmoqda, desak, aslo mubolagʻa boʻlmaydi. Xususan, xalqimizning koʻp yillik orzularidan biri – Amudaryo ustidagi Qoraqalpogʻistonni Xorazm bilan bogʻlaydigan 423 metrli yangi avtomobil va temir yoʻl koʻprigi ochilishi orqali yuk va yoʻlovchi tashish masofasi 180 kilometrga qisqartirilib, yangi imkoniyat eshiklari ochildi. Yangi sanoat korxonalari, turizm maskanlari, energetika quvvatlari, IT-park ishga tushirildi.

Shuningdek, yilning eng muhim voqealaridan biri – 323 million dollar hisobiga yangidan qurilgan “Qoʻngʻirot-Beyneu” avtomobil yoʻlining 240 kilometr qismi foydalanishga topshirilishi bilan tranzit va boshqa xizmatlar hajmi yiliga 200 million dollarga oshishiga zamin yaratildi.

Qayd etish joizki, respublikamiz hududida sanoat, tadbirkorlik va infratuzilma sohalarida 50dan ortiq imtiyoz va yengilliklar berilgan. Xususan, investitsiya loyihalari uchun toʻgʻridan-toʻgʻri yer ajratish huquqi faqat Qoraqalpogʻistondagina joriy qilingan. Oʻzbekiston Prezidentining tadbirkorlar bilan ochiq muloqoti bu yil Nukusda oʻtkazilib, hududning salohiyati mamlakat boʻylab ishbilarmonlarga koʻrsatib berildi.

Tadbirda mamlakatimizdagi islohotlarning joylardagi ijrosini taʼminlashda mahalla instituti, xususan koʻchaboshchilarning faolligi nihoyatda zarurligi qayd qilindi. Ularning fidoyi mehnatlari natijasida xalqimizning muammolari oʻz vaqtida yuqori tashkilotlarga, islohotlarning mazmun-mohiyatini esa aholiga yetkazilayotgani, bu esa kuchli fuqarolik jamiyati barpo qilishdek ulugʻvor maqsadlarga xizmat qilishi eʼtirof etildi.

Aholi osoyishtaligini taʼminlash, oila va xotin-qizlar bilan ishlash tizimini yangi darajaga olib chiqish, nuroniylarning ijtimoiy faolligini oshirish, mahallani jinoyatchilikdan xoli hududga aylantirishda ham koʻchaboshchilar “Mahalla yettiliklari”ga qoʻl-qanot boʻlayotgani qayd etildi.

Uchrashuv mobaynida mahalla tizimida koʻchaboshchilarining faoliyatini yanada rivojlantirish maqsadida respublika boʻyicha oʻtkazilgan “Eng namunali koʻchaboshchi” tanlovining mahalla, tuman bosqichi gʻoliblari munosib taqdirlandi hamda ularga pul mukofotlari topshirildi.

Taʼkidlash joizki, 2021-yil 23-fevraldagi Oʻzbekiston Respublikasi Vazirlar Mahkamasining “Fuqarolarning oʻzini oʻzi boshqarish organlari faoliyatida faol ishtirok etib kelayotgan fuqarolarni ragʻbatlantirish tartibini joriy etish toʻgʻrisida”gi 99-sonli qarori koʻchaboshchilar faoliyati samaradorligini oshirishda muhim dasturulamal boʻlmoqda.

Qaror asosida fuqarolarning oʻzini oʻzi boshqarish organlari faoliyatida faol ishtirok etib kelayotgan fuqarolar faoliyatining samaradorligini baholashning qator asosiy koʻrsatkichlari belgilangan.

Xususan, tegishli hududda koʻcha va koʻp kvartirali uylardagi obodonlashtirish va koʻkalamzorlashtirish ishlarini tashkil etish, oʻzi yashayotgan koʻcha va koʻp kvartirali uylardagi “Temir daftar”, “Ayollar daftari” va “Yoshlar daftari”ga kiritilgan fuqarolar bilan ishlash, oʻzgalar parvarishiga muhtoj yolgʻiz keksalar va nogironlarga, boquvchisini yoʻqotgan oilalarga, notinch va muammoli oilalarga yordam koʻrsatish, aholining issiqlik va elektr energiyasidan, tabiiy gazdan, issiq va sovuq suvdan tejamli foydalanishini targʻib qilish koʻchaboshchilar faoliyatining samaradorligini belgilovchi asosiy mezonlar sirasiga kiradi.

Yigʻilishda shular bilan bir qatorda tegishli hududda toʻy-hashamlar, oilaviy tantanalar, maʼraka va marosimlar, marhumlarning xotirasiga bagʻishlangan tadbirlar oʻtkazilishini tartibga solish masalalarida fuqarolar yigʻini kengashiga takliflar berib, oʻziga biriktirilgan hudud osoyishtaligi va obodligi uchun koʻmaklashgan, aholi tinchligi uchun xavf tugʻdiruvchi holatlarni bartaraf etish maqsadida fuqarolar yigʻiniga yoki mutasaddi organlarga oʻz vaqtida xabar berganib kelgan va hududda huquqbuzarliklarning oldini olishga hissa qoʻshgan faol koʻchaboshchilarga alohida minnatdorchilik bildirildi.

Charos Arslonova, tuman hokimligining Axborot xizmati rahbari.