Limon ekishni yoʻlga qoʻyish orqali tomorqadan olinadigan daromadni 2-3 hissa oshirish choralari koʻrilmoqda

Amudaryo tuman Fermer, dehqon xoʻjaliklari va tomorqa yer egalari kengashi tomonidan usta dehqonlardan iborat guruh tuzilgan boʻlib, ushbu guruh aʼzolari ishtirokida tomorqalardan samarali foydalanish, yiliga 2-3-marta hosil olish boʻyicha oʻquv seminarlari tashkil qilinib kelinmoqda.

Bugungi kunda tumandagi aholi tomorqalarida 1183ta issiqxonalar mavjud boʻlib, shundan yangidan barpo etilgan issiqxonalar soni 729tani tashkil qiladi.

Aholi tomorqa yerlarida Oʻzbekiston Fermer, dehqon xoʻjaliklari va tomorqa yer egalari kengashi jamgʻarmasi mablagʻlari hisobidan imtiyozli kreditlar ajratish orqali limonchilikni yoʻlga qoʻyish, shu yoʻl bilan tomorqadan olinadigan daromadni 2-3 hissa oshirish va qoʻshimcha ish oʻrinlarini yaratish koʻzda tutilmoqda.

Ekin maydonlaridan samarali foydalanishni taʼminlashda tomorqa egalarining bilim va tajribalarini oshirish, ularni zarur maʼlumot va axborotlar bilan taʼminlash muhim ahamiyatga ega.

Shu maqsadda Oʻzbekiston Fermer, dehqon xoʻjaliklari va tomorqa yer egalari kengashi boʻlim boshligʻi Mehriddin Muhammadiyev, Qoraqalpogʻiston Fermer, dehqon xoʻjaliklari va tomorqa yer egalari kengashi raisi oʻrinbosari, jamgʻarmaning hududiy vakili Allaniyoz Ajimov, tuman Fermer, dehqon xoʻjaliklari va tomorqa yer egalari kengashi bosh mutaxassisi Bahodir Allanazarov, markaz agronomi Javlon Rajabovlar Xolimbeg ovuli hududidagi tomorqachi yer egasi, “Namunali tomorqachi” koʻkrak nishoni sohibi Erkin Qoʻshayev xonadonida boʻlishdi.

Masʼullar tomorqada tashkil qilingan 2 sotixli issiqxonaga ekilgan limon va yetishtirilayotgan limon koʻchatlari holati bilan tanishib, vegetatsiya davrida qilinishi kerak boʻlgan agrotexnik tadbirlar boʻyicha tavsiyalar berdilar.

Shundan soʻng masʼullar Qoramon mahallasi hududida faoliyat yuritayotgan tomorqa yer egasi “Namunali tomorqachi” koʻkrak nishoni sohibi Farhod Yaxshimov xonadonida ham limon koʻchatlarini parvarishlash holati bilan tanishdilar. Farhod Yaxshimov kelgusi yilda aholiga 1000 tup limon koʻchatini yetkazib berish, shu orqali tomorqalardan olinadigan daromadlarni oshirishga hissa qoʻshishni oʻz oldiga maqsal qilib qoʻygan. Mehmonlar tomorqachining faoliyatiga omad tilab, uning tashabbuslarini ommalishtirish boʻyicha fikrlashdilar.

Ilhom Polvonov, tuman Fermer, dehqon xoʻjaliklari va tomorqa yer egalari kengashi raisi