ASOSIY FANLAR OLIMPIADASINING TUMAN BOSQIChI GʻOLIBLARI TAQDIRLANDI

Mamlakatimizda barcha sohalar qatori umumtaʼlim tizimida amalga oshirilayotgan islohotlar ham samarali natijalar bermoqda. Har yili oʻtkaziladigan olimpiadalar, ayniqsa, asosiy fanlar olimpiadasi, maktab oʻquvchilarining bilim va qobiliyatlarini oshirishda muhim ahamiyat kasb etadi. Bu kabi bilimlar sinovi mamlakatning ilmli va ijodiy fikrlaydigan yosh avlodini shakllantirishga yoʻnaltirilgani bilan ahamiyatlidir.

Ayniqsa, asosiy fanlar olimpiadasi umumtaʼlim tizimidagi muhim tadbirlardan biri hisoblanadi. Ushbu olimpiada matematika, fizika, biologiya, kimyo, ona tili va adabiyot, chet tili va boshqa asosiy fanlar boʻyicha oʻquvchilarning bilimlarini sinash uchun tashkil etiladi.

Asosiy olimpiadalar toʻrt bosqichda oʻtkaziladi. Birinchi bosqich maktablar miqyosida sentyabr oyida, ikkinchi bosqich, yaʼni tuman va shahar bosqichi oktyabr oyida, uchinchi bosqich Qoraqalpogʻiston Respublikasi, viloyatlar va Toshkent shahri miqyosida noyabr oyida, toʻrtinchi bosqich, yaʼni respublika miqyosidagi bosqich aprel-may oylarida oʻtkaziladi.

Joriy yilning 21-oktyabr sanasidan boshlab Amudaryo tumani Maktabgacha va maktab taʼlimi boʻlimiga qarashli umumtaʼlim maktablari oʻquvchilari oʻrtasida ham fanlar olimpiadasiga start berilgan edi. Mazkur tadbir tumandagi 40-, 55-, 76-sonli maktablarda Vazirlar Mahkamasining qarori bilan tasdiqlangan Nizom talablari asosida oʻtkazildi.

Asosiy fanlar olimpiadasi tuman bosqichi gʻoliblari va faxrli oʻrinlar egalari 82-sonli umumtaʼlim maktabida oʻtkazilgan tadbirda tantanali ravishda taqdirlandilar. Tadbirda Amudaryo tumani Maktabgacha va maktab taʼlimi boʻlimi boshligʻi Yalgʻash Shomuratov nutq soʻzlab, gʻolib va faol ishtirokchilarga omadlar hamda keyingi bosqichda muvaffaqiyatlar tiladi.

Aytish joizki, olimpiadada tumandagi 86ta maktablarning 9-11-sinflarida taʼlim olayotgan 2700ga yaqin oʻquvchi ishtirok etgan edi. Ular orasidan eng bilimli oʻquvchilar asosiy fanlar olimpiadasining tuman bosqichi gʻoliblari boʻlishdi va Qoraqalpogʻiston Respublikasi miqyosida oʻtkaziladigan uchinchi bosqichiga yoʻllanmani qoʻlga kiritdilar.

Oʻzbek tili bayrami arafasida oʻtkazilgan “Yilning eng yaxshi oʻzbek tili oʻqituvchisi” koʻrik-tanlovining Oʻzbekiston Respublikasi bosqichida tumandagi 40-sonli umumtaʼlim maktabining Ona tili va adabiyot fani oʻqituvchisi Iqboloy Yusufova faxrli 3-oʻrinni egallagan edi. Tadbir davomida Iqboloy Yusufovaga ham tuman Maktabgacha va maktab taʼlimi boʻlimining diplomi va esdalik sovgʻalari topshirildi.

Oʻtkazilgan olimpiada maktablardagi taʼlim-tarbiya sifati va samaradorligini aniqlashning mezoni sifatida ham xizmat qiladi. Qolaversa, bunday tadbirlar orqali oʻquvchilarda oʻz fanlariga boʻlgan qiziqish ortib, bilim va tajribalarini yanada mustahkamlash imkoniyati yaratiladi. Endilikda gʻolib oʻquvchilar keyingi bosqichga puxta tayyorgarlik koʻrishni boshlaydilar.

Maʼlumot oʻrnida, asosiy fanlar olimpiadasining uchinchi bosqichida gʻolib boʻlgan har bir oʻquvchiga pul mukofotlari beriladi. Jumladan, 1-oʻrinni egallagan oʻquvchiga — bazaviy hisoblash miqdorining 6 baravari, 2-oʻrin sohibiga yoki sohibasiga bazaviy hisoblash miqdorining 4 baravari, 3-oʻrinni egallagan ishtirokchiga esa bazaviy hisoblash miqdorining 3 baravari miqdorida mukofot puli beriladi. Toʻrtinchi bosqichda gʻolib boʻlgan har bir oʻquvchiga esa uchinchi bosqichdagidan 2 baravar koʻp miqdorda mukofot puli beriladi. Qolaversa, Vazirlik tomonidan asosiy olimpiadaning toʻrtinchi bosqichida 1-, 2- va 3-oʻrinlarni egallagan oʻquvchilarga ixtisoslik fani boʻyicha davlat oliy taʼlim muassasalariga kirish imtihonlarida maksimal ball olish huquqini beruvchi va uch yil muddat davomida amal qiluvchi diplom beriladi.

Asosiy fanlar olimpiadasining tuman bosqichi gʻoliblariga keyingi bosqichlarda ham omad va muvaffaqiyatlar tilaymiz!