1-SONLI MAKTABDA “ONA TILIM — SEN FAXRIM, GʻURURIM” MAVZUSIDA BAYRAMONA TADBIR OʻTKAZILDI

Til – davlat timsoli, bebaho mulki, millatning ruhi, madaniy va maʼnaviy boyligi, xalqning madaniyati, urf-odat va anʼanalari hamda turmush tarzining tarixidir. Shu bois, ona tilimizga hurmat va ehtirom – eng avvalo, millatga, ona Vatanga, tariximizga nisbatan buyuk ehtirom va eʼtibor ramzidir.

Shuning uchun ham mamlakatimizda 21-oktyabr sanasi Oʻzbek tiliga davlat tili maqomi berilgan kun – Mustaqillik sari ilk dadil qadam qoʻyilgan qutlugʻ sana sifatida qadrli. Chunki shu kuni vatanimizda davlat tilining huquqiy asoslarini belgilash boʻyicha “Davlat tili toʻgʻrisida”gi Qonun qabul qilinib, unga koʻra, oʻzbek tiliga davlat tili maqomi berildi. Ushbu sanada xalqimizning asriy orzusi ushaldi, muqaddas qadriyatlarimizdan biri boʻlgan ona tilimiz oʻzining qonuniy maqomi va himoyasiga ega boʻldi.

Mana 35-yildirki, mamlakatimizda 21-oktyabr sanasi istiqlol sari, oʻzlikni anglash sari tashlangan ilk qutlugʻ qadam – ona tilimizga davlat tili maqomi berilgan kun sifatida bayram qilinadi. Shu kuni taʼlim-tarbiya muassasalari, davlat va jamoat tashkilotlari ona tilimizni sharaflovchi shiorlar bilan bezatilib, adabiyot va sheʼriyat bayramlari, kitobxonlik kechalari, adabiy-musiqiy tadbirlar oʻtkaziladi.

Ushbu qutlugʻ sana munosabati bilan Amudaryo tuman Maktabgacha va maktab taʼlimi boʻlimi tasarrufidagi 1-sonli umumtaʼlim maktabida ham “Ona tilim – sen faxrim, gʻururim!” deb nomlangan maʼnaviy-maʼrifiy tadbir boʻlib oʻtdi.

Maktab pedagogika jamoasi hamda oʻquvchi-yoshlar ishtirok etgan mazkur bayramona tadbirni maktab direktorining oʻquv ishlari boʻyicha oʻrinbosari Sanobar Murodova ochdi va barchani ona tili bayrami bilan muborakbod etdi. Shu bilan birga, Sanobar Murodova ona tilimizning yil sayin jahon hamjamiyatida oʻz mavqeiga ega boʻlib, koʻplab rivojlangan davlatlarda oʻzbek tilini oʻrganishga boʻlgan qiziqish tobora ortib borayotgani xususida toʻxtaldi, muhtaram Prezidentimiz eng nufuzli anjumanlarda, xususan, Birlashgan Millatlar tashkiloti minbaridan turib oʻz ona tilimizda nutq soʻzlaganlari haqida faxrlanib soʻz yuritdi.

Tadbir davomida maktab oʻquvchilari tomonidan ona tilimizning qadr-qimmati, ona tiliga eʼtibor xususidagi “Fikrlar bekati” mushoirasi tashkil etilib, unda oʻquvchilar ona tiliga oid maqollar, bahri baytlar aytishdi. Mushoira bahsida esa oʻquvchi-yoshlar ona tilini sharaflovchi sheʼrlar aytishib, sahna koʻrinishlarini namoyish etdilar.

“Ona tilim – sen faxrim, gʻururim” deb nomlangan mazkur maʼnaviy-maʼrifiy tadbir adabiy-badiiy jihatdan yuksak saviyada oʻtkazilgani bois, har bir qalbda ona tilimizdan faxrlanish tuygʻusini uygʻotgani bilan muhim ahamiyat kasb etdi.

Muborak Xalillayeva, 1-sonli maktabning ona tili va adabiyot fani oʻqituvchisi.