Amudaryo tumanida koʻp sonli aholining tabiiy gaz bilan bogʻliq muammolari bartaraf qilinmoqda

Bugungi kunda davlatimiz rahbari tomonidan amalga oshirilayotgan tub islohotlar zamirida xalq farovonligi, inson manfaatlariga xizmat qilish kabi ezgu gʻoya yotadi. Prezident tashabbusi bilan xalqni uzoq yillar mobaynida qiynab kelayotgan muammolarini bartaraf qilish yuzasidan amaliy ishlar qilinmoqda. Amudaryo tumanidagi toʻrtta mahalla ­– Chordara, Boʻston, Oybek hamda Alisher Navoiy nomli mahallalarida yashovchi aholining tabiiy gaz bilan bogʻliq koʻp yillik muammolari bugun oʻzining ijobiy yechimini topayotgani ham ana shu islohotlarning amaldagi ifodasidir.

Muhtaram Prezidentimizning 2024-yil 17-iyul kungi mahallalar infratuzilmasini yaxshilash, aholi farovonligini oshirish maqsadida imzolagan maxsus qarori asosida amalga oshirilayotgan mazkur xayrli ish orqali aholining koʻp yillik muammolari ijobiy yechim topmoqda. Mazkur qaror asosida 2024-2025-yillar kuz-qish mavsumiga tayyorgarlik koʻrish maqsadida chora-tadbirlar dasturi ishlab chiqilgan boʻlib, qator amaliy ishlar qilinmoqda. Jumladan, Oʻrta qalʼa ovulining Vaxum aholi punktidagi 1,4 km gaz quvurlari rekonstruktsiya qilinib, foydalanishga topshirildi.

Shuningdek, Chordara mahallasi hududiga diametri 219 mm boʻlgan 1 km uzunlikdagi yer usti yuqori bosim gaz tarmogʻini tortish ishlari amalga oshirilmoqda.

Alisher Navoiy nomli mahalla hududiga 3,8 km yer usti gaz tarmogʻini tortish rejalashtirilgan boʻlib, hozirgi kunda 2,3 km joyi toʻliq tortildi.

Boʻston mahallasi hududiga diametri 114 mm, uzunligi 750 metr boʻlgan yer usti oʻrta bosim gaz tarmogʻini tortish rejalashtirilgan boʻlib, hozirda 730 metr qismi tortildi.

Oybek nomli mahalla hududiga esa diametri 114 mm, uzunligi 1,3 km yer usti oʻrta bosim gaz tarmogʻini tortish rejalashtirilgan boʻlib, hozirdi 420 metr joyi tortildi va bu boradagi ishlar davom ettirilmoqda. Qolaversa, 36 km gaz quvurlarini bosim ostida zichlikka sinash va havo bosimi yordamida tozalash rejalashtirilgan boʻlib, bugungi kungacha uzunligi 34 km boʻlgan quvurlarda sinash va taʼmirlash ishlari amalga oshirildi. 14,3 km uzunlikdagi yer osti va yer usti gaz quvurlarining holatini tekshirish rejasi esa 15,1 km qilib ortigʻi bilan bajarildi.

Qayd etish joizki, bu kabi amaliy ishlar “Hududgaz Qoraqalpogʻiston” korxonasining “Amudaryotumangaz” gaz taʼminoti boʻlimi tomonidan amalga oshirilmoqda. Mazkur boʻlim 40 ming 349ta isteʼmolchilarga xizmat koʻrsatadi. Shundan 14 ming 812ta aholi xonadonlari va 351ta ulgurji isteʼmolchilarga tabiiy gaz, 25 ming 186ta aholi xonadonlarga suyultirilgan gaz yetkazib beriladi. Bugungi kunda foydalanishda jami salkam 500 km gaz tarmoqlari mavjud boʻlib, shundan 35,1 km yuqori bosimli, 152,9 km oʻrta bosimli va 311,6 km past bosimli gaz quvurlari orqali isteʼmolchilar tabiiy gaz bilan taʼminlab kelinmoqda. Gaz quvurlarining 27,9 km qismi yer ostida va 471,7 km qismi yer ustida joylashgan.

Shuningdek, “Amudaryotumangaz” gaz taʼminoti boʻlimi tomonidan tabiiy gazdan samarali foydalanish, iqtisod qilish maqsadida energiya tejamkor uskunalardan foydalanish targʻib qilinmoqda. Aholi va ulgurji isteʼmolchilar tomonidan foydalanilayotgan tabiiy gaz miqdorini tejash boʻyicha targʻibot ishlarini olib borish maqsadida 27 ta yarmarka tashkil qilindi. Yarmarkalarda energiya tejamkor vositalarning afzalliklari, ulardan foydalanish boʻyicha maʼlumotlar berilib, keng targʻibot qilindi. Isteʼmolchilarga isitish qozoni va quvurlari, dudburonlari va zamonaviy tejamkor gorelka oʻrnatishning afzalliklarini tushuntirilayotgan natijasida 3  ming 339ta isitish qozoni va quvurlar izolyatsiya qilindi, 147ta aholi xonadonlarining, 14ta yuridik isteʼmolchilarning dudburonlari tozalandi.

Qolaversa, hozirda aholining kuz-qish mavsumini betalafot oʻtkazishiga koʻmaklashish borasida ham samarali ishlar davom etmoqda. 3 ming 373ta aholi xonadonlarini uzluksiz tabiiy gaz bilan taʼminlash maqsadida 6 ming 850 m tabiiy gaz tarmoqlarini mukammal taʼmirlash va rekonstruktsiya qilish ishlari davom etmoqda. Bundan tashqari, aholiga joriy yil 1-yanvardan 24-sentyabrgacha boʻlgan vaqt oraligʻida jami 3 ming 70 tonna suyultirilgan gaz yetkazib berish rejalashtirilgan boʻlib, shundan amalda 2 ming 967 tonna suyuq yoqilgʻi yetkazib berildi. Bu boradagi ishlar ham qizgʻin davom etmoqda.

Charos Arslonova, tuman hokimligining Axborot xizmati rahbari.