Амударё туманида кўп сонли аҳолининг табиий газ билан боғлиқ муаммолари бартараф қилинмоқда

Бугунги кунда давлатимиз раҳбари томонидан амалга оширилаётган туб ислоҳотлар замирида халқ фаровонлиги, инсон манфаатларига хизмат қилиш каби эзгу ғоя ётади. Президент ташаббуси билан халқни узоқ йиллар мобайнида қийнаб келаётган муаммоларини бартараф қилиш юзасидан амалий ишлар қилинмоқда. Амударё туманидаги тўртта маҳалла ­– Чордара, Бўстон, Ойбек ҳамда Алишер Навоий номли маҳаллаларида яшовчи аҳолининг табиий газ билан боғлиқ кўп йиллик муаммолари бугун ўзининг ижобий ечимини топаётгани ҳам ана шу ислоҳотларнинг амалдаги ифодасидир.

Муҳтарам Президентимизнинг 2024 йил 17 июль кунги маҳаллалар инфратузилмасини яхшилаш, аҳоли фаровонлигини ошириш мақсадида имзолаган махсус қарори асосида амалга оширилаётган мазкур хайрли иш орқали аҳолининг кўп йиллик муаммолари ижобий ечим топмоқда. Мазкур қарор асосида 2024-2025 йиллар куз-қиш мавсумига тайёргарлик кўриш мақсадида чора-тадбирлар дастури ишлаб чиқилган бўлиб, қатор амалий ишлар қилинмоқда. Жумладан, Ўрта қалъа овулининг Вахум аҳоли пунктидаги 1,4 км газ қувурлари реконструкция қилиниб, фойдаланишга топширилди.

Шунингдек, Чордара маҳалласи ҳудудига диаметри 219 мм бўлган 1 км узунликдаги ер усти юқори босим газ тармоғини тортиш ишлари амалга оширилмоқда.

Алишер Навоий номли маҳалла ҳудудига 3,8 км ер усти газ тармоғини тортиш режалаштирилган бўлиб, ҳозирги кунда 2,3 км жойи тўлиқ тортилди.

Бўстон маҳалласи ҳудудига диаметри 114 мм, узунлиги 750 метр бўлган ер усти ўрта босим газ тармоғини тортиш режалаштирилган бўлиб, ҳозирда 730 метр қисми тортилди.

Ойбек номли маҳалла ҳудудига эса диаметри 114 мм, узунлиги 1,3 км ер усти ўрта босим газ тармоғини тортиш режалаштирилган бўлиб, ҳозирди 420 метр жойи тортилди ва бу борадаги ишлар давом эттирилмоқда. Қолаверса, 36 км газ қувурларини босим остида зичликка синаш ва ҳаво босими ёрдамида тозалаш режалаштирилган бўлиб, бугунги кунгача узунлиги 34 км бўлган қувурларда синаш ва таъмирлаш ишлари амалга оширилди. 14,3 км узунликдаги ер ости ва ер усти газ қувурларининг ҳолатини текшириш режаси эса 15,1 км қилиб ортиғи билан бажарилди.

Қайд этиш жоизки, бу каби амалий ишлар “Ҳудудгаз Қорақалпоғистон” корхонасининг “Амударётумангаз” газ таъминоти бўлими томонидан амалга оширилмоқда. Мазкур бўлим 40 минг 349та истеъмолчиларга хизмат кўрсатади. Шундан 14 минг 812та аҳоли хонадонлари ва 351та улгуржи истеъмолчиларга табиий газ, 25 минг 186та аҳоли хонадонларга суюлтирилган газ етказиб берилади. Бугунги кунда фойдаланишда жами салкам 500 км газ тармоқлари мавжуд бўлиб, шундан 35,1 км юқори босимли, 152,9 км ўрта босимли ва 311,6 км паст босимли газ қувурлари орқали истеъмолчилар табиий газ билан таъминлаб келинмоқда. Газ қувурларининг 27,9 км қисми ер остида ва 471,7 км қисми ер устида жойлашган.

Шунингдек, “Амударётумангаз” газ таъминоти бўлими томонидан табиий газдан самарали фойдаланиш, иқтисод қилиш мақсадида энергия тежамкор ускуналардан фойдаланиш тарғиб қилинмоқда. Аҳоли ва улгуржи истеъмолчилар томонидан фойдаланилаётган табиий газ миқдорини тежаш бўйича тарғибот ишларини олиб бориш мақсадида 27 та ярмарка ташкил қилинди. Ярмаркаларда энергия тежамкор воситаларнинг афзалликлари, улардан фойдаланиш бўйича маълумотлар берилиб, кенг тарғибот қилинди. Истеъмолчиларга иситиш қозони ва қувурлари, дудбуронлари ва замонавий тежамкор горелка ўрнатишнинг афзалликларини тушунтирилаётган натижасида 3  минг 339та иситиш қозони ва қувурлар изоляция қилинди, 147та аҳоли хонадонларининг, 14та юридик истеъмолчиларнинг дудбуронлари тозаланди.

Қолаверса, ҳозирда аҳолининг куз-қиш мавсумини беталафот ўтказишига кўмаклашиш борасида ҳам самарали ишлар давом этмоқда. 3 минг 373та аҳоли хонадонларини узлуксиз табиий газ билан таъминлаш мақсадида 6 минг 850 м табиий газ тармоқларини мукаммал таъмирлаш ва реконструкция қилиш ишлари давом этмоқда. Бундан ташқари, аҳолига жорий йил 1 январдан 24 сентябргача бўлган вақт оралиғида жами 3 минг 70 тонна суюлтирилган газ етказиб бериш режалаштирилган бўлиб, шундан амалда 2 минг 967 тонна суюқ ёқилғи етказиб берилди. Бу борадаги ишлар ҳам қизғин давом этмоқда.

Чарос Арслонова, туман ҳокимлигининг Ахборот хизмати раҳбари.