Tuman prokuraturasi xodimlari faxriy hamkasbini bayram bilan tabriklashdi

Ustoz – har bir insonning kamolotida muhim rol oʻynaydigan shaxs. Ular bizga bilim berish bilan birga, hayotda toʻgʻri yoʻl tanlashga ham yordam beradilar va ong-u shuurimizga maʼnaviy qadriyatlarni singdiradilar. Ustozlarning nafaqat taʼlim va tarbiya jarayonidagi, balki ish jarayonidagi oʻrni ham nihoyatda salmoqlidir. Chunki ular amaliyotda shogirdlarga kasb va hunar sir-asrorlarini oʻrgatishga, ularning fikrlash qobiliyatini rivojlantirishga va mustaqil fikrlovchi insonlarga aylantirishga yordam beradilar.

Mamlakatimizda 1995-yildan beri 1-oktyabr Oʻqituvchi va murabbiylar kuni sifatida  keng nishonlanadi. Bu sanada nafaqat bizga harf yozishni va oʻqishni oʻrgatgan oʻqituvchi va murabbiylarimiz oldidagi, balki mehnat faoliyatimiz davomida maʼlum bir kasbning sir-asrorlarini qunt bilan oʻrgatgan ustozlarimiz oldidagi burchimiz ham yana bir bora esga olib, ularni bayram bilan qutlaymiz.

Tumanimizning moʻʼtabar, eʼzozli ayollaridan biri, umr boʻyi prokuratura sohasida mashaqqatlardan choʻchimay fidoyi mehnat qilgan Gulora Bobojonovaning nomi ham ardoqli ustozlar qatorida tilga olinadi. Bayram arafasida Amudaryo tumani Prokuraturasi xodimlari tizim faxriysining xonadoniga tashrif buyurib, bayram bilan muborakbod etdilar.

1-oktyabr – Oʻqituvchi va murabbiylar kuni munosabati bilan hamkasblarining oʻz xonadoniga tashrifi Gulora opaning cheksiz quvonchiga sabab boʻldi. Tizimda koʻp yillar davomida fidokorona xizmat qilib, yosh mutaxassislarni tarbiyalash, ularning bilim va malakasini  oshirish, kasbiy koʻnikmalarini  rivojlantirish, yoshlarni yetuk mutaxassis etib shakllantirish hamda faoliyatni ilmiy-metodik jihatdan taʼminlash ishiga salmoqli hissa qoʻshgani uchun Gulora  Bobojonova 2022-yilda “Faxriy xodim” koʻkrak  nishoni bilan taqdirlangan edi.

Joriy yilning yanvar oyida esa Oʻzbekiston Respublikasi prokuratura organlari xodimlari kuni munosabati bilan uning koʻp yillar davomida prokuratura tizimida samarali mehnat qilgani eʼtiborga olinib, Qoraqalpogʻiston Respublikasi Joʻqorgʻi Kengesi Prezidiumining 2024-yil 8-yanvardagi qaroriga muvofiq “Ibratli ayol” koʻkrak nishoni bilan taqdirlandi.

Fidoyi va kamtarin inson, oʻz sohasining yetuk bilimdoni, prokuratura organlarida uzoq yillar samarali ishlagan Gulora Bobojonovaning  mehnatlari eʼtirof etilishi mamlakatimizda inson omiliga eʼtiborning bir namunasi, desak adashmagan boʻlamiz.

Ushbu tashrif Prokuratura organlarida ham ustoz-shogird anʼanalari davom etib, bu yerda tajribali kadrlar yosh mutaxassislarga bilim va tajriba ulashayotganining, faxriylar mehnati qadrlanib, hayot yoʻli yoshlar uchun ibrat maktabi sifatida qadrlanayotganining amaliy isbotidir.