Tuman aholisining toza ichimlik suvi bilan taʼminlanganlik darajasini amaldagi 23 foizdan 80 foizga yetkazish maqsadida ikkinchi yirik loyihaga start berildi

Bugungi kunda butun mamalkatimiz boʻylab olib borilayotgan islohotlar zamirida aholi turmush tarzini yaxshilash, yashash sharoitlarini tubdan oʻzgartirish, xalqimizni uzoq yillar mobaynida qiynab kelayotgan muammolarni bartaraf qilish kabi ezgu maqsadlar yotadi. Amudaryo tumani aholisining toza ichimlik suvi bilan taʼminlanganlik darajasini oshirish, isteʼmolchilarga ichimlik suvini uzluksiz yetkazib berish borasida koʻrilayotgan choralar ham shular jumlasidandir.

Bu boradagi ishlarni yanada jadallashtirish maqsadida mustaqillik bayrami kunlarida tumanning Oʻrta qalʼa ovuli hududidagi suv taqsimlash inshootida tadbir oʻtkazildi. Tadbirda Ozarbayjon Respublikasidan kelgan pudratchi tashkilot “Archico Engineering company” tomonidan 68,5 km magistral va 289,2 km ichki suv tarmoqlarini tortish ishlariga start berildi.

Tadbirda tuman hokimi Sobir Xoʻjametov, sektorlar rahbarlari, hokim oʻrinbosarlari, tegishli tashkilotlar rahbarlari, ovul va mahalla fuqarolar yigʻinlari raislari ishtirok etdilar.

Tadbirda soʻzga chiqqanlar ushbu loyiha orqali tuman aholisining ichimlik suvi bilan taʼminlanganlik darajasi yanada oshib, isteʼmolchilarga ichimlik suvi yetkazib berish hajmi va sifati yanada yaxshilanishini alohida qayd etib oʻtdilar.

Taʼkidalanganidek, 29 mln. AQSh dollari miqdoridagi mablagʻ evaziga amalga oshiriladigan qurilish ishlari natijasida tuman hududidagi Choykoʻl, Tosh yop, Oʻrta qalʼa, Kuyuk koʻpir, Bobur nomli, Xitoy, Boʻz yop va Qilichboy ovullari, Bosuv, Arna boʻyi, Jumur ovul, Qizilcholi, Bogʻ, Xizr eli, Ayoqchi mahallalari hamda Mangʻit shahridagi barcha mahallalar hududlarida yashovchi 79 mingga yaqin aholi toza ichimlik suvi bilan taʼminlanadi.

Shu oʻrinda, maʼlumot tariqasida aytish joizki, Amudaryo tumanida 212,6 ming nafar aholi isiqomat qilib, shundan 49,5 ming nafari, yaʼni 23,3 foizi markazlashgan ichimlik suvi bilan taʼminlangan.

Oʻzbekiston Respublikasi Prezidentining 2019-yil 9-aprel kungi qaroriga asosan tumandagi aholi toza ichimlik suvi bilan qamrab olish darajasini yanada oshirish maqsadida “Osië taraqqiët banki” kredit mablagʻlari hisobidan jami salkam 42 mln. AQSh dollari miqdoridagi 2 ta yirik loyihani amalga oshirish rejalashtirilgan.

Loyiha doirasida sutkasiga 40 ming kub metr suv yetkazib berish quvvatiga ega boʻlgan “Mangʻit” suv tozalash inshooniti yangidan qurish hamda 68,5 km magistral va 289,2 km ichki suv tarmoqlarini tortish belgilangan.

Taʼkidlash joizki, Oʻzbekiston Respublikasi Prezidentining “Osiyo taraqqiyot banki ishtirokida “Oʻzbekistonning gʻarbiy qismida ichimlik suvi taʼminoti tizimlarini rivojlantirish” loyihasini amalga oshirish chora-tadbirlari toʻgʻrisida”gi qarori bu boradigi ishlarda muhim dasturulamal boʻlmoqda. Qaror asosida amalga oshirilayotgan keng koʻlamli qurilish va ishlari xalq farovonligiga xizmat qilmoqda.

Xususan, bugungi kunda sutkasiga 40 ming kub metr suv yetkazib berish quvvatiga ega boʻlgan “Mangʻit” suv tozalash inshooniti yangidan qurish ishlari pudratchi tashkilotlar ­– “Obi hayot injiniring” MChJ hamda “Uy-jay qurilis” MChJ tomonidan boshlab yuborilgan.

Ushbu loyihalar doirasidagi ishlarni amalga oshirish orqali tuman aholisining toza ichimlik suvi bilan taʼminlanganlik darajasini 80 foizga yetkazish koʻzda tutilmoqda.

Charos Arslonova, tuman hokimligining Axborot xizmati rahbari.