Туман аҳолисининг тоза ичимлик суви билан таъминланганлик даражасини амалдаги 23 фоиздан 80 фоизга етказиш мақсадида иккинчи йирик лойиҳага старт берилди

Бугунги кунда бутун мамалкатимиз бўйлаб олиб борилаётган ислоҳотлар замирида аҳоли турмуш тарзини яхшилаш, яшаш шароитларини тубдан ўзгартириш, халқимизни узоқ йиллар мобайнида қийнаб келаётган муаммоларни бартараф қилиш каби эзгу мақсадлар ётади. Амударё тумани аҳолисининг тоза ичимлик суви билан таъминланганлик даражасини ошириш, истеъмолчиларга ичимлик сувини узлуксиз етказиб бериш борасида кўрилаётган чоралар ҳам шулар жумласидандир.

Бу борадаги ишларни янада жадаллаштириш мақсадида мустақиллик байрами кунларида туманнинг Ўрта қалъа овули ҳудудидаги сув тақсимлаш иншоотида тадбир ўтказилди. Тадбирда Озарбайжон Республикасидан келган пудратчи ташкилот “Archico Engineering company” томонидан 68,5 км магистрал ва 289,2 км ички сув тармоқларини тортиш ишларига старт берилди.

Тадбирда туман ҳокими Собир Хўжаметов, секторлар раҳбарлари, ҳоким ўринбосарлари, тегишли ташкилотлар раҳбарлари, овул ва маҳалла фуқаролар йиғинлари раислари иштирок этдилар.

Тадбирда сўзга чиққанлар ушбу лойиҳа орқали туман аҳолисининг ичимлик суви билан таъминланганлик даражаси янада ошиб, истеъмолчиларга ичимлик суви етказиб бериш ҳажми ва сифати янада яхшиланишини алоҳида қайд этиб ўтдилар.

Таъкидаланганидек, 29 млн. АҚШ доллари миқдоридаги маблағ эвазига амалга ошириладиган қурилиш ишлари натижасида туман ҳудудидаги Чойкўл, Тош ёп, Ўрта қалъа, Куюк кўпир, Бобур номли, Хитой, Бўз ёп ва Қиличбой овуллари, Босув, Арна бўйи, Жумур овул, Қизилчоли, Боғ, Хизр эли, Аёқчи маҳаллалари ҳамда Манғит шаҳридаги барча маҳаллалар ҳудудларида яшовчи 79 мингга яқин аҳоли тоза ичимлик суви билан таъминланади.

Шу ўринда, маълумот тариқасида айтиш жоизки, Амударё туманида 212,6 минг нафар аҳоли исиқомат қилиб, шундан 49,5 минг нафари, яъни 23,3 фоизи марказлашган ичимлик суви билан таъминланган.

Ўзбекистон Республикаси Президентининг 2019 йил 9 апрель кунги қарорига асосан тумандаги аҳоли тоза ичимлик суви билан қамраб олиш даражасини янада ошириш мақсадида “Осиë тараққиëт банки” кредит маблағлари ҳисобидан жами салкам 42 млн. АҚШ доллари миқдоридаги 2 та йирик лойиҳани амалга ошириш режалаштирилган.

Лойиҳа доирасида суткасига 40 минг куб метр сув етказиб бериш қувватига эга бўлган “Манғит” сув тозалаш иншоонити янгидан қуриш ҳамда 68,5 км магистрал ва 289,2 км ички сув тармоқларини тортиш белгиланган.

Таъкидлаш жоизки, Ўзбекистон Республикаси Президентининг “Осиё тараққиёт банки иштирокида “Ўзбекистоннинг ғарбий қисмида ичимлик суви таъминоти тизимларини ривожлантириш” лойиҳасини амалга ошириш чора-тадбирлари тўғрисида”ги қарори бу борадиги ишларда муҳим дастуруламал бўлмоқда. Қарор асосида амалга оширилаётган кенг кўламли қурилиш ва ишлари халқ фаровонлигига хизмат қилмоқда.

Хусусан, бугунги кунда суткасига 40 минг куб метр сув етказиб бериш қувватига эга бўлган “Манғит” сув тозалаш иншоонити янгидан қуриш ишлари пудратчи ташкилотлар ­– “Оби ҳаёт инжиниринг” МЧЖ ҳамда “Уй-жай қурилис” МЧЖ томонидан бошлаб юборилган.

Ушбу лойиҳалар доирасидаги ишларни амалга ошириш орқали туман аҳолисининг тоза ичимлик суви билан таъминланганлик даражасини 80 фоизга етказиш кўзда тутилмоқда.

Чарос Арслонова, туман ҳокимлигининг Ахборот хизмати раҳбари.