Ахборот-кутубхона марказида жадидлар ижоди ва фаолиятига бағишланган тадбир ҳамда “Заковат” интеллектуал ўйини ташкил қилинди
Мамлакатимизда китобхонлик маданиятини ривожлантириш, фаол китобхонлар сафини кенгайтириш, аҳоли, айниқса ёш авлоднинг интеллектуал салоҳиятини ошириш мақсадида жойларда турли тадбирлар, адабий-бадиий кечалар, маънавий-марифий давра суҳбатлари ҳамда интеллектуал ўйинлар ташкил қилинмоқда.
Амударё тумани Ахборот-кутубхона марказида ҳам ёшлар ўртасида китобхонликни тарғиб қилиб, кенг оммалаштириш мақсадида жадидлар ижоди ва фаолиятига бағишланган тадбир ҳамда билимдонлар беллашуви – “Заковат” интеллектуал ўйини ташкил қилинди.
Ахборот-кутубхона марказидаги жадид адабиёти намоёндалари асарларидан тайёрланган махсус кўргазма тадбирга ташриф буюрган ўқувчиларда катта қизиқиш уйғотди.
Тадбирда туман Маънавият ва маърифат маркази мутахассиси Зарифа Соатбоева, 3-сонли умумтаълим мактаби кутубхонаси ходими Тазахан Қидирниязова, шу мактабнинг юқори синф ўқувчилари ҳамда Ахборот-кутубхона маркази ходимлари иштирок этди.
Тадбир аввалида марказ мутахассислари Рохатой Раманова, Соҳиба Бозорбоева ва Муножат Сафарбоевалар сўзга чиқиб, ватанимиз озодлиги ва ободлиги, халқ маърифати ва соадати учун умрини бағишлаган жадид боболаримиз, уларнинг ҳаёт йўли, миллий уйғониш ғоялари ҳақида фикрларини айтиб ўтди.
Шундан кейин “Билимли ва маънавиятли ёшлар билан учинчи Ренессанс сари” шиори остида туман Маънавият ва маърифат бўлими билан ҳамкорликда 3-сонли умумтаълим мактаби ўқувчилари орасида билимдонлар беллашуви – “Заковат” интеллектуал ўйинига сатарт берилди.
Интеллектуал ўйинда “Билимдонлар” ва “Аязбий” гуруҳлари ўзаро куч синашди. Жараён давомида ўқувчилар билимини туман Маънавият ва маърифат маркази ходими Зарифа Соатбоева, 3-сонли умумтаълим мактаби кутубхонаси ходими Тазахон Қидирниязова ҳамда Ахборот-кутубхона маркази мутахассислари Рохатой Раманова ҳамда Гуласал Қўчқаровалардан иборат ҳакамлар ҳайъати баҳолаб борди. Ўйинни Ахборот-кутубхона маркази ходими Соҳиба Бозорбоева бошқарди. Интеллектуал ўйинда ўқувчилар билимини синовдан ўтказиб, улар янги маълумотларга эга бўлишди.
Тадбир давомида ўқувчилар жадид боболаримиз ва қороқалпоқ шоирлари ижодидан ёд олган шеърларни ифодали ўқишди. Бу шеърларда ватанпарварлик туйғулари ва илм – ягона нажот деган ғоя тарғиб қилингани йиғилганларга ниҳоятда манзур бўлди.
3-сонли умумталим мактабининг 5-синф ўқувчиси Нурбек Аманбаев дутор халқ чолғу асбобини чалиб ижро қилган қўшиқлари барчага хуш кайфият бағишлади. Юртга муҳаббат ва садоқат акс этган мусиқа садолари барчани таъсирлантирди.
Ўқувчи қизлар тамонидан тайёрланиб, ижро қилинган рақс эса кечага янада файз киритди. Раққосанинг нафис ҳаракатлари беғубор ёшликнинг гўзал дамларини, унитилмас хотираларни эслатди, гўё.
Тадбир якунида фаол ўқувчиларга ташкилотчилар томонидан диплом ва эсталик совғалари топширилди. Туман Ахборот-кутубхона маркази ходимлари ёшлардан доимий равишда кутубхонага келишларини сўраб, иштирок учун самимий миннатдорчилик изҳор қилишди.
Мана шундай оммавий китобхонлик тарғиботи ва маънавий-маърифий тадбирлар ёшлар қалбида китобларга меҳр ва эҳтиром туйғуларини янада кучайтириши шубҳасиз. Бу эса жамиятда китобхонларнинг, илм-маърифат эгаларининг мавқаеини янада оширади.
Илм зиёси тафаккуримизни теранлаштириб, эзгу ғояларга чорлар экан, ҳар доим ҳам китоб ва кутубхоналарга эҳтиёжимиз ортаверади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
