Туманимиздаги кичик саноат зонасидаги тадбиркорлар фаолияти янада ривожлантирилмоқда

Амударё туманида тадбиркорлик фаолиятини ривожлантириш борасида самарали ишлар амалга оширилмоқда. Давлатимиз томонидан тадбиркорларга берилаётган имкониятлар тарғиб қилиниб, тадбиркорлар ҳар томонлама қўллаб-қувватланмоқда.

Тумандаги кичик саноат зонасида иш юритаётган тадбиркорлар бу каби имтиёз ва имкониятлардан унумли фойдаланиб, ўз фаолиятларини янада кенгайтирмоқдалар.

Жумладан, кичик саноат зонасида жойлашган “Тамара Текстиль” МЧЖ Президентимизнинг “Қорақалпоғистон Республикасида тадбиркорларга қулай шароитлар яратишга оид қўшимча чора-тадбирлар тўғрисида”ги фармонида белгилаб берилган имкониятлардан фойдаланиб, ишчи аёл-қизлар сони 15 нафардан 44 нафарга оширди. Айни пайтда, туманимиздаги овул маҳаллаларда банд бўлмаган хотин-қизлар касб-ҳунарга ўқитилиб, мазкур МЧЖга ишга жойлашмоқда ҳамда уларнинг бандлиги таъминланмоқда.

Таъкидлаш жоизки, давлатимиз раҳбарининг Қорақалпоғистон Республикасига ташрифи мобайнида ҳудудни ижтимоий-иқтисодий ривожлантириш борасида қатор ислоҳотларни илгари сурилди. Хусусан, Қорақалпоғистон Республикасида тадбиркорлик фаолиятини ташкил этишни ва юқори қўшилган қийматли рақобатбардош маҳсулотлар ишлаб чиқаришни рағбатлантириш орқали ҳудудга инвестицияларни жалб қилиш учун қулай шароитлар яратиш, шунингдек, тадбиркорларнинг таклифларини бевосита ўрганиш асосида келгуси етти йилда ривожлантиришнинг белгиланган пировард натижаларига эришиш мақсадида имзоланган “Қорақалпоғистон Республикасида тадбиркорларга қулай шароитлар яратишга оид қўшимча чора-тадбирлар тўғрисида”ги Президент фармони тадбиркорлик фаолияти ривожини янги босқичга кўтаришда муҳим дастуруламал бўлмоқда.

Кичик саноат зонасидаги ташаббускор тадбиркорлардан яна бири Жасур Бобожонов давлатимиз раҳбарининг мазкур фармонига асосан имтиёзли кредит олган. Ушбу кредит маблағларини темир маҳсулотлари ишлаб чиқариш учун зарур бўлган замонавий ускуналарни олиб келишга йўналтирган. Ҳозирда тадбиркор 15 нафардан ортиқ йигитларни иш билан таъминлаб, туман иқтисоди ривожига муносиб ҳисса қўшмоқда. Келгусида янги замонавий ускуналар харид қилиб, янги иш ўринлари яратиш ҳамда иш билан банд бўлмаган фуқароларнинг бандлигини таминлашни режалаштирмоқда.

Кичик саноат зонасидаги чорва моллари учун омухта ем ишлаб чиқаришга ихтисослашган “Юксалиш Брокер Сервис” МЧЖ ҳам яратилаётган имкониятлардан самарали фойдаланиб фаолият юритмоқда. Мазкур МЧЖ мототранспорт воситаларининг эҳтиёт қисмларини чет давлатларидан олиб келиш ҳамда йиғиб териш ишларини амалга ошириб келмоқда. Эндиликда тадбиркор чет элдан керакли ускуналарни олиб келиб, мототранспорт воситаларининг эҳтиёт қисмларини ишлаб чиқаришни ҳам режалаштирмоқда.

Қайд этиш жоизки, давлатимиз раҳбарининг “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги фармони ҳудуддаги тадбиркорлар учун кенг имконият эшикларини очди.

Мазкур ҳужжат Қорақалпоғистон Республикасининг мавжуд ижтимоий-иқтисодий, шу жумладан ишлаб чиқариш ва инвестиция салоҳиятидан самарали фойдаланиш, тадбиркорлик фаолиятини ривожлантириш ва юқори қўшилган қийматга эга рақобатбардош маҳсулотлар ишлаб чиқаришни рағбатлантириш, тадбиркорларга кўрсатиладиган молиявий хизматлар кўламини кенгайтириш, инфратузилмавий шарт-шароитларни яратиб бериш орқали аҳоли бандлигини таъминлаш ҳамда ҳудуднинг иқтисодий ва ижтимоий ривожланишини янги босқичга олиб чиқиш каби устувор мақсадларга хизмат қилмоқда.

Чарос Арслонова, туман ҳокимлигининг Ахборот хизмати раҳбари.