ИНТИЛУВЧАН ТАДБИРКОР
Мамлакатимизда бугунги кунда аёллар тадбиркорлигини ривожлантиришга қаратилаётган эътибор ва имтиёзлар Амударё туманидаги «Tamara Textile» масъулияти чекланган жамияти раҳбари Тамара Юсупова каби аниқ мақсади томон дадил интилаётган фаол аёлларга янада куч-ғайрат бағишлайди.
Асл тадбиркор кишилар доимо ўз ишбилармонлиги билан фаровонликка эришган. Фақат ўзларинигина эмас, балки эл-юрт тараққиётига ва фаровонлигига ҳисса қўшаётган инсонлар сафи кенгайиб бораётгани янада қувонарли.
Шиддат билан ривожланиб бораётган замон одамлардан давр билан ҳамнафас бўлишни, тенгма-тенг қадам ташлаш учун доим изланишни, ўқиб-ўрганишни талаб қилмоқда. Биз ҳикоя қилмоқчи бўлган тадбиркор аёл – Амударё туманининг Қиличбой овулида туғилиб-ўсган, айни кунда тикувчилик соҳасида катта бизнесига эга Тамара Юсуповадир. У 2009 йилда тикувчилик бўйича тадбиркорлик фаолиятини бошлаган. Шижоатли, илғор, қадамидан ўт чақнайдиган аёлларни кўрсам, Тўмарис авлоди эканлигимиздан ғурурланаман. Тамара Юсупова билан танишганим сайин юқоридаги фикр хаёлимга келади.
Давлатмиз раҳбарининг аёллар тадбиркорлиги ва ишбилармонлигини қўллаб-қувватлаш мақсадида жорий этаётган имкониятларидан илҳомланиб, туманимизда тикувчилик цехи очган Тамара Юсупованинг амалга ошираётган ишлари билан танишиш жараёнида аёлнинг ишбилармон бўлиши жамиятнинг ривожи учун қанчалик муҳим роль ўйнашига яна бир карра амин бўлдик.
Мамлакатимизда олиб борилаётган ўзгаришлардан илҳомланиб юрт равнақи учун ўз ҳиссасини қўшиш истагида тадбиркор дастлаб 3 млн. сўм, кейинчалик 40 млн. Сўмлик банк кредитлари эвазига фаолиятини бошлади.
Тадбиркор аёл кредит эвазига олинган маблағга турли тикув машиналари, дазмол столлари, тикув цехи учун зарур бўладиган асбоб-ускуналар сотиб олиб, иш фаолиятини мунтазам равишда кенгайтириб борди.
Ишга астойдил бел боғлаган қаҳрамонимиз ишсиз ёшларнинг бандлигини таъминлаб, кўплаб шогирдлар тайёрлади. Бугунги кунда эса буюртмалар асосида аёллар, эркаклар ва болалар кийимларини сифатли ва ҳамёнбоп нархларда тайёрлаб, харидорларга етказиб бермоқда.
Мазкур корхона томонидан 2019-2021 йилларда жами 671,8 миллион сўмлик, жумладан, 2019 йилда 134,8 миллион, 2020 йилда 217 миллион, 2021 йилда 320 миллион сўмлик кийим-кечак маҳсулоти ишлаб чиқарилди. Унинг ишни тўғри ташкил этиши натижасида корхона томонидан кейинги уч йилда 874,8 миллион сўм даромад олиниб, 203 миллион сўм соф фойда олишга эришилди. 2019-2021 йиллар мобайнида корхонада ишлаб чиқариш цехларини ишга тушириш, кенгайтириш эвазига 25 та янги иш ўрни яратилди.
У республика миқёсида ўтказиладиган турли тадбир ва кўрик-танловларда фаол қатнашиб келади. Жумладан, 2009 йилда Тошкент шахрида ўтказилган «Қўли гулдир ўзбек аёлин» номли кўргазмасида, 2012 йилда «Тақдиримсан, бахтимсан, эркин ва обод Ватан!» тадбирида мамлакатимиз равнақига қўшган ҳиссаси учун Ўзбекистон хотин-қизлар қўмитаси томонидан «Ташаккурнома» билан тақдирланди.
2021 йилнинг ноябрь ойида эса «Энг яхши иш берувчи тадбиркор аёл» кўрик танловининг Қорақалпоғистон Республикаси босқичида биринчи ўринни қўлга киритди.
Тамара Юсупова ўзининг янгиликларга интилиши ва иш тажрибаси билан ҳар йили ўтказилиши анъанага айланган “Ташаббус” кўрик-танловида фаол иштирок этиб, бир неча марта ғолиблар сафидан жой олди.
Ўзбекистон Республикаси Президентининг 2023 йилнинг 17 августдаги фармойишига биноан, миллий иқтисодиётимизни барқарор юксалтириш, юртимизда ишбилармонлик муҳитини янада яхшилаш, тадбиркорлик ривожини янги босқичга кўтариш, мамлакатимизнинг ишлаб чиқариш ва экспорт салоҳиятини ошириш борасидаги катта хизматлари, соҳага инновацион технологияларни жорий этиш, иш ўринлари яратиш, аҳоли фаровонлигини таъминлашга қўшган муносиб ҳиссаси, шунингдек, бизнесда эришаётган амалий натижалари ҳамда ижтимоий ҳаётдаги фаол ишироки учун Тамара Юсупова “Фаол тадбиркор” кўкрак нишони билан тақдирланди.
Тадбиркор Халқ депутатлари Амударё тумани Кенгаши депутати сифатида ҳам фаол иш олиб бормоқда.
Тамара Юсупованинг фаолиятини биргина мақолага сиғдириш жуда қийин. Унингдек ташаббускор, тадбиркор аёллар сафи кенгайиб, мамлакатимиз иқтисодиёти ва халқимиз фаровонлиги бунданда юксалаверишига тилакдошмиз!
Севара Исмоилова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
