“ҚАЛДИРҒОЧ” БОЛАЛАР ОРОМГОҲИ ТАРБИЯЛАНУВЧИЛАРИ УЧУН КУТУБХОНАГА САЁҲАТ УЮШТИРИЛДИ

Ёшлар маънавиятини юксалтириш, улар онгида Ватанга муҳаббат, миллий ва умуминсоний қадриятларга садоқат руҳини шакллантириш, Президентимиз томонидан илгари сурилган беш муҳим ташаббуснинг бири – ёшлар китобхонлигини ривожлантириш, уларнинг бўш вақтларини мазмунли ўтказиш, мафкура майдонининг турли хуружларидан ҳимоя қилиш, маънавий дунёсини бойитиш мақсадида Амударё телевидениеси ижодий жамоаси томонидан таълим муассасалари ўқувчилари ва уюшмаган ёшлар ўртасида доимий равишда турли кўрик-танловлар, давра суҳбатлари, таниқли ёзувчи ва шоирлар билан учрашувлар ўтказилиб келинмоқда.

Ана шундай тадбирлардан бири Дўрман овулидаги хушманзара маскан – “Қалдирғоч” болалар оромгоҳида ҳам бўлиб ўтди. Ёзги таътил пайтида Амударё туманининг турли ҳудудларидаги мактабларнинг ўқувчилари мириқиб дам олаётган мазкур болалар оромгоҳида уларнинг спорт, мусиқа ва китобхонлик билан шуғулланишлари, информатика хонасида  компьютер технологиялари билан ишлашни пухта ўрганишлари учун барча шароитлар яратилган. Болалар оромгоҳи раҳбари Зафар Абдуллаевдан тортиб, оромгоҳга биркитилган Миллий гвардия ходими Жамол Айбосинов, инспектор-психолог, майор Омон Хожаназаров, Ички ишлар бўлимидан масъул Амангалди Оринбаев, тиббиёт ходимлари, тарбиячи-энагаларнинг ўз ишларини кўнгилдагидек олиб боришаётганлари боис, оромгоҳда дам олаётган болаларнинг барчаси ўтаётган ҳар бир лаҳзадан мамнун.

Шуниси эътиборлики, оромгоҳда ҳар бир боланинг қизиқишлари, албатта инобатга олинади ва уларнинг иқтидорларини ривожлантиришга қаратилган машғулотлар олиб борилади. Бунда тарбиячилар – 53-сонли мактаб ўқитувчилари Икром Қурбонбоев, Малоҳатхон Матсафоевалар мусиқа йўналиши бўйича, Сурайё Қурбониёзова ва информатика фанидан қизиқарли машғулотлар олиб боришади. Шахмат ва бадиий ҳаваскорлик тўгараги машғулотларидан болалар олам-олам завқ олишади.

Жорий йилнинг 26 июнь санасида Амударё телевидениесининг “Юксак маънавиятли ёшлар – келажак пойдевори” грант лойиҳаси доирасида оромгоҳ тарбияланувчилари учун кутубхонага саёҳат тадбири уюштирилди. Спорт, бадиий ҳаваскорлик ва компьютер технологиялари тўгараклари машғулотларидан сўнг болалар кутубхонага саёҳат қилишиб, олам-олам завқ олдилар. Уларнинг ҳар бири ўзлари севган ёзувчи ва шоирларнинг асарларини танлаб олишиб, шу ернинг ўзидаёқ мутолаани бошлаб юборишди.

Кутубхонага саёҳат тадбирида “Юксак маънавиятли ёшлар – келажак пойдевори” грант лойиҳаси координатори Қорақалпоғистон Республикасида хизмат кўрсатган журналист, Ўзбекистон Ёзувчилар Уюшмаси аъзоси, шоира Робия Йўлдошева ўқувчи-ёшларга китобнинг, китобхонликнинг инсон ҳаётида тутган ўрни, инсоннинг шахс сифатида шаклланишидаги аҳамияти хусусида сўз юритиб, китобхон болаларнинг қизиқишлари, ўзбек ва жаҳон адабиёти намоёндаларининг асарлари ва улар яратган қаҳрамонлар ҳақида улар билан дилдан суҳбатлашди ва Амударё туманидан етишиб чиққан ёш, умидли шоира, 35-сонли мактаб битирувчиси, Зулфия номидаги давлат мукофоти соҳибаси, қатор халқаро ташкилотлар томонидан волонтёрлик, репортёрлик ва жамоатчилик фаолиятлари учун турли даражадаги кўкрак нишонлари билан тақдирланган Барнохон Самандаровани болаларга ўрнак қилиб кўрсатди. Ўз навбатида Барнохон Самандарова ўқувчиларга китоб мутолааси туфайли ҳаётида қувончли ютуқларга эришаётгани, умумтаълим мактабини олтин медал билан тугатиб, 2022-2023 ўқув йилида муддатидан олдин талаба бўлганини айтиб, китобхон ўқувчиларнинг саволларига жавоб берди.

Тадбир давомида ўқувчилар оромгоҳ кутубхонасига аъзо бўлганликларини айтишиб, ўзлари ўқиган китобларидан олган таассуротлари ҳақида сўзлаб бердилар. Хусусан, 28-сонли мактабнинг 7-синф ўқувчиси Беҳзод Ортиқов Аҳмад Яссавий ғазалларидан, 39-сонли мактаб ўқувчиси Заҳрохон Жумабоева Алишер Навоий ғазалларидан ўқиб бердилар.

Шунингдек, оромгоҳ тарбияланувчилари кутубхонага уюштирилган саёҳатдан мамнун эканликларини билдиришиб, ҳозирги замон ўзбек адабиёти намоёндалари асарлари юзасидан ўзларини қизиқтирган саволлар билан мурожаат қилдилар ва барча саволларига “Юксак маънавиятли ёшлар – келажак пойдевори” лойиҳаси доирасидаги мазкур тадбир ташкилотчилари томонидан қизиқарли жавоблар олдилар.

Маҳмуджон Шомуродов, Равшан Баҳромов, Амударё телевидениеси мухбарлари.