56-сонли мактабда “Ёш китобхонлар” танлови бўлиб ўтди
Қадимдан китоб мутолааси шахсни тарбиялашда унинг индивидуал хусусиятларини очиб беришда муҳим ва ажралмас рол ўйнаган, шунингдек унинг шаклланишида муҳим омил бўлиб хизмат қилган. Шу нуқтаи назардан, замонавий дунёда китоб мутолааси биринчи навбатда узлуксиз таълим тизимида, шу жумладан, ҳар кимнинг кундалик фаолиятида алоҳида ўрин тутиши лозим. Мамлакатимизда бу масалага жиддий эътибор берилиб давлат сиёсати даражасига олиб чиқилди.
Амударё туманида ҳам ёш авлодни юксак манавиятли ёшлар этиб тарбиялаш, китобга бўлган меҳр-муҳаббатини ошириш борасида кенг кўламли саъй-ҳаракатлар олиб борилмоқда.
Айниқса, умумтаълим мактаб ўқувчилари ўртасида мунтазам равишда ўтказилиб келинадиган “Ёш китобхонлар” танлови алоҳида аҳамиятга эга.
24 май куни Дурунки маҳалласи ҳудудида жойлашган 56-сонли мактабда “Ёш китобхонлар” танлови бўлиб ўтди. Танловда 6-, 7-, 8-синф ўқувчилари фаол иштирок этишди.
Танлов 3 та шарт асосида олиб борилди. Биринчи шартда ўқувчилар билетлар остига яширинган бадиий асар ҳақида маълумот бериб, ўз шахсий фикрларини ифода этишди. Иккинчи шартда қатнашчилар суратдаги шоир ёки ёзувчинининг ким эканлигини топиб, унинг ҳаёти ижоди ҳақида батафсил маълумот беришди. Учинчи шартда эса билетда келтирилган шоирнинг шеърини ифодали тарзда ўқиб, ўзларининг шахсий фикрларини баён этишди.
Ҳакамлар ҳайъати аъзолари – Алламберган Жуманиёзов, Мадина Ражабова, Фотима Эшимбетова, Нафосат Тиловбаевалар барча иштирокчиларнинг чиқишларини диққат билан кузатиб одилона баҳолаб боришди.
Танлов якунида ғолиб бўлган иштирокчилар Дурунки маҳалласининг ёшлар етакчиси Хуррамбек Қаландаров ҳомийлигида тайёрланган пул мукофотлари билан тақдирланишди.
Якуний натижаларга кўра, 1-ўринни 84 балл билан 6-“Б” синф ўқувчиси Феруза Каримова, 2-ўрнни 73 балл билан 7 -“А” синф ўқувчиси Райҳона Тўрабоева, 3-ўринни 62 балл билан 7-“Б” синф ўқувчиси Чарос Тангирбергеновалар эгаллади.
Биринчи ўрин соҳибасига 300 минг сўм, иккинчи ўрин соҳибасига 200 минг сўм, учинчи ўрин соҳибасига 100 минг сўм пул мукофотлари тантанали тарзда топширилди. Шунингдек, танлов ғолиблари қадимий ва навқирон Хива шаҳрига саёҳатга олиб бориладиган бўлди.
Ўқувчилар ўзларига кўрсатилган бу каби эътибордан мамнун бўлиб, янада олға интилишга, бунданда кўп бадиий китоблар ўқишга ҳаракат қилишларини айтиб ўтишди.
Ушбу тадбирни ташкил этишда шу мактабнинг ижодий-маданий масалалар бўйича тарғиботчиси Алламберган Жуманиёзовнинг хизматлари катта бўлди. Ижодий маданий масалалар бўйича тарғиботчининг ўқувчилар билан дарс машғулотларидан бўш пайтда китобхонлик тўгаракларини ташкил этиб, улар билан доимий равишда шуғулланишлари туфайли бўлиб ўтган танлов улар учун асло қийинчилик туғдирмади.
Ўқувчилар ўқиган бадий асарларини равон тилда ифода этиб беришди. Умумтаълим мактабларида ўтказилиб келинаётган китобхонлик тадбирлари ўқувчиларнинг дунёқараши кенгайишида ва шахсий фикри ривожланишда муҳим аҳамиятга эга бўлмоқда.
Ф.Эшимбетова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
