Президент Фармони аҳоли ва тадбиркорларга енгилликлар яратмоқда

Ҳудудлар ўртасидаги иқтисодий тенгсизликни қисқартириш, туман ва шаҳарларни уларнинг шароити, салоҳияти ва имкониятларидан келиб чиқиб ривожлантириш бўйича янгича ёндашувларни жорий этиш, шунингдек, тадбиркорлик муҳитини янада яхшилаш, давлат кўмагини бериш тартибини такомиллаштириш ва унинг самарадорлигини оширишга хизмат қилувчи Президент Фармони қабул қилинган эди.

2022 йил 30 декабрда қабул қилинган “Республика ҳудудларини тоифаларга ажратиш ва тадбиркорликни қўллаб-қувватлашнинг табақалаштирилган тизимини жорий этиш чора-тадбирлари тўғрисида”ги ушбу Фармонга кўра эндиликда Республика туман ва шаҳарлари иқтисодий аҳволи ва салоҳиятидан келиб чиқиб, 2023 йил 1 январдан 5 та тоифага ажратилди. Ҳар уч йилда Давлат бюджети параметрларини шакллантириш жараёнида туман ва шаҳарларнинг ижтимоий-иқтисодий ривожланиш ҳолатидан келиб чиқиб, Вазирлар Маҳкамаси Қарорига кўра уларнинг тоифалари ўзгартириб борилади.

Фармонга мувофиқ туман ва шаҳар тоифасидан келиб чиқиб, тадбиркорлик субъектларига солиқ имтиёзлари, субсидиялар ажратилади ва уларни қўллаб-қувватлашнинг бошқа чоралари қўлланилади.

Асосий кўрсаткичларига кўра 4-тоифага киритилган Амударё туманида ҳам Фармон ижроси юзасидан муайян ишлар олиб борилмоқда.

Маълумки, мазкур Фармонда 4-тоифага кирган туманлардаги рўйхатдан ўтган ва шу ҳудудларда фаолият юритадиган тадбиркорлик субъектлари учун айланмадан олинадиган солиқнинг базавий ставкаси 3 фоиз этиб белгиланади. Аҳолига, тадбиркорлик субъектларига оширилган миқдорда субсидия ажратиш йўлга қўйилади.

Туман марказида самарали фаолият юритиб келаётган “Тамара текстиль” масъулияти чекланган жамияти яратилаётган бунингдек имкониятлардан унумли фойдаланишга интилмоқда. Айни кунда корхонада тикилаётган турли фасондаги, турли ёшдаги эркак ва аёллар, болалар кийимлари Республикамизнинг барча ҳудудларидаги бозорларда харидоргир бўлмоқда.

Корхона маҳсулотлари Туркия давлатида ҳам сотилаётгани бу ерда ишга ижодий ёндашув натижасида харидорлар талаб ва эҳтиёжларига яраша кийимлар тикилаётганини кўрсатади.

Яқин кунларда корхона раҳбари Тамара Юсупова яна 50 нафар ишсиз, чеварликка қизиқадиган аёл-қизларни иш билан таъминлашни режалаштираяпти. Бунинг учун корхонага яратилган янги ишчи ўринлари сонига қараб, уларга фаолият бошлашлари учун зарур асбоб-ускуна, жиҳозлар сотиб олиш учун субсидия ажратилади.

Юқоридаги Фармон билан нафақат тадбиркорлик субъектларига, балки аҳолига ҳам қатор енгиллик ва имтиёзлар бериш кўзда тутилган. Қангли овулидаги кам таъминланган, ишсиз 25 нафар фуқаронинг ҳаётига ҳам мазкур Фармон ижроси қувонч олиб кирди.

Улар аҳолини тадбиркорликка жалб қилиш жамғармаси ҳисобидан овулдаги ҳоким ёрдамчиси Карамаддин Эшманов кўмагида ишсиз фуқароларнинг бандлигини таъминлаш мақсадида ташкил этилган қишлоқ хўжалиги кооперативилари устав фондига улуш сифатида киритиладиган субсидия асосида ўз-ўзини банд қилган фуқаролар сафига қўшилдилар ва ҳар бирига 3 тадан эчки тарқатилди.

Республикамиз ҳудудидаги иқтисодий тенгсизликни қисқартириш, кам таъминланган оилаларни манзилли қўллаб-қувватлашдаги янгича ёндошув аҳоли турмуши фаровонлашувига хизмат қилади.

Ойгул РАЖАБОВА.