Prezident Farmoni aholi va tadbirkorlarga yengilliklar yaratmoqda

Hududlar oʻrtasidagi iqtisodiy tengsizlikni qisqartirish, tuman va shaharlarni ularning sharoiti, salohiyati va imkoniyatlaridan kelib chiqib rivojlantirish boʻyicha yangicha yondashuvlarni joriy etish, shuningdek, tadbirkorlik muhitini yanada yaxshilash, davlat koʻmagini berish tartibini takomillashtirish va uning samaradorligini oshirishga xizmat qiluvchi Prezident Farmoni qabul qilingan edi.

2022-yil 30-dekabrda qabul qilingan “Respublika hududlarini toifalarga ajratish va tadbirkorlikni qoʻllab-quvvatlashning tabaqalashtirilgan tizimini joriy etish chora-tadbirlari toʻgʻrisida”gi ushbu Farmonga koʻra endilikda Respublika tuman va shaharlari iqtisodiy ahvoli va salohiyatidan kelib chiqib, 2023-yil 1-yanvardan 5 ta toifaga ajratildi. Har uch yilda Davlat byudjeti parametrlarini shakllantirish jarayonida tuman va shaharlarning ijtimoiy-iqtisodiy rivojlanish holatidan kelib chiqib, Vazirlar Mahkamasi Qaroriga koʻra ularning toifalari oʻzgartirib boriladi.

Farmonga muvofiq tuman va shahar toifasidan kelib chiqib, tadbirkorlik subʼektlariga soliq imtiyozlari, subsidiyalar ajratiladi va ularni qoʻllab-quvvatlashning boshqa choralari qoʻllaniladi.

Asosiy koʻrsatkichlariga koʻra 4-toifaga kiritilgan Amudaryo tumanida ham Farmon ijrosi yuzasidan muayyan ishlar olib borilmoqda.

Maʼlumki, mazkur Farmonda 4-toifaga kirgan tumanlardagi roʻyxatdan oʻtgan va shu hududlarda faoliyat yuritadigan tadbirkorlik subʼektlari uchun aylanmadan olinadigan soliqning bazaviy stavkasi 3 foiz etib belgilanadi. Aholiga, tadbirkorlik subʼektlariga oshirilgan miqdorda subsidiya ajratish yoʻlga qoʻyiladi.

Tuman markazida samarali faoliyat yuritib kelayotgan “Tamara tekstil” masʼuliyati cheklangan jamiyati yaratilayotgan buningdek imkoniyatlardan unumli foydalanishga intilmoqda. Ayni kunda korxonada tikilayotgan turli fasondagi, turli yoshdagi erkak va ayollar, bolalar kiyimlari Respublikamizning barcha hududlaridagi bozorlarda xaridorgir boʻlmoqda.

Korxona mahsulotlari Turkiya davlatida ham sotilayotgani bu yerda ishga ijodiy yondashuv natijasida xaridorlar talab va ehtiyojlariga yarasha kiyimlar tikilayotganini koʻrsatadi.

Yaqin kunlarda korxona rahbari Tamara Yusupova yana 50 nafar ishsiz, chevarlikka qiziqadigan ayol-qizlarni ish bilan taʼminlashni rejalashtirayapti. Buning uchun korxonaga yaratilgan yangi ishchi oʻrinlari soniga qarab, ularga faoliyat boshlashlari uchun zarur asbob-uskuna, jihozlar sotib olish uchun subsidiya ajratiladi.

Yuqoridagi Farmon bilan nafaqat tadbirkorlik subʼektlariga, balki aholiga ham qator yengillik va imtiyozlar berish koʻzda tutilgan. Qangli ovulidagi kam taʼminlangan, ishsiz 25 nafar fuqaroning hayotiga ham mazkur Farmon ijrosi quvonch olib kirdi.

Ular aholini tadbirkorlikka jalb qilish jamgʻarmasi hisobidan ovuldagi hokim yordamchisi Karamaddin Eshmanov koʻmagida ishsiz fuqarolarning bandligini taʼminlash maqsadida tashkil etilgan qishloq xoʻjaligi kooperativilari ustav fondiga ulush sifatida kiritiladigan subsidiya asosida oʻz-oʻzini band qilgan fuqarolar safiga qoʻshildilar va har biriga 3 tadan echki tarqatildi.

Respublikamiz hududidagi iqtisodiy tengsizlikni qisqartirish, kam taʼminlangan oilalarni manzilli qoʻllab-quvvatlashdagi yangicha yondoshuv aholi turmushi farovonlashuviga xizmat qiladi.

Oygul RAJABOVA.