АҲОЛИ САЛОМАТЛИГИНИ ТАЪМИНЛАШ – УСТУВОР ВАЗИФА

Саломатлик – инсон учун жуда муҳим ва қадрли бўлган бойлик ҳисобланади. Мустаҳкам саломатлик эса мазмунли ҳаёт кечириш, баракали умр кўриш демакдир. Инсон омили бош мезон бўлган юртимизда шу сабабли соғлиқни сақлаш соҳасини ислоҳ қилиш, тиббий хизмат кўрсатиш сифати ва самарадорлигини янада юксалтириш, аҳоли саломатлигини мустаҳкамлаш давлат сиёсатининг устувор вазифаларидан бирига айланди.

Амударё туманида ҳам тиббиёт соҳасида амалга оширилаётган ислоҳотлар, ўзгаришлар амалда ўзининг ижобий натижаларини кўрсатмоқда. Соҳа ходимлари эса аҳолига сифатли тиббий хизмат кўрсатиш, репродуктив саломатлигини мустаҳкамлаш, оналар ва болалар саломатлигини таъминлаш, уларни патронаж хизмати ва профилактик кўриклар билан қамраб олиш борасидаги масъулиятли вазифаларини фидойилик билан адо этишмоқда.

Туман Тиббиёт бирлашмаси таркибида марказий шифохона, Тез тиббий ёрдам бўлими, Кўп тармоқли марказий поликлиника фаолият кўрсатади. Шунингдек, ҳудудларда қишлоқ оилавий поликлиникалари, чекка қишлоқларда 11 та маҳалла тиббиёт пунктлари ҳам ташкил этилган. Марказий шифохона ва Тез тиббий ёрдам бўлимига янгидан замонавий тиббий жиҳозлар келтирилиб, хизмат сифатини яхшилашга алоҳида эътибор

қаратилмоқда.

Шунингдек, 7 та қишлоқ оилавий поликлиникаларига замонавий УТТ аппарати ўрнатилди. Ҳар бир оилавий поликлиникага стоматолог, гинеколог, лаборант-врач, УТТ шифокорларига қўшимча иш ўринлари ажратилиб, тор доирадаги мутахассислар фаолияти йўлга қўйилган. Маҳалла тиббий пунктларига жадвал асосида 11 нафар шифокорлар ва 26 нафар ҳамширалар бириктирилган.

Аҳолини чуқурлаштирилган тиббий кўрикдан ўтказишни такомиллаштириш соғлом авлодни тарбиялаш, она ва бола саломатлигини муҳофаза қилиш, фуқароларда тиббий маданият, санитария-гигиена кўникмаларини шакллантириш, касалликларни камайтиришда муҳим аҳамият касб этади. Шу боис, туманнинг  олис ҳудудларида яшовчи  аҳоли учун  чуқурлаштирилган  сайёр тиббий кўриклар ташкил этилмокда.

Шундай тадбирлар доирасида олис ва чекка ҳудудларда яшовчи 15 минг 547 нафар фуқаро тиббий кўрикдан ўтказилди. 2022 йилнинг ўтган даврида 134 нафар беморга туман марказий шифохонасида, Республика тиббиёт марказларида юқори технологик операциялар ўтказилиб, оғир дарддан халос бўлишига кўмаклашилди ва саломатликлари тикланди. Туманда 25 нафар қандсиз диабет билан касалланган беморлар демопрессин препарати, 25 ёшгача бўлган қандли диабетнинг биринчи тури билан касалланган 10 нафар беморлар ўзини ўзи назорат қилиш воситалари, яъни глюкометр ва махсус тест япроқчалари, 216 нафар қандли диабет билан касалланган беморлар инсулин дори воситаси билан узлуксиз таъминланиб келмоқда. Юрак-қон томир ва эндокрин касалликларни эрта аниқлаш бўйича 40 ёшдан ошган 60 мингдан зиёд аҳолидан  56971 нафари скрининг текширувидан ўтказилиб, аниқланган хавф гуруҳлари бўйича режали равишда соғломлаштириш ишлари олиб борилмоқда.

Ундан ташқари, туман аҳолисида эндокринологик касалликларни барвақт аниқлаш, сифатли даволаш ва асоратларини камайтириш мақсадида қўшимча 2 нафар шифокор шу мутахассисликка, 13 нафар шифокор УТТ мутахассислигига қайта тайёрланди. Шунингдек, кўп тармоқли марказий поликлиника таркибида “Болалар бўлими” янгидан ташкил қилиниб, 14 йўналишдаги тор доира мутахассислари билан таъминланди. Туман ҳудудидаги тиббиёт масканларида фаолият кўрсатиб келаётган шифокор ва патронаж ҳамшираларнинг ўқув курсларида малака оширишларига имконият яратиб келинмоқда.

Туман Тиббиёт бирлашмасида  2022 йил давомида бир қатор янги қурилиш, мукаммал ва жорий таъмирлаш ишлари олиб борилди. Қиймати 14,3 млрд. сўмлик 90 ўринли янги  туғруқ бўлими биносини қуриш ишлари “Темир бетон” МЧЖ томонидан, 72-сонли оилавий поликлиника биносида 749 млн. 990 минг сўмлик мукаммал таъмирлаш ишлари “Сув қурилиш” МЧЖ томонидан амалга оширилмоқда. Қангли оилавий шифокорлик пункти биносини таъмирлаш учун 590 млн. сўм ажратилиб, ҳозирда смета ҳужжатлари тайёрланмоқда.

Жисман ва руҳан соғлом инсон жамият равнақи ва тараққиётига муносиб ҳисса қўша олади. Буни сидқидилдан англаган ҳолда халқимиз саломатлигини асрашга, ҳар бир фуқарога сифатли тиббий хизмат кўрсатишга масъул бўлган, беморларга шифо улашиб келаётган барча тиббиёт ходимларига касб байрамлари муборак бўлсин! Соҳа жонкуярларининг касбий фаолиятларида муваффақиятлар, улкан зафарлар тилайман!

Фахриддин Абдуллаев, Амударё туман Тиббиёт бирлашмаси бошлиғи.