СЕМИНАРДА ВИРУСЛИ ГЕПАТИТ А КАСАЛЛИГИНИНГ ОЛДИНИ ОЛИШ ЧОРАЛАРИ ТУШУНТИРИЛДИ
Вирусли гепатит А, яъни аҳоли ўртасида сариқ касаллиги деб аталувчи касаллик одамда вируслар чақирадиган, фекал-орал юқиш механизмига эга бўлган юқумли касаллик ҳисобланади. Шу боис, Республикамизда аҳоли ва болалар ўртасида вирусли гепатит А ҳамда бошқа юқумли ва паразитар касалликларни камайтиришга қаратилган чораларни кучайтириш ва сифатини ошириш бўйича 2022-2023 йиллар учун қўшимча тадбирлар дастури ишлаб чиқилган.
Ушбу дастурда кўрсатилган чора-тадбирлар, белгиланган вазифаларни амалга ошириш мақсадида Амударё тумани Санитария-эпидемиологик осойишталик ва жамоат саломатлиги бўлими томонидан тумандаги умумтаълим мактаблари ва мактабгача таълим ташкилотлари раҳбарлари учун семинар ташкил этилди.
82-сонли мактабда бўлиб ўтган тадбирда Қорақалпоғистон Республикаси Санитария-эпидемиологик осойишталик ва жамоат саломатлиги бошқармаси шифокор-эпидемиологи Нина Низаматдинова ҳамда туман Санитария-эпидемиологик осойишталик ва жамоат саломатлиги бўлимининг эпидемиология ва иммунопрофилактика бўлими мудири Гулшод Тажибоевалар қатнашишди.
Тадбирда сўзга чиққан Қорақалпоғистон Республикаси Санитария-эпидемиологик осойишталик ва жамоат саломатлиги бошқармаси шифокор-эпидемиологи Нина Низаматдинова мазкур семинар мақсади бу касалликнинг туман ҳудудида тарқалишининг олдини олиш, касаллик профилактикаси бўйича тушунчалар беришга қаратилганлигини айтиб ўтди.
Семинар давомида юқумли касалликлардан бўлган вирусли гепатит А касаллиги вируслар келтириб чиқарадиган, ўзгарган озиқ-овқат, қайнатилмаган сув орқали, зарур санитария шароитлари риоя қилинмаган, шахсий гигиена қоидаларига амал қилинмаган ва шу касалликка чалинган бемор билан яқин алоқада бўлган ҳолатда юқиши тушунтирилиб, енгил, ўрта ва оғир турларига изоҳ берилди ва кенг турда мисоллар келтирилди.
Таъкидланганидек, вирусли гепатит А касаллиги кўпинча 14 ёшгача, асосан 3-7 ёш болалар ўртасида кенг тарқалиб, одатда касалликнинг ўрта яширин даври 14-35 кунни ташкил этади. Касаллик белгилари беморда тана иссиқлигининг кўтарилиши, ҳолсизланиши, тез чарчаши, иштаҳанинг йўқлиги, қайт қилиши, ич кетиши, айрим вақтларда қатталаши, қоринда, яъни ўнг қовурға остида ёқимсиз ҳис ёки оғриқ пайдо бўлиши, сийдик ранги тўқ сариқ тусга кириши, кўзларнинг оқи, тери ва тирноқлар сарғайиши кабиларда кўринади. Аммо асосан 6 ёшгага болаларда бу белгилар кўринмаслиги мумкин. Шу сабабли аниқ диагноз лаборатория йўли билан қондаги антителаларни аниқлаш натижасида қўйилади. Касалликнинг махсус давоси йўқлиги сабабли даволаш жараёнида беморга қулай шараоит яратиш, танадаги йўқотган суюқликнинг ўрнини тўлдириш ҳамда диета сақлашга йўналтирилади.
Семинарда касалликнинг олдини олиш мақсадида қўлланилиб келинаётган вакцинация чоралари хусусида ҳам кенг тўхталиб ўтилди. Шунингдек, давлат томонидан болалар 12-13 турдаги юқумли касалликларга қарши вакцина билан бепул таъминланиши, лекин, вирусли гепатит А вакцинаси билан эмлаш учун ҳозирда имкониятлар чекланганлиги ҳақида маълумотлар берилди. Мутахассислар вирусли гепатит А профилактикаси, мазкур касалликнинг олдини олишда вакцинациянинг аҳамиятини кенг тушунтириб ўтдилар.
Семинар якунида умумтаълим мактаблари ва мактабгача таълим ташкилотлари раҳбарлари касалликнинг олдини олиш, вакцинация хусусида ўзларини қизиқтирган саволлар билан мурожаат қилиб, батафсил жавоблар олишди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
