Сенатор қишлоқ хўжалиги ҳамда тиббиёт соҳасида Амударё туманида амалга оширилаётган ишлар билан танишди

30 март куни Амударё туманига Ўзбекистон Республикаси Олий Мажлиси Сенатининг йигирма тўртинчи ялпи мажлисида қабул қилинган қонун ҳужжатларининг мазмун-моҳиятини тушунтириш ҳамда жамоатчилик назоратини йўлга қўйиш бўйича Ўзбекистон Республикаси Олий Мажлиси Сенатининг Оролбўйи минтақасини ривожлантириш масалалари қўмитаси раиси ўринбосари, сенатор Ботир Матмуратов ташриф буюрди.

Туман ҳокимлигининг мажлислар залида бўлиб ўтган йиғилишдан сўнг сенатор тегишли соҳалар мутасаддилари ҳамроҳлигида Оқ олтин овули ҳудудидаги қишлоқ оилавий поликлиникасига ташриф буюриб, тиббиёт ходимлари билан суҳбатлашди.

Суҳбат давомида сенатор мазкур қишлоқ оилавий поликлиникаси томонидан Оқ олтин овулида истиқомат қилувчи 8 минг 939 нафар аҳолига тиббий хизмат кўрсатиш сифатини яхшилаш мақсадида ташкил этилаётган ишлар билан яқиндан танишди.

Қишлоқ оилавий поликлиникаси  аҳолига бирламчи тиббий-санитария ёрдами кўрсатишни янада яхшилаш, касалликлар профилактикаси, аҳоли ўртасида соғлом турмуш тарзи ва санитария-гигиеник маданиятни тарғиб қилиш борасида самарали иш олиб бормоқда. Айниқса, аҳоли, биринчи навбатда фертил ёшидаги аёллар ва ҳомиладор аёллар, болалар, шунингдек ўзгалар ёрдами ва ижтимоий ҳимояга муҳтож ёлғиз кексалар, ногиронлиги бўлган шахслар, сурункали касалликларга чалинган беморлар орасида патронаж ишларини мунтазам олиб бориш борасида сезиларли натижаларга эришилмоқда. Шифохонага ётқизиш, касалликларга чалиниш ва ногиронлик даражасининг пасайиши, айниқса аҳолининг кўрсатилаётган тиббий хизмат сифатидан қониқиши тиббиёт ходимлари фаолияти самарадорлиги нечоғли юқори эканидан далолат беради.

Айни кунларда аҳолини каронавирусга қарши Бустер доза билан эмлаш ишлари ҳам самарали йўлга қўйилган.

Сенатор тиббиёт ходимлари билан суҳбатда Президентимизнинг 15 март куни тиббиёт ходимлари билан ўтказган очиқ мулоқоти давомида тиббиёт соҳасини ривожлантириш бўйича белгилаб берган вазифалари ҳамда долзарб масалалар ҳақида тўхталиб, шифокорларнинг шарафли, шу билан бирга машаққатли ишларида омад тилади.

Шундан кейин меҳмонлар Тўлқин овули ҳудудида жойлашган “Аму соҳили” чорвачилик фермер хўжалигига ташриф буюрди.

Сенатор Ботир Матмуратов фермер хўжалигида амалга оширилаётган ишлар билан яқиндан танишиб, соҳани янада ривожлантиришга оид қабул қилинаётган қонунлар ақида тушунчалар берди.

Учрашув давомида туман ҳокими ўринбосари Ислом Маткаримов Ўзбекистон Республикаси Президентининг 2022 йил 1 март кунги “Қишлоқ хўжалигида сувни тежайдиган технологияларни жорий этишни янада такомиллаштириш чора-тадбирлари тўғрисида”ги қарорига асосан туманда, хусусан мазкур фермер хўжалигида амалга оширилаётган ишлар ҳақида кенг турда маълумот берди.

Қайд этилганидек, ҳозирги кунда туманда cув ресурсларидан фойдаланиш механизмларини тубдан ислоҳ қилиш, улардан оқилона ва самарали фойдаланиш мақсадида жами 2 минг 630 гектар майдонга сувни тежовчи технологиялар жорий этилган. Шундан 250 гектар ғалла майдонларига ёмғирлатиб суғориш технологияларини жорий қилиш бўйича таъминотчилар билан шартномалар тузилган.

Бугунги кунда туманимизда ғаллачилик соҳасида “Qipchoq g‘alla klaster” ҳамда “Amu Rich Xarvest” масъулияти чекланган жамиятлари кластер усулида фаолият юритиб келмоқда.

Сенатор Ботир Матмуратов туманимизда қишлоқ хўжалиги соҳасида амалга оширилаётган ишлар алоҳида эътирофга лойиқ эканлигини таъкидлади.

Туман ҳокимлигининг Ахборот хизмати