Наврўз мадҳи
Ҳутнинг қаҳри синди, кўз ёши чак-чак,
Томчилар ҳамалдан бўлди зўр дарак.
Самода қушларнинг карвони лак-лак,
Офтобрўяларда униб бойчечак –
Водийлар нафасин уфурди фалак.
Ер-осмон бирлашди. Ажиб тантана:
Турналар арғимчоқ солдилар яна.
Саболар базмига чулғанган дала,
Қирларнинг бағрида қадим анъана –
Ватанда бошланди сайли сумалак.
Тоғларнинг манглайин силаб, терлатиб,
Қуёш ҳамал кирди ерни яйратиб.
Оппоқ булутларнинг жиловин тортиб,
Абри найсонларни бир-бир тебратиб,
Боғларни уйғотди момогулдирак.
Осмон ёйин тортди, ранг бўлди талаш,
Нурли пайконларин йўллади Қуёш.
Яшил бўркин кийган тоғларга туташ,
Қирларнинг бағрида мўъжиза, оташ –
Заминга сингиди заррин камалак.
Зироат фаслига қўйиб хуш қадам,
Меҳнат майдонига чоғланди эл ҳам.
“Яшил йиллик” завқи дилда мужассам,
Гул экиб, шодланди болажонлар ҳам,
Орзу осмонларин қучганда варрак.
Анов кенгликларга боқдим. Ажойиб!
Майсалар шивирин туйдим. Ғаройиб!
Тонгги шабнамларга юзини чайиб,
Куртаклар уйғонди майин жилмайиб,
Чаманлар бағрига талпинди юрак.
Эҳ-ҳе-ҳей, кўпкари! Янгради чорлов,
Ўртага тикилди орият – ялов!
Қатъияти баланд, отлари асов,
Мардлар майдон тушди қалблари олов,
Ҳалоллик баҳсига ёр бўлди тилак.
Юракларни қучди энг улуғ ният:
Ватанга ёр бўлгай ЭРК ва ҲУРРИЯТ.
Халқ топгай саодат, тинчлик, офият,
Шундадир куч-қудрат ва салоҳият,
Инсон қадри билан ёруғ келажак.
Тўрт томонга боқдим, қуёш жилваси,
Тиллардан тушмайди Наврўз шеваси.
Чўпон-чўлиқларнинг ўтов – кулбаси,
Сўлим ҳаволарнинг гўзал қалъаси –
Ажиб ифор сочди сулув наъматак.
Сувлар карвонига тикиламан жим,
Гоҳ сокин, гоҳ асов оқади Жайхун.
Юлдузлар тилини билган мунажжим,
Дарёга келганда излар мутаржим –
Аму қумлоқларга сингар жонсарак...
Шу Ватан меники. Бепоён қумзор –
Бағри маъданларга тўла, мафтункор.
Минг турли гиёҳи дилларга мадор,
Наврўз ташрифидан этиб ифтихор,
Шодлана кўк тердим мен этак-этак.
Сўнгра ашъор битдим. Хуш келдинг, Наврўз!
Ўзингдадир тенглик, сенда ризқ-у рўз.
Ҳазрат Навоийдан айладим дилсўз:
– Робия, тун-кунинг Қадр ила Наврўз!
Кўзларимга сурма йўл-у йўлаклар!
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
