НАВБАТДАГИ СИЁСИЙ-МАЪРИФАТ СОАТИ БЎЛИБ ЎТДИ

Ўзбекистон Республикаси Президенти ҳузуридаги Давлат хизматини ривожлантириш агентлиги ҳамда Давлат бошқаруви академияси ҳамкорлигида ҳар ҳафтанинг жума куни Республикамиздаги барча Вазирлик ва идоралар, Қорақалпоғистон Республикаси Жўқорғи Кенгеси, вилоятлар ва Тошкент шаҳри, шунингдек, барча туман, шаҳар ҳокимликлари раҳбар ва масъул ходимларига онлайн тарзда cиёсий-маърифат соати ўтказиб келинмоқда.

Амударё тумани ҳокимлигининг мажлислар залида 11 февраль куни ҳоким ўринбосарлари, ҳокимлик масъул ходимлари, туманимизда фаолият юритаётган корхона, ташкилот раҳбарлари ҳамда оммавий ахборот воситалари вакиллари ҳам навбатдаги сиёсий-маърифат соатида иштирок этишди.

Кун тартибида буюк шоҳ ва шоир Заҳириддин Муҳаммад Бобурнинг давлат ва жамият бошқаруви соҳасидаги ислоҳотлари, шунингдек, бугунги кунда юртимизда амалга оширилаётган ислоҳотлар, жумладан, маҳаллаларда иш ўринлари яратиш ва оилалар даромадини кўпайтиришнинг янги тизими ҳақида сўз юритилиб ҳафта давомида қабул қилинган норматив-ҳуқуқий ҳужжатларнинг мазмун-моҳияти ҳақида маълумотлар берилди.

Сиёсий-маърифат соатида дастлаб юртимизда ва хорижда рўй бераётган воқеалар билан таништириб ўтилди.

Шундан сўнг Давлат бошқарув академияси профессори Мансур Бекмурадовнинг Заҳириддин Муҳаммад Бобурнинг давлат ва жамият бошқаруви соҳасидаги ислоҳотларига бағишланган маърузаси тингланди.

Маърузада Заҳириддан Муҳаммад Бобур дунё тарихида ўзига хос из қолдирган ва буюк империялар туза олган 7 та улуғ ҳукумдорлар қаторига кириши, Бобур империяси 350 йилдан ортиқ вақт давом этганлиги билан инсоният тарихида энг узоқ ҳукум сурган давлат сифатида ажралиб туриши қайд этилди.

Шунингдек, Бобурнинг ҳинд халқини бирлаштириш йўлидаги ҳаракатлари, қарашлари ва этиқодлари турлича бўлган фуқаролар ўртасида тинчликни сақлаш ва мустаҳкамлаш, солиқ бўйича ўтказган ислоҳатлари, ҳарбий юришлари, бугунги кун раҳбарларига ўрнак бўла олувчи фазилатлари ҳақида маълумот берилди.

Шундан сўнг маҳаллаларда иш ўринларини яратиш ва оилалар даромадини кўпайтиришнинг янги тизими бўйича, иқтисодий тараққиёт ва камбағалликни қисқартириш вазирлиги ҳузуридаги маҳаллабай ишлаш ва тадбиркорликни ривожлантириш агентлиги интерактив хизматларини ривожлантириш шўбаси мудири Шерзод Атажановнинг тақдимоти намойиш этилди.

Тақдимотда 2022 йил мобайнида оилавий тадбиркорликни ривожлантириш, аҳолининг иш билан таъминланиши, ҳунармандчиликни ривожлантириш дастурлари ҳамда ҳоким ёрдамчиларининг маҳаллабай ва хонадонбай ишлашда эътибор қаратиши лозим бўлган жиҳатлар ёритиб берилди.

Шунингдек, сиёсий-маърифат соатида Адлия вазирлиги бош мутахассиси Дилмурод Ражапов томонидан ҳафта давомида қабул қилинган норматив ҳуқуқий ҳужжатларнинг мазмун моҳияти ҳақида кенг тарзда маълумотлар берилди.

Ҳар ҳафта ўтказиладиган сиёсий-маърифат соатларида туманимиздаги раҳбар ходимлар, тегишли ташкилот вакиллари ҳам қатнашиб ҳафтанинг энг долзарб янгиликлари, янги қабул қилинган қонунлар ва норматив-ҳуқуқий ҳужжатлар мазмун-моҳияти билан мунтазам равишда танишиб борадилар.

Туман ҳокимлигининг ахборот хизмати