“Бугун элимиз тинчлигининг қадрига етайлик!” мавзусида давра суҳбати ўтказилди

3 октябрь куни Амударё тумани Халқ таълими бўлимига қарашли 82-сонли умумтаълим мактабида ёшларни жалб қилган ҳолда “Бугун элимиз тинчлигининг қадрига етайлик!” мавзусида давра суҳбати ўтказилди.

Туманимиз ёшлари билан учрашиш ҳамда улар билан дилдан суҳбат қуриш мақсадида ташриф буюрган Қорақалпоғистон Республикаси Вазирлар Кенгаши раиси ўринбосари Рустам Сапарбаев, Ўзбекистон Республикаси Вазирлар Маҳкамаси ҳузиридаги Дин ишлари бўйича қўмитанинг Қорақалпоғистон Республикаси бошқармаси бош мутахассиси Нурулла Жамалов, Дин ишлари бўйича қўмитанинг Қорақалпоғистон Республикаси бошқармаси етакчи мутахассиси Байрамгул Айимбетовалар, шунингдек, туман ҳокими Султонбой Йўлдашев, ҳоким ўринбосари Маҳмуд Шерметов ҳамда қатор масъуллар мактабда ташкил этилган туманимиздаги ёш ижодкорларнинг ижод маҳсуллари, қўл меҳнатлари намуналаридан иборат кўргазмани томоша қилдилар.

Шундан сўнг ёшлар билан мавзу юзасидан суҳбат ташкил этилиб, унда сўзга чиққан Қорақалпоғистон Республикаси Вазирлар Кенгаши раиси ўринбосари Рустам Сапарбаев тинчлик Аллоҳ таолонинг бизларга берган неъматлари ичида энг улуғи эканлиги, уни асраб-авайлаш, тинчлик ва осойишталикнинг қадрига етиш, тинч ва осуда ҳаётимизга, хотиржам отаётган ҳар бир тонгимизга шукрона келтириш лозимлиги, бундай дориломон кунларга етиш осон бўлмагани, ер юзида неча минглаб инсонлар ҳаётининг ҳар бир дақиқасини юрагида қўрқув, ҳадик билан ўтказаётгани хусусида сўз юритди.

Таъкидланганидек, бугунги кунда бутун ер юзида кўплаб давлатлар ўртасидаги ўзаро урушлар уларнинг тараққий этиши ва ривожланишини ортда қолдирмоқа. Ҳозирги таҳликали даврда тинч ва осойишта ҳаётимизни сақлаб қолиш, тинчлигимизни асраш ҳар бир кишининг муқаддас бурчи ҳисобланади. Ватан тинч бўлса, яшаш учун энг қулай маскан ҳисобланади. Тинчлик бўлса, инсонларнинг ҳаёти фаровон бўлади. Бу неъмат давомли бўлиши учун эса, унинг сабаблари, уни тутиб турувчи омиллари яъни ўзаро ишонч, меҳр-мурувват, шукроналик, адолатли бўлиш, зулм ва хиёнат қилмаслик каби фазилатли хислатларга ҳам эътиборли бўлиш лозим.

Давра суҳбатида Ўзбекистон Республикаси Вазирлар Маҳкамаси ҳузиридаги Дин ишлари бўйича қўмитанинг Қорақалпоғистон Республикаси бошқармаси бош мутахассиси Нурулла Жамалов сўзга чиқиб,  ҳар бир инсон ўз мақсади йўлида доимо ҳаракат қилиши, орзу ва мақсадларнинг, эзгу ниятларнинг рўёбга чиқиши учун эса тинчлик ва осойишталик энг зарурий омил эканлигини таъкидлаб, оиладаги хотиржамлик инсоннинг иш самарадорлигини оширишга, оила мустаҳкамлигига асос бўлса, юртдаги тинчлик мамлакат тараққиётига, фаровонлигига замин яратишини қайд этиб ўтди.

Туманимиз ёшлари билан ташкил этилган мазкур учрашув доирасида “Бугун элимиз тинчлигининг қадрига етайлик!” мавзусида иншолар танлови ўтказилди. Иншолар танлови тумандаги барча умумтаълим мактаблари юқори синф ўқувчилари ўртасида бўлиб ўтди. Танловда ҳар бир мактабдан бир нафардан ўқувчи иштирок этди.

Айтиш керакки, мазкур иншолар танлови ёшларнинг тинчлик ва унинг қадрига етиш борасидаги фикр-мулоҳазаларини, уларнинг бу борадаги билимлари қай даражада эканлигини, тинчлик ҳақидаги дунёқарашларини яқиндан ўрганиш мақсадида ташкил этилиб, ёшлар мавзу юзасидан бор билим ва тасаввурларини қоғозга туширдилар.  Жуда қизиқарли тарзда ўтган иншолар танловининг якуний натижаларга кўра 62-сонли мактабнинг 10-синф ўқувчиси Шаҳло Қуралованинг ёзган иншоси энг олий ўринга лойиқ дея топилди. Танловнинг 2-ўрни 40-сонли мактабнинг 11-синф ўқувчиси Дурдона Йўлдашевага, 3-ўрин 67-сонли мактабнинг 11-синф ўқувчиси Дилноза Худоёровага насиб қилди.

Тадбир якунида иншолар танлови ғолиблари масъуллар томонидан турли бадиий китоблар жамланмаси ҳамда эсдалик совғалари билан тақдирландилар.

Туман ҳокимлигининг Ахборот хизмати.