СОFЛОМ ВА МАЪНАН ЕТУК АВЛОД – ЮРТ КЕЛАЖАГИНИ ЯРАТАДИ

Янги Ўзбекистонда спорт-соғломлаштириш соҳаси сиёсат даражасига кўтарилди, десак асло муболаға бўлмайди. Айни даврда юртимизда соғлом турмуш тарзи бўйича бошланган ишлар, оммавий спортни тарғиб этиш чора-тадбирлари янги босқичда ривожланмоқда.

Президентимизнинг бу борадаги Қарор ва Фармонлари ижросини таъминлаш бўйича туман Туризм ва спорт бўлими томонидан тегишли идора-ташкилотлар ҳамкорлигида турли хил тадбирлар йўлга қўйилган.

Ҳозирги кунда туманда Болалар-ўсмирлар спорт мактаби ва унинг Олмазор, Дўстлик, Чордара маҳаллаларидаги спорт иншоотларида 18 та спорт тури бўйича машғулотлар ўтказилади. Шулардан 12 таси олимпия спорт турлари ҳисобланади. Мавжуд 134 та гуруҳлардаги 1386 нафар шуғулланувчиларга 58 нафар моҳир мураббий-тренерлар спорт сирларини ўргатишади. Махсус сертификатга эга ушбу тренерларнинг 19 нафари 1-тоифали, 29 нафари 2-тоифали бўлиб, спорт усталигига номзодлар 20 нафарга етди.

Ўтган ўқув йилида барча спорт турларидан 35  та спорт мусобақалари ўтказилиб, 720 нафар шуғулланувчилар қатнашди ҳамда Ўзбекистон чемпионати ва кубокларида жами 60 та, шундан  12 таси олтин,  31 таси кумуш, 17 таси бронза медалларни қўлга киритдилар.

Турли мусобақаларда спорт иншоотларидан самарали фойдаланиш, жисмоний тарбия ва спортни ривожлантиришга, ҳаракатли ўйин турларини оммалаштиришга ҳамда жамиятимизда соғлом турмуш тарзини тарғиб қилишга замин яратади. Эртамиз эгаларини спортга қизиқтириш, уларнинг салоҳияти, интилишларини юзага чиқариш ва етарли шароит яратиш эса бизнинг энг асосий вазифамиз.

Ғ.Курбанбаев,

туман Туризм ва спорт бўлими бошлиғи.