Халқ депутатлари Амударё тумани Кенгашининг 21-сессияси тўғрисида ахборот

2026 йил 5 июнь куни Халқ депутатлари Амударё тумани Кенгашининг навбатдаги 21-сессияси бўлиб ўтди. Сессияда депутатлар, туман ҳокимининг ўринбосарлари, тегишли ташкилот ва идоралар раҳбарлари, эксперт гуруҳи аъзолари, маҳалла фуқаролар йиғинлари раислари, хотин-қизлар фаоллари ҳамда оммавий ахборот воситалари вакиллари иштирок этдилар.

Сессия ишини Халқ депутатлари Амударё тумани Кенгаши раиси Алишер Йўлдашев очиб берди ва олиб борди. Мажлис Ўзбекистон Республикаси ҳамда Қорақалпоғистон Республикаси давлат мадҳиялари садолари остида бошланди. Сессия котиблигига “8-Ўрта қалъа” сайлов округидан депутат Фотима Эшимбетова номзоди депутатлар томонидан бир овоздан маъқулланди.

Сессия кун тартибига киритилган биринчи масала бўйича туман ҳокимининг молия, иқтисодиёт ва камбағалликни қисқартириш масалалари бўйича биринчи ўринбосари – Иқтисодиёт ва молия бўлими бошлиғи Фахриддин Юсупов ўз фаолияти ҳамда туман маҳаллий бюджетининг 2026 йил 1 январь ҳолатига аниқланган эркин қолдиқ маблағлари ҳисобидан маблағ ажратиш тўғрисида ҳисобот берди.

Ҳисоботда қайд этилишича, 2026 йилнинг январ–май ойларида иқтисодиёт тармоқларини ривожлантириш, тадбиркорликни қўллаб-қувватлаш, янги иш ўринлари яратиш, аҳоли бандлигини таъминлаш ва камбағалликни қисқартириш бўйича тизимли ишлар амалга оширилди. Натижада 2026 йилнинг январь–апрель ойларида туманда саноат маҳсулотлари ҳажми 662,5 млрд сўмни ташкил этиб, ўсиш суръати 102,8 фоизга етди, хизматлар ҳажми 375,1 млрд сўмни ташкил қилиб, ўсиш суръати 118,7 фоизни ташкил этди. Шунингдек, қурилиш-пудрат ишлари ҳажми 140,7 млрд сўмга етиб, ўсиш суръати 109,2 фоизни ташкил қилди, қишлоқ хўжалиги маҳсулотлари ҳажми эса 317,5 млрд сўмни ташкил этиб, ўсиш суръати 101 фоизга етди.

Сессиянинг кун тартибидаги навбатдаги масала, яъни туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосарининг фаолияти юзасидан ҳисоботни ҳокимлик бош мутахассиси Ихтиёр Одилов ўқиб эшиттирди.

Маълум қилинишича, 2025 йил якуни бўйича тумандаги 14–30 ёш оралиғидаги 53 минг 369 нафар ёшлар хатловдан ўтказилиб, “Ёшлар баланси” шакллантирилган. Натижаларга кўра, уларнинг 37 минг 435 нафари “яшил”, 15 минг 550 нафари “сариқ” ҳамда 384 нафари “қизил” тоифага киритилган. “Ёшлар баланси” асосида аниқланган 546 нафар ишсиз ёшлар “оғир” тоифага киритилиб, уларга 29 нафар ташкилот раҳбарлари бириктирилган. Жорий йилнинг ўтган беш ойида ушбу тоифадаги ёшларнинг 356 нафари ёки 65,2 фоизининг бандлиги таъминланган.

Шунингдек, ҳисобот даврида “Ёшлар дафтари”га киритилган 30 нафар ёшдан 28 нафарининг тўлов-контракт маблағлари ҳамда 2 нафарининг илм-фан йўналишидаги ўқув курслари харажатлари қоплаб берилган.

Сессияда туман ҳокимининг ўринбосари – Инвестициялар ва ташқи савдо бўлими бошлиғи Ҳамза Хайитимбетовнинг ҳам ҳисоботи тингланди.

Ҳисоботда таъкидланганидек, туманда инвестиция муҳитини яхшилаш, тадбиркорлик субъектларини қўллаб-қувватлаш, ишлаб чиқариш ва хизмат кўрсатиш соҳаларини ривожлантириш мақсадида қатор инвестиция лойиҳалари амалга оширилмоқда.

2026 йилда умумий қиймати 545 млрд сўмлик 26 та инвестиция лойиҳасини амалга ошириш режалаштирилган бўлиб, улар доирасида 1 минг 115 та янги иш ўрни яратиш ҳамда 26,8 млрд сўмлик маҳсулот ишлаб чиқариш кўзда тутилган. Амалга оширилган ишлар натижасида ҳисобот даврида умумий қиймати 12,8 млрд сўмлик 6 та инвестиция лойиҳаси ишга туширилиб, натижада 56 та янги иш ўрни яратилган.

Сессияда ижро этувчи ҳокимият органлари, корхона ва ташкилотлар раҳбарларининг сув хўжалиги соҳасидаги ишлари ҳолати юзасидан ҳам ахборот тингланди. Мазкур масала бўйича “Қорақалпоқ сув таъминоти” МЧЖ Амударё тумани филиали бошлиғи Нариман Сабиров ҳисобот берди.

Қайд этилишича, Ўзбекистон Республикаси Президентининг 2024 йил 24 декабрдаги қарорига мувофиқ Жумуртов шаҳарчаси ҳудудида 7,1 километр узунликдаги янги сув тармоғи қурилиб, маҳалладаги 174 та хонадон марказлашган ичимлик суви билан таъминланади. Шунингдек, Президентнинг 2019 йил 9 апрелдаги қарори асосида Осиё тараққиёт банки кредит маблағлари ҳисобидан туманнинг ичимлик сув таъминотини яхшилаш, Манғит сув тозалаш иншоотини янгидан қуриш лойиҳалари амалга оширилмоқда.

“Амударё туманининг ичимлик сув таъминотини яхшилаш” лойиҳаси доирасида қиймати 29,03 млн АҚШ доллари миқдорида тузилган шартнома асосида 3 та ичимлик суви объекти ҳамда 300 километрдан ортиқ ичимлик суви тармоқларини қуриш ва реконструкция қилиш ишлари олиб борилмоқда.

Бундан ташқари, қиймати 12,98 млн АҚШ долларига тенг бўлган “Манғит” сув тозалаш иншоотида ҳам қурилиш-монтаж ишлари давом этмоқда. Мазкур лойиҳалар якунида тумандаги истеъмолчиларни марказлашган ичимлик суви билан таъминлаш даражаси 80 фоизга етказилиши режалаштирилган.

Шундан сўнг Кенгашнинг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссия раиси Мадамин Казаковнинг ахбороти тингланди.

Маълум қилинишича, 2026 йилнинг ўтган беш ойида комиссия томонидан 11 та йиғилиш ўтказилиб, иқтисодиёт ва тадбиркорлик соҳасидаги масалалар билан шуғулланувчи корхона ва ташкилотлар раҳбарларининг ҳисоботлари тингланган.

Шунингдек, доимий комиссия томонидан 27 та масала дастлабки тартибда кўриб чиқилиб, улар юзасидан тегишли хулосалар берилган ҳамда қарорлар қабул қилинган. Мазкур масалалар бўйича эксперт гуруҳи иштирокида сессия қарорлари лойиҳалари ишлаб чиқилиб, белгиланган тартибда сессия муҳокамасига киритилган.

Сессия давомида кун тартибидаги барча масалалар атрофлича муҳокама қилиниб, улар юзасидан тегишли қарорлар қабул қилинди.