Маҳаллий Кенгаш депутатларининг фаоллиги ошмоқда

Мамлакатимизда сўнгги йилларда демократик ислоҳотларни чуқурлаштириш, халқ ҳокимиятчилигини тўлақонли таъминлаш ҳамда давлат бошқарувини аҳоли манфаатларига хизмат қилувчи тизимга айлантириш борасида изчил чора-тадбирлар амалга оширилмоқда. Бу жараёнда халқ депутатлари маҳаллий Кенгашларининг ўрни ва аҳамияти сезиларли даражада ортиб бормоқда. Айниқса, ҳудудларни ижтимоий-иқтисодий ривожлантириш, аҳолини ижтимоий ҳимоя қилиш, жойлардаги муаммоларни ўз вақтида аниқлаш ва бартараф этишда маҳаллий Кенгашлар депутатларининг фаоллиги кучаймоқда.

Сўнгги йилларда қабул қилинган қонун ҳужжатлари маҳаллий Кенгашларнинг назорат функцияларини кучайтиришга қаратилди. Хусусан, маҳаллий даражада давлат органлари раҳбарларининг ҳисобдорлиги белгилаб қўйилиб, уларнинг ўз фаолияти юзасидан халқ вакиллари олдида мунтазам ҳисобот бериб бориши йўлга қўйилди.

Бугунги кунда прокуратура, адлия, ички ишлар, молия, солиқ, экология ва соғлиқни сақлаш органлари раҳбарларининг маҳаллий Кенгашлар олдида ҳисобот бериш амалиёти жорий этилган бўлиб, бу орқали давлат органлари фаолиятининг очиқлиги ва шаффофлиги таъминланмоқда. Шу билан бирга, аҳолини қийнаб келаётган муаммоларни ҳал этишда депутатлик сўровлари институтининг аҳамияти янада ортмоқда.

Халқ депутатлари Амударё туман Кенгаши ҳам ушбу ислоҳотларни амалга оширишда фаол иштирок этиб келмоқда. Туман Кенгаши таркиби 25 нафар депутатдан иборат бўлиб, улар жойларда аҳолининг манфаатларини ифода этиш ва ҳимоя қилиш йўлида изчил фаолият олиб бормоқда. Шу кунга қадар Кенгаш томонидан 17 та сессия ўтказилиб, уларда жами 145 та масала кўриб чиқилди ҳамда тегишли қарорлар қабул қилинди.

Сессияларда асосий эътибор аҳолини қийнаб келаётган муаммоларни муҳокама қилиш, уларнинг ечимини топиш ва ижросини назорат қилишга қаратилди. Шу мақсадда депутатлар томонидан жойларда 239 маротаба аҳоли билан учрашувлар ташкил этилди. Ушбу учрашувларда турли соҳаларда фаолият юритувчи тегишли ташкилот ва идоралар раҳбарларининг 38 та ҳисоботи ҳамда 13 та ахбороти тингланди. Учрашувлар давомида аниқланган муаммоларни бартараф этиш учун масъул ташкилотларга 86 та депутат сўровлари юборилди.

Депутат — бу халқ вакили, халқ дардини тинглаб, уни ечиш йўлида амалий чоралар кўрувчи шахсдир. Шу маънода, Халқ депутатлари Амударё туман Кенгашига 3-Дўстлик сайлов округидан сайланган депутат Мадамин Казаковнинг фаолияти эътиборга моликдир. У туман Кенгашида Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссия раиси сифатида самарали фаолият олиб бормоқда.

Мадамин Казаков ўз депутатлик фаолияти давомида аҳолини қийнаб келаётган муаммоларни бартараф этиш мақсадида масъул ташкилотларга 7 та депутат сўровлари киритган. Ушбу сўровлар асосида бир қатор ижобий натижаларга эришилган. Жумладан, аҳоли билан учрашувлардан бирида Фаровон маҳалласи аҳолисини ташвишга солиб келаётган оқава сув тизимини яхшилаш ҳамда кўприк қуриш масаласи кўтарилган эди. Депутат томонидан мазкур муаммолар тегишли давлат ташкилотларига йўналтирилиб, натижада муаммоларга ижобий ечим топилди. Айни пайтда Янгиобод маҳалласидан Фаровон маҳалласига кириш жойидаги зовурга ўрнатилган талабга жавоб бермайдиган темир кўприк бузилиб, мустаҳкам кўприк қурилмоқда. Бу ишларда аҳолининг ҳиссаси ҳам катта бўлмоқда.

Бу каби ишлар халқ депутатлари маҳаллий Кенгашларининг аҳоли ҳаётидаги аҳамиятини янада ошириб, давлат органлари фаолиятини халқ манфаатларига йўналтиришда муҳим омилга айланмоқда. Маҳаллий Кенгашлар фаолиятини янада такомиллаштириш эса юртимизда демократик ислоҳотларнинг изчил давом этишини таъминлайди.

Зеро, “Ўзбекистон — 2030” стратегиясида белгиланган устувор вазифалар маҳаллий давлат ҳокимияти вакиллик органларини халқнинг ҳақиқий “овози”га айлантиришни тақозо этмоқда. Ушбу стратегик мақсадлар маҳаллий ижро этувчи ҳокимият органлари фаолиятини тубдан трансформация қилиш, ҳудудий бошқарувни “аҳоли манфаатларига хизмат қилиш” тамойили асосида йўлга қўйишни талаб этади. Халқ депутатлар Амударё туман Кенгаши депутатларининг фаолияти ушбу йўналишда маҳаллий Кенгашнинг фаол, ташаббускор ва масъулиятли позицияни эгаллаганидан далолат беради.

Шу ўринда айтиш керакки, янги таҳрирдаги Ўзбекистон Республикаси Конституциясида маҳаллий давлат ҳокимияти вакиллик органлари ҳамда ижро этувчи ҳокимият органлари ваколатларининг аниқ белгилаб қўйилиши, маҳаллий Кенгаш раиси ва ҳоким лавозимларининг бир-биридан ажратилгани ҳам ҳокимиятлар бўлинишига оид конституциявий тамойилнинг маҳаллий даражада тўлақонли амалга оширилишига хизмат қилмоқда. Бу эса маҳаллий Кенгашларнинг мустақиллигини ошириб, уларнинг аҳоли манфаатларини ҳимоя қилишдаги ролини кучайтирмоқда.