Бўзатовда “Инсон – инсонга кўмакчи” мавзусида семинар-коучинг ўтказилди

Мамлакатимизда аҳолининг ижтимоий ҳимоясини кучайтириш, фуқароларнинг муаммоларини бевосита маҳалла даражасида ҳал этишга қаратилган ислоҳотлар изчил давом этмоқда. Ушбу ислоҳотларнинг амалий ифодаси сифатида ташкил қилинган "Инсон" ижтимоий хизматлар марказлари ижтимоий ҳимояга муҳтож аҳолининг энг яқин ёрдамчисига айланмоқда.

Бу борадаги ишларни янада жадаллаштириш учун аҳолининг фикр-мулоҳазаларини ўрганиш ва уларни соҳадаги янгиликлар билан яқиндан таништириш мақсадида Бўзатов туманидаги Кўк сув маҳалласида "Инсон – инсонга кўмакчи" мавзусида семинар-коучинг ташкил қилинди. Туман "Инсон" ижтимоий хизматлар маркази томонидан ташкил этилган ушбу тадбир маҳалла аҳолиси ва масъул ходимларни бир даврага бирлаштирди.

Семинар-коучингни ўтказишдан асосий мақсад – ижтимоий ҳимоя тизимида амалга оширилаётган янгиликларни кенг жамоатчиликка етказиш, фуқароларнинг ҳуқуқий билимини ошириш ва аҳоли муаммоларининг ечимини биргаликда топишдан иборатдир.

Тадбирда туман "Инсон" ижтимоий хизматлар маркази ходимлари, маҳаллаларга бириктирилган ижтимоий ходимлар ҳамда аҳоли вакиллари фаол иштирок этди.

Айтиш жоизки, бугунги кунда маҳаллаларда ҳар бир соҳага алоҳида эътибор қаратилиб, жумладан аҳолининг ижтимоий ҳимояга муҳтож қатламини аниқлаш ҳамда уларнинг муаммоларини ижобий ҳал этиш бўйича масъул ходимлар томонидан амалий ишлар йўлга қўйилган. 2023 йилнинг сентябрь ойидан бошлаб маҳаллаларда ижтимоий ходимлар лавозими жорий этилди ва Кўк сув маҳалласига тайинланган Алламберген Эмбергенов шу кунга қадар аҳолининг энг яқин кўмакчиси сифатида фаолият юритиб келмоқда.

Семинар-коучингда асосий эътибор амалдаги меъёрий ҳужжатлар ва аҳолига кўрсатилаётган хизматларнинг ҳуқуқий асосларини тушунтиришга қаратилди.

Марказнинг сектор бош мутахассиси Медет Арзиев ёрдамга муҳтож оилалар учун газ ва электр энергиясига тўланадиган компенсациялар ҳақида маъруза қилди. Бу маълумотлар аҳолининг ижтимоий-иқтисодий аҳволини яхшилашга қаратилган давлат томонидан берилаётган молиявий кўмакларни тўғри ва ўз вақтида олиш учун муҳим аҳамият касб этади.

Марказнинг яна бир сектор бош мутахассиси Баҳодир Шамамбетов Ўзбекистон Республикаси Вазирлар Маҳкамасининг 2025 йил 23 июлдаги “Аёллар дафтари," "Ёшлар дафтари" ва "Саховат ва кўмак" жамғармалари маблағлари ҳисобидан ижтимоий ёрдам кўрсатиш тизимини такомиллаштириш чора-тадбирлари тўғрисида”ги қарорига асосан "Саховат ва кўмак" жамғармасидан кўрсатиладиган хизматлар бўйича батафсил тушунтириш берди. Бу жамғарма аҳолининг моддий ёрдамга муҳтож қатламларига тезкор ва манзилли кўмак беришда муҳим роль ўйнаши таъкидланди.

Шунингдек, марказнинг сектор бош мутахассиси Қияс Хабипов Ўзбекистон Республикаси Вазирлар Маҳкамасининг 2024 йил 30 апрель куни "Муҳтож шахсларни протез-ортопедия мосламалари ва реабилитация қилишнинг техник воситалари билан таъминлаш тартиби тўғрисидаги низомни тасдиқлаш ҳақида"ги қарори ҳақида нутқ сўзлади. Бу мавзу ногиронлиги бўлган шахсларнинг ҳаёт сифатини яхшилаш ва уларни жамиятга тўлақонли интеграция қилиш учун жуда долзарб аҳамиятга эга экани алоҳида қайд қилинди.

Семинар-коучингдаги энг муҳим жиҳатлардан бири – унинг интерактив тарзда ўтказилганидир. Иштирокчилар "Инсон" ижтимоий хизматлар маркази фаолияти билан танишиш билан бирга, интерфаол ўйин асосида марказ ходимлари ролида ўзларини синаб кўрдилар. Бундай амалий ёндашув фуқароларнинг тизимга бўлган ишончини ошириб, муаммоларга масъул ходимлар назари билан қараш имконини берди.

Тадбир давомида иштирокчиларнинг фикр-мулоҳазалари тингланди ва барча саволларига мутахассислар томонидан атрофлича жавоб берилди.  Бўзатов туманидаги ушбу тадбир "Инсон – жамиятнинг таянчи" тамойили асосидаги ижтимоий ҳимоя тизимининг маҳалла даражасидаги самарадорлигини оширишга қаратилган амалий қадам бўлди.